އއ. ތޮއްޑޫގައި އެއް ސައިކަލުގައި ތިން މީހުން ދަނިކޮށް އެކްސިޑެންޓެއް ހިނގާ އެކަކަށް އައިސީޔޫއިން ފަރުވާ ދެމުން އެބަދެ އެވެ.
ތޮއްޑޫ ކައުންސިލްގެ މެމްބަރަކު "ރާއްޖެއެމްވީ"އަށް ވިދާޅުވީ އެ އެކްސިޑެންޓް ހިނގީ ހުކުރު ދުވަހު މެންދުރު ފަހު 13:30 އެހާކަންހާއިރު، މޫދަށް އެރުމަށްޓަކައި އެރަށު އާއިލާއެއް ތިން މީހުން އެއް ސައިކަލެއްގައި ދަނިކޮށް މަގުގެ އަޑިގުޑަންގަނޑަކަށް ޖެހި، ސައިކަލް ގޮސް މަގުގެ އެއްފަރާތުގައި އޮތް ރުކެއްގައި ޖެހުމާ ގުޅިގެން ކަމަށެވެ.
އޭނާ ވިދާޅުވީ އެ ސައިކަލްގައި ތިބީ ސްކޫލް ކުއްޖަކާއި އެކުއްޖާގެ ދެ ބޭބެ ކަމަށެވެ. އެތަނުން ސައިކަލް ދުއްވަން އިން ބޮޑު މީހާ ވަރަށް ބޮޑަށް ޒަހަމްވެފައިވާ ކަމަށް އޭނާ ވިދާޅުވި އެވެ. އަދި އޭނާ މާލެ ގެނެސް އައިޖީއެމްއެޗް އައިސީޔޫގައި ފަރުވާދެމުންދާ ކަމަށް ވެސް ކައުންސިލް މެމްބަރު ވިދާޅުވި އެވެ. އަދި ދެ ކުދިންނަށް ފަރުވާ ދިނުމަށްޓަކައި އއ. ރަސްދޫއަށް ފޮނުވާލާފައިވާ ކަމަށް ވެސް އޭނާ ވިދާޅުވި އެވެ.
އައިޖީއެމްއެޗްގެ މީޑިއާ އޮފިޝަލް ފޯނަށް ޖަވާބު ނުދެއްވާތީ އައިސީޔޫގައި އޮތް މީހާގެ ހާލު ވަނީ އޮޅުން ފިލާގޮތް ނުވެފައެވެ.
މީގެ އިތުރުން ފުލުހުންގެ ބަހެއް ހޯދުމަށް ފުލުހުންގެ މީޑިއާއަށް ގުޅުމުން ފޯނަށް ޖަވާބު ނުދޭތީ ފުލުހުންގެ ބަހެއް ވެސް ވަނީ ލިބޭގޮތް ނުވެފަ އެވެ.
