އދ.އަތޮޅުގެ ޗެމްޕިއަންކަން ކުނބުރުދޫ އަށް

އެސްޓީއޯ މިނިވަން ޗެމްޕިއަންޝިޕް ފުޓުބޯޅަ މުބާރާތުގެ އދ.އަތޮޅުގެ ޗެމްޕިއަންކަން ކުނބުރުދޫއިން ހޯދައިފި އެވެ.

ކުނބުރުދޫ ޗެމްޕިއަންކަން ހޯދީ ހުކުރު ދުވަހު ހަވީރު އެއަތޮޅު މަހިބަދޫ ރަސްމީ ފުޓުބޯޅަ ދަނޑުގައި ކުޅުނު ފައިނަލް މެޗުގައި މަންދޫގެ މައްޗަށް ކުރި ހޯދައިގެންނެވެ. މި މެޗް ކުނބުރުދޫއިން ކާމިޔާބުކުރީ 3-1ގެ ނަތީޖާއަކުންނެވެ.

މެޗު ފަށައިގެން މޮޅަށް ކުޅެފައިވަނީވެސް ކުނބުރުދޫއިން ނެވެ. އެގޮތުން އެޓީމުން ވަނީ ގިނަ ވަގުތު ބޯޅަ ކޮންޓްރޯލްކޮށް މަންދޫގެ ގޯލަށް ނުރައްކާ ކޮށްފަ އެވެ. ނަތީޖާއެއްގެ ގޮތުން އެޓީމުން ވަނީ 24 ވަނަ މިނެޓުގައި ފުރަތަމަ ލަނޑު ޖަހާ ލީޑު ނަގާފަ އެވެ. މި ލަނޑު އެޓީމަށް ކާމިޔާބުކޮށްދިނީ އަހްމަދު ޝަފްރާޒް އެވެ. މި ލަނޑަށް ފަހުގައިވެސް އެޓީމުން ވަނީ ރަނގަޅު ފުރުސަތުތަކެއް ތަނަވަސް ކޮށްފަ އެވެ. ނަމަވެސް ފުރަތަމަ ހާފު ނިންމާލީ 1-0 ގެ ނަތީޖާއަކުންނެވެ.

ދެވަނަ ހާފު ކުނބުރުދޫން ފަށައިގަތީ ކުޅުން އިތުރަށް ވަރުގަދަ ކޮށްގެންނެވެ. އެގޮތުން އެޓީމުން ވަނީ ފުލުފުލުގައި އިތުރު ދެ ލަނޑު ކާމިޔާބުކޮށް ލީޑު ފުޅާ ކޮށްފަ އެވެ. 49 ވަނަ މިނެޓުގައި އަލީ ނިޝާހް ގެ ލަނޑުން ލީޑު ފުޅާކުރިއިރު 55 ވަނަ މިނެޓުގައި އަހްމަދު ރަޒްނީ ވަނީ ކުނބުރުދޫގެ ލީޑު އިތުރަށް ފުޅާކޮށްދީފަ އެވެ.

މަނދޫއަށް މެޗުގައި ސުން ކަނޑުވާލަ ދިނީ 65 ވަނަ މިނެޓުގައި އާދަމް ލަރީފް ކާމިޔާބުކުރި ލަނޑުންނެވެ.

ފާއިތުވި އަހަރު މިނިވަން ޗެމްޕިއަންޝިޕްގައި އދ.އަތޮޅުގެ ޗެމްޕިއަންކަން ހޯދާފައިވަނީ މަހިބަދޫއިންނެވެ.