މޮރިޝަސްގެ ފަރަށް ތެޔޮ ބޯޓެއް އުރި، ފަރުތަކާއި ކަނޑުގެ ދިރުންތައް ނުރައްކަލެއްގެ ތެރޭގައި

އިންޑިއަ ކަނޑުގެ ޖަޒީރާ ޤައުމެއްކަމަށްވާ މޮރިޝަސް މިއަދު މިވަނީ "ސްޓޭޓް އޮފް އެންވަޔަރމަންޓަލް އިމަރޖެންސީ" އެއްގައެވެ. ތިމާވެށީގެ ކާރިސާއަކަށް އެ ޤައުމު ވެއްޓިފައި މިވަނީ ދާދި ފަހުން ޖަޕާނުގެ ތެޔޮ ބޯޓެއް މޮރިޝަސްގެ ފަރަކަށް އަރައި، ތެޔޮ ބޯޓު ބަންޑުން ވުމުގެ ސަބަބުން ކަނޑުގެ ދިރުންތަކަށް ކުރިމަތިވި ނުރައްކަލާއި ގުޅިގެންނެވެ.

މިދިޔަ ޖުލައި މަހުގެ 25 ވަނަ ދުވަހު ބޯޓު ފަރަށް އަރައި، ބޯޓުގައި ހުރި ތެޔޮތައް ލީކުވާން ފެށުމާއެކު، އެ ޤައުމުގެ ކޯސްޓްގާރޑާއި، ކަމާބެހޭ ފަރާތްތަކުން އޭރު ވަނީ ބޯޓުގައި ހުރި ތެޔޮތައް އިތުރަށް ލީކުވިޔަނުދީ ތެޔޮތައް ބޯޓުން ހުސްކުރުމުގެ މަސައްކަތް ފަށާފައެވެ. ނަމަވެސް އެންމެ ފަހުން އާދިއްތަ ދުވަހު އިވިގެން ދިޔަ ޚަބަރަކީ 4000 ޓަނުގެ ތެޔޮ ހިފައިގެން ދިޔަ ޖަޕާނުގެ މި ބޯޓު (އެމްވީ ވަކަޝިއޯ) ބައިބައިވެ، ބޯޓުގެ ބައިތައްވެސް އޮޔާދާން ފެށި ޚަބަރެވެ.

މިހާރުވެސް 1000 ޓަނަށްވުރެ ގިނަ ތެޔޮ އެ ސަރަޙައްދުގެ ކަނޑުގެ ތެރެއަށް ލީކުވެފައިވާއިރު، 11 އޯގަސްޓުގެ ނިޔަލަށް ކުރި ދިރާސާތަކުން މިހާތަނަށް 27 ސްކޮޔަރ ކިލޯމީޓަރުގެ ސަރަޙައްދަކަށް ތެޔޮތައް ފެތުރިފައިވާކަމަށް އެމެރިކާގެ ކުންފުންޏެއް ކަމަށްވާ އަރސާ ސްޕޭސް ސިސްޓަމްސްއިން ބުނެފައިވެއެވެ. އެގޮތުން މި ޑާޓާތަކަކީ ސެޓެލައިޓް އިމޭޖްތައް މެދުވެރިކޮށް އެ ސަރަޙައްދު ބެލި ބެލުމުން ހޯދިފައިވާ ބައެއް ޑާޓާއެވެ.

މޮރިޝަސްއަކީ ދުނިޔޭގެ ފެންވަރުގައި ފާހަގަ ކޮށްލެވޭ ކަނޑުގެ ދިރުންތަކުން މުއްސަނދިވެފައިވާ ފަރުތަކެއް ލިބިފައިވާ ޤައުމެކެވެ. އެހެން ނަމަވެސް، މި ޙާދިސާއާ ގުޅިގެން މޮރިޝަސްގެ އެތައް ހާސް ކަނޑުގެ ދިރުންތަކަކަށް އޭގެ އަސަރު ކުރާނެކަމަށް މިވަނީ ބެލެވިފައެވެ. އެއާއެކު ނިމިދިޔަ ހަފްތާގައި އެ ޤައުމުން ވަނީ ތިމާވެށީގެ ކާރިސާއެއް އިއުލާނުކޮށް، އެކަމުގައި ބައިނަލްއަޤުވާމީ ފަރާތްތަކުގެ އެހީއަށްވެސް އެދިފައެވެ. އަދި މޮރިޝަސްއަކީ ފަތުރުވެރިންގެ މެދުގައިވެސް މަޤުބޫލު މަންޒިލެއް ކަމަށްވުމާއެކު، މި ޙާދިސާއާ ގުޅިގެން އެ ޤައުމުގެ އިޤްތިސާދަށްވެސް އޭގެ އަސަރު ވަރަށް ބޮޑަށް ކުރާނެ ކަމަށް ދިރާސާ ކުރާ ފަރާތްތަކުން ބުނެއެވެ.

އޭގެ އިތުރުން، ބޯޓު އުރިފައިވަނީވެސް މަދުން ނޫނީ ނުފެންނަ ކަނޑުގެ ދިރުންތަކަކުން މުއްސަނދިވެފައިވާ ސަރަޙައްދަކަށް ކަމަށް ރިޕޯޓުތައް ބުނެއެވެ. އަދި އެ ސަރަޙައްދަކީ ބައިނަލްއަޤުވާމީ ކޮންވެންޝަނެއްގެ ދަށުން ހިމާޔަތް ކޮށްގެން ބަލަހައްޓަމުންވެސް ދިޔަ ސަރަޙައްދެކެވެ.

މޮރިޝަސްގެ އެންވަޔަރމެންޓަލް އިންޖިނިޔަރެއް ކަމަށްވާ ވަސެން ކައުޕެމުތޫ ވިދާޅުވީ، ކަނޑުގެ އައްސޭރިއާ ކައިރީގައި ދިރިއުޅޭ އާބާދީތަކަށް އެކަމުގެ ސަބަބުން ބޮޑެތި ގެއްލުންތަކަކާ ކުރިމަތިލާން ޖެހިފައިވާ ކަމަށެވެ. އެގޮތުން އެ ސަރަޙައްދުގެ ވައި ތަޢައްޔަރުވެފައިވުމާއެކު، ނޭވާލާއިރުވެސް ތެލުގެ އަސަރު ފޯރާކަމަށް އޭނާ ވިދާޅުވިއެވެ. އަދި އެކަމުގެ ސަބަބުން ސިއްޙީ އެތައް މައްސަލައެއް ފެންމަތިވާނެ ކަމުގެ ބިރު މިވަނީ ހީވެފައެވެ.

ބޭރުގެ މީޑިއާތަކުން ރިޕޯޓް ކޮށްފައިވާ ގޮތުން އޭރުވެސް ބޯޓުގައި ގާތްގަނޑަކަށް 90 ޓަނުގެ ތެޔޮ ހުއްޓެވެ. ދިރާސާކުރާ ފަރާތްތަކުން ސިފަ ކުރަނީ މިއީ އެ ސަރަޙައްދުގެ ޙާލަތު އިތުރަށް ގޯސްވެގެންދާނެ ކަމުގެ ރަނގަބީލެއްގެ ގޮތުގައެވެ.

މޮރިޝަސްއަށް ދިމާވެފައިވާ މި ޙާލަތުން އަރައިގަތުމަށް އެކި ޤައުމުތަކުން ދަނީ އެހީތެރިކަން ފޯރުކޮށްދެމުންނެވެ. އެގޮތުން ފްރާންސްގެ ރައީސް އެމަނުއެލް މެކްރޮންވެސް ވިދާޅުވީ، "ތިމާވެއްޓަށް ލިބޭ ގެއްލުމަކީ އެންމެންނަށްވެސް ލިބޭ ގެއްލުމެއް" ކަމަށެވެ. އެއާއެކު މޮރިޝަސްއަށް އެހީތެރިކަން ފޯރުކޮށްދިނުމަށް ނުފޮރުޅާ އެންމެ ގާކޮޅެއްވެސް ނުބާއްވާނެ ކަމުގެ ޔަޤީންކަން އެ ޤައުމުން ވަނީ ދީފައެވެ.

އޭގެ އިތުރުންވެސް ގިނަ ޤައުމުތަކަކުން އެހީތެރިކަން ފޯރުކޮށްދެމުން ގެންދާއިރު، އަވައްޓެރި އިންޑިއާއިންވެސް އާދިއްތަ ދުވަހު ވަނީ މޮރިޝަސްއަށް އެހީވުމަށް އެ ޤައުމުގެ ތަޖުރިބާކާރު ޓީމެއް ފޮނުވާފައެވެ. އަދި ޓީމާއެކު 30 ޓަނުގެ ޓެކްނިކަލް ސާމާނުތައްވެސް އިންޑިއާއިން ވަނީ ފޯރުކޮށްދީފައެވެ. މިކަމުގައި މޮރިޝަސްއަށް އެހީތެރިވުމަށް ގިނަ ޤައުމުތަކަކުން ދަނީ މަސައްކަތް ކުރަމުންނެވެ.