ތެލުގެ އަގުބޮޑުވަމުން ދިއުމާއެކު، ނައިޖީރިޔާފަދަ ތެޔޮ ނަގާ ބިޔަ ގައުމުތައްވެސް ސޯލާރ އެނަރޖީއާ ދިމާއަށް

ދުނިޔޭގައި ތެލުގެ އަގުބޮޑުވަމުން ދިއުމާއެކު އެފްރިކާގެ އެންމެ ބޮޑު އިގުތިސާދު އޮންނަ ނައިޖީރީއާ ފަދަ ބިޔަ ގައުމުތަކުންވެސް ސޯލާރ އެނަރޖީއާ ދިމާއަށް އެނބުރެންފަށާފައިވާކަމަށް ޚަބަރުލިބެއެވެ. 22 މިލިއަން މީހުންގެ އާބާދީއެއް އޮންނަ ނައިޖީރިޔާއަކީ އަމިއްލަޔަށް ތެޔޮ އުފައްދާ ގައުމަކަށްވާއިރު، ނައިޖީރިޔާއަކީ ދުނިޔޭގައި 15 ވަނަޔަށް، އަދި އެފްރިކާގައި އެންމެ ގިނައިން ތެޔޮ އުފައްދާ ގައުމެވެ. 2016 ވަނަ އަހަރުގެ ހިސާބުތައް ދައްކާގޮތުން، އެގައުމުން ދުވާލަކު 1.9 މިލިއަން ފީފާ ބާޒާރަށް ނެރެއެވެ. އަދި އެ ގައުމުގެ ޖަނަރޭޓަރުތައް ހިންގުމަށް ފިއުލް ނުވަތަ ޑީސަލް ގަތުމަށް އަހަރަކު 22 ބިލިއަން ޑޮލަރު ނައިޖީރިޔާއިން ޚަރަދުކުރެއެވެ. އެތެރޭގެ ބޭނުންތަކަށް ދުވާލަކު 428000 ފީފާގެ ތެޔޮ ބޭނުންކުރެއެވެ.

އެގައުމުގައި 12،500 މެގަވޮޓްގެ ކަރަންޓް ދެވޭނެ ހަކަތައިގެ މައި ނިޒާމެއް ގާއިމްކޮށްފައިވީނަމަވެސް ޕީކް ގަޑިތަކުގައިވެސް މިހާރު ދޫކުރަނީ 4000 މެގަވޮޓް ކަމަށްވެއެވެ. އެހެންކަމުން ވިޔަފާރިތަކާއި އަމިއްލަ ފަރުދުންނަށްވެސް ވަނީ ޑީސަލް އަޅައިގެން ހިންގާ ޖަނަރޭޓަރުތަކަށް ބަރޯސާވާންޖެހިފައެވެ. މިއާއެކު ސޯލާރ ކުންފުނިތަކުގެ އުފެއްދުންތަކާ ދިމާއަށް ދާ މީހުންގެ އަދަދު ވަނީ އިތުރުވެފައެވެ. ބައެއް ސޯލާރ ކުންފުނިތަކުން ބުނެފައިވާގޮތުގައި، ވަކި ގޭބިސީތަކަށް ބޭނުންކުރެވޭ "މިނީ ގްރިޑް" ނުވަތަ ކުޑަ ސޯލާރ ޕެނަލް އުފެއްދުމަށް ޑިމާންޑް އިތުރުވަމުންދާތީ ބައެއް ކަސްޓަމަރުން އަނބުރާ ފޮނުވާލަންވެސް އެބަޖެހެއެވެ. އެހާވެސް ވަނީ އެތަކެއްޗަށް ޑިމާންޑް އިތުރުވެފައެވެ.

ނައިޖީރިޔާގައި ޕެޓްރޯލަށް ސަބްސިޑީ ދިންނަމަވެސް ޑީސަލަށް ސަބްސިޑީއެއްނުދެއެވެ. އެހެން ކަމުން ޑީސަލްގެ އަގު ވަނީ ތިންގުނަ ބޮޑުވެ 800 ނައިރާ ނުވަތަ 1.93 ޑޮލަރަށް ލީޓަރެއް އަރާފައެވެ. ޑީސަލްގެ އަގު މިހާ ބޮޑުވެގެން ދިޔައީ ރަޝިޔާ-ޔޫކްރެއިން ހަނގުރާމައާގުޅިގެންނެވެ.

މިއަހަރުގެ ކުރީކޮޅު ބެލިއިރު ނައިޖީރިޔާގައި ސޯލާރ ހަކަތަ ބޭނުންކުރެވޭ ނިސްބަތަކީ އެކެއް މެގަވޮޓެވެ. ނައިޖީރިޔާފަދަ އެހެން އިމަރޖިންގ މާރކެޓެއްކަމަށްވާ ދެކުނު އެފްރިކާގައި 8 މެގަވޮޓް ސޯލާރ ކަރަންޓް ބޭނުންކުރާކަމަށްވެއެވެ. މިހާރު ޚަބަރުލިބޭގޮތުން ނައިޖީރިޔާގައިވެސް ދަނީ ސޯލާރ ހަކަތަ ބޭނުންކުރާ މިންވަރު ފުރަތަމަ 6 މެގަވޮޓަށް އިތުރުކޮށް، އަދި އެއަށްފަހު ހަމަ މިއަހަރުތެރޭގައި 12 މެގަވޮޓަށް އިތުރުކުރުމަށް މަސައްކަތްކުރަމުންނެވެ. އަމާޒަކީ މާދުރުނޫން މުސްތަގްބަލެއްގައި 200 މެގަވޮޓްގެ ސޯލާރ ޕަވަރ ޕްލާންޓަކާ ހަމަޔަށް ޚިދުމަތް ގެންދިއުމަށްޓަކައި އެވަރުގެ ގްރިޑެއް، ދެކުނުގެ ޑެލްޓާ ސްޓޭޓް ސަރަހައްދުގައި ގާއިމްކުރުމެވެ. މިކަމަށްޓަކައި ބޭނުންވާ ސޯލާރ ޕެނަލްތަކާއި އެހެނިހެން އާލާތްތައް މިހާރު ދަނީ ތައްޔާރުކުރަމުންނެވެ.