ދިވެހިންގެ މެދުގައި މަޤުބޫލުކަން ހޯދާފައިވާ "ފަށާއިރު" ޕްރޮގުރާމަކީ ކޮންމެ ދުވަހެއްގެ ހެދުނު ގިނަ ބަޔަކު ވަރަށް އިންތިޒާރު ކުރާ ޕްރޮގުރާމެކެވެ. އޭގެ ޕްރެޒެންޓަރުންގެ ހުށަހެޅުމުގެ ވައްޓަފާޅިއަކީ އެންމެ ގިނަ ބައެއްގެ ތަޢުރީފު އެޕުރޮގުރާމަށް އޮހިގެންދާ އެއްކަންތަކެވެ. ބުދަ ދުވަހުގެ ޕްރޮގުރާމް ޚާއްޞަ ވެގެން ދިޔައީ، ޓީވީތަކުން ވަރަށް މަދުން ނޫނީ ނުފެންނަ މޫނެއް ކަމުގައިވާ މަޝްހޫރު ވިޔަފާރިވެރިޔާ ޗަމްޕާ މުހައްމަދު މޫސާ (އުއްޗު)ގެ ޚާއްޞަ ފެނިލުމުގެ ސަބަބުންނެވެ.
އިއްތިފާޤުން ނަމަވެސް މިދުވަސް ދިވާމީ އުއްޗުގެ 76 ވަނަ އުފަންދުވަހާއެވެ. ޕްރޮގުރާމުގަ އުއްޗު ވަނީ ވިޔަފާރީގެ ކާމިޔާބު ދަތުރުގެ ތަޖުރިބާގެ އިތުރުން، ޒާތީ ދިރިއުޅުމުގެ ގިނަ ވާހަކަތަކެއް ހިއްސާ ކުރައްވާފައެވެ. އެ ޕްރޮގުރާމު ބެލިއިރުގަ އަޅުގަނޑު އެންމެ ސަމާލުކަން ލިބުނު ސުވާލަކީ ޒީނަތްތެރިވުމާ ބެހޭ ގޮތުން ޕްރެޒެންޓަރު ކޮށްލި ސުވާލެވެ. ސެންޓު ބޭނުންކުރައްވަންތޯ ކުރި ސުވާލަކަށް ޖަވާބުދެއްވަމުން އުއްޗު ވިދާޅުވީ، އާދައިގެ މަތިން ސެންޓު ބޭނުން ނުކުރައްވާ ކަމަށެވެ. އޭގެ ބަދަލުގަ ގިނަ ފަހަރަށް ބޭނުންކުރައްވަނީ ޒައިތޫނި ތެޔޮ ކަމަށެވެ.
ވަރަށް ނުޖަހަން، ދެން ބައެއް ފަހަރު އެއްޗެއް އުނގުޅާލަފާނެ، ގިނައިން ހަމަ އޮލިވް އޮއިލް ބޭނުންކުރަނީ ގައިގައި ލާންވެސް،ޗަމްޕާ މުހައްމަދު މޫސާ (އުއްޗު)
އުއްޗު ސެންޓު ބޭނުން ނުކުރެއްވި ނަމަވެސް ސެންޓަކީ އެންމެ ގިނައިން ބައްލަވައިގަންނަވާ އެއް ހަދިޔާއެވެ. ޕްރޮގުރާމުގައި އުއްޗު ވިދާޅުވީ، ރާއްޖެއިން ބޭރަށް ކުރައްވާ ކޮންމެ ދަތުރެއްގަ މަންމައަށް ގެންނަ ޚާއްޞަ ހަދިޔާއަކީ "ސެންޓުފުޅި"އެއް ކަމަށެވެ.
މައިވަންތަ ގުޅުމަށް އިޝާރާތް ކުރައްވާ ހިއްސާ ކުރެއްވި ވާހަކައިގެ ތެރެއިން އުއްޗު ވިދާޅުވީ، މަންމަ އަރިހުން މަންމަގެ ހުރިހާ ދަރިންގެ ތެރެއިން އެންމެ "ނުލަފާ" ދަރިއަކީ ކޮބައިތޯ ސުވާލު ކުރުމުން، އެންމެ ނުލަފާ ދަރިއަކީ އުއްޗު ކަމަށް މަންމަ ވިދާޅުވިކަމަށެވެ. ސަބަބެއް ކަމަށް މަންމަ ވިދާޅުވީ މާގިނައިން އަންހެން ކުދިން ހޯދަން އުޅުން ކަން އުއްޗު ފާހަގަކުރެއްވިއެވެ. އެ ސުވާލަށް ޖަވާބު ދެއްވުމަށް ފަހު ސަމާސާ ރާއްގެގައި އުއްޗު ވިދާޅުވީ، "ބަގީޗާއަކަށް ވަދެއްޖެނަމަ މާމެލާމެލި ބަލަން" ކޮންމެ މީހަކުވެސް ބޭނުންވާނެކަމަށެވެ.
އެންމެ ބަސް ނާހާ ދަރިއެއްގެ ގޮތައް މަންމަ އުއްޗު ސިފަކުރެއްވި ނަމަވެސް، އެންމެ ރަނގަޅު ދަރީގެ ވާހަކަ އައްސަވާ އިރަށް މަންމަގެ ދުލަށް އަންނަނީވެސް "އުއްޗު" ގެ ނަންކަމަށް އުއްޗު ވިދާޅުވިއެވެ. ސަބަބެއްގެ ގޮތުގައި ވިދާޅުވީ ޢާއިލާގެ އެންމެން ތަފާތުކުރުމެއް ނެތި އެކުއެކީގައި އެންމެން ގޮވައިގެން ދިރިއުޅޭތީ ކަމަށެވެ.
އުއްޗުގެ ހުނަރުތަކާއި މުނިފޫހިފިލުވަން ގެންގުޅުއްވާ އާދަތަކާ ގުޅެގޮތުންވެސް ޕްރޮގުރާމުގައި އުއްޗުއަށް ސުވާލު ޢަމާޒުކުރިއެވެ. އޭގެ ޖަވާބުތަކުގެ ތެރެއިން އަބަދުވެސް ލަވަ އަޑުއެއްސެވުމަށް ވަރަށް ޝައުޤުވެރިކަން ހުންނަ ކަމަށް ވިދާޅުވިއެވެ. ބައެއް ދުވަސްތަކަށް ލަވަތައްވެސް ޚާއްޞަކުރައްވާއިރު، އަމިއްލަފުޅަށް ލަވަ ހެއްދެވުމުގެ ޝައުޤުވެރިކަން ހުންނަކަން ފާހަގަކުރެއްވާފައިވެއެވެ. ޖަވާބުގެތެރެއިން، ކަމުވޮށިގެންވާ ބޭފުޅަކު ވިދާޅުވެގެން ވަގުތުން ހެއްދެވި ޅެމެއް ހިއްސާކުރެއްވިއެވެ.
ވަރަށް ބޮޑު ބޭފުޅެއް އެއި، އަނބިކަނބަލުންވެސް އިންނެވި ކައިރީގައި، ދެން އަޅުގަނޑު ދަންނަވައިފިން ހަމަ ކިޔަންވީތޯއޭ، ވިދާޅުވި ހަދާދޭށޭ ޅެމެއް، ދެން އަޅުގަނޑު އެވަގުތު ކިޔާލަދިން ބައިތެއް ހެދިން "އިލްމަށް ކިތަންމެ މޮޅަކަސް، ފަލަކީ ހިސާބު ދަތަކަސް، ޙިލްމެއް ނުވާ ފިރިންތައް، ދަށުލާނެ އަނބި ކަޅަސް ދޮން، "ޗަމްޕާ މުހައްމަދު މޫސާ (އުއްޗު)
"ފެނުނު ބައެއް މޫނުތަކެއްގެ" ސަބަބުން ލަވަ ހެއްދެވުމަށް ޝައުޤުވެރިވީ ކަމަށް އުއްޗު ވިދާޅުވިނަމަވެސް، އެކަމާއި ގުޅޭ އިތުރު ތަފުޞީލެއް ނުދެއްވައެވެ. އަދި އެވަރުން ވިސްނޭނެ ކަމަށް ވިދާޅުވެ އެވާހަކަ ދޫކޮށްލެއްވީ ޕޮރޮގުރާމުގެ ބެލުންތެރިންނަށެވެ.
