އިއްޒަތާއި އަބުރު ސެކިއުރިޓީ ކޯޑެއްގެ ފަހަތުގައި ރައްކާކޮށްގެން ތިބެވޭކަށެއް ނެތް

ދުނިޔޭގައި ސެކިއުރިޓީ ގޮތުން އެންމެ ވަރުގަދަަކަމަށް ބުނާ އެމެރިކާގެ ޕެންޓަގަންއަށް އޮންލައިން ހަމަލާތައް އަމާޒުކޮށްފައި އެބަހުއްޓެވެ. ތަނުގެ ސެކިއުރިޓީ ފޫއަޅުވާލައި، އެކިކަހަލަ ސައިބަރ ހަމަލާތައް އަމާޒުކޮށްފައިވެއެވެ. އީރާނުގެ ޔުރޭނިއަމް ފައްކާކުރާ ކާރުޚާނާގެ ކަރަންޓު ދުއްވާލައި، އިޒްރޭލުގެ ޖާސޫސީ އިދާރާ މޮސާޑުން ވަނީ ވަރުގަދަ ސައިބަރ އެޓޭކެއް ދާދި މިދާކަށް ދުވަހު ދީފައެވެ.

އެސްޓްރަޒެނެކާ ވެކްސިންގެ ބްލޫ ޕްރިންޓު ރަޝިއާއިން ހެކްކޮށްގެން ނަގާފައިވާ ކަމުގެ ބޮޑެތި ތުހުމަތުތަކެއް ފެންމަތިވެ ރަޝިއާއިން ޖަވާބުދާރީވެފައިވަނީވެސް ހަމަ މި ފަހުގެ ތާރީޚެއްގައެވެ. ދުނިޔޭގެ އެންމެ ވަރުގަދަ ސެކިއުރިޓީތައް ފޫއަޅުވާލައި، ސައިބަރ އެޓޭކްތައްދީ ހެކްކުރަމުންދާއިރު، ތިމާ އަތުގައި އޮންނަ 6 އިންޗީގެ ވަށަމިނުގެ ފޯނަށް ކުރެވެނީ ތަންފުކެއް ބޮޑު އިތުބާރެކޭ ނުބުނެވޭނެބާއެވެ؟

ފަހުގެ ޚަބަރެކެވެ. ބަރަހަނާ ފޮޓޯތައް އަޅައި ޓެލެގްރާމް ގްރޫޕު ހިންގި މައްސަލައެކެވެ. މި މައްސަލައިގައި އޮރިޔާން ކާޑު ގެންގުޅުމުގެ ކުށުގެ ދައުވާތަކަކާއި، އޮރިޔާން ކާޑު ފެތުރުމުގެ ކުށުގެ ދައުވާތަކެއްގެ އިތުރުންވެސް ގިނަ ދައުވާތަކެއް ދިވެއްސެއްގެ މައްޗަށް އުފުލައި، އޭނާގެ ޝަރީއަތް ފެށި ޚަބަރެވެ. އެ މައްސަލައިގައި ފުލުހުން ބުނެފައިވަނީ އެމީހާ ގެންގުޅުނު ހާޑްޑްރައިވަކުން މިލިއަނެއްހާ ފޮޓޯ ފެނިފައިވާ ކަމަށެވެ. މި މައްސަލައިގައި ގިނަ އަދަދެއްގެ ބަޔަކު ވިކްޓިމުންގެ ގޮތުގައި ފާހަގަވެފައިވާއިރު، އޭނާގެ އަތުން ޖުމްލަ 10 ހާޑްޑްރައިވް ފުލުހުން ހޯދިކަމަށްވެއެވެ.

މިއީ އެންމެ މީހެއްގެ ވާހަކައެވެ. މިފަދައިން ހެކްކޮށްގެން އެތައް ބައެއްގެ ޒާތީ މައުލޫމާތުތައް ހޯދުން މިއަދު ވަނީ އާންމު ކަމަކަަށް ވެފައެވެ.

އެހެންނަމަވެސް، މިއަދު ގިނަ ދިވެހި ޒުވާނުން އަމިއްލަ ފޯނަށް ކުރާ އިތުބާރު ނުހަނު ބޮޑެވެ. އަމިއްލަ ފޯނުގައި އެފަދަ ފޮޓޯ ރައްކާކޮށްގެން ގެންގުޅޭ މީހުންނާއި، އިތުބާރުކުރާ މީހުންގެ ބަހަށް ހެއްލި އެފަދަ ފޮޓޯ ފޮނުވާ މީހުންވެސް މަދެެއް ނޫނެވެ. ގިނަ ފަހަރު ހީކުރެވެނީ އަމިއްލަ ފޯނުގެ ވަރުގަދަ ސެކިއުރިޓީ ކޯޑު އެހެން މީހަކަށް ފޫއަޅުވާ ނުލެވޭނެ ކަމަށެވެ. އިތުބާރުކޮށްފައި ފޮޓޯ ފޮނުވާ މީހާ އެފޮޓޯ ރައްކާތެރިކަމާއެކު ގެންގުޅޭނެ ކަމަށެވެ. ނަމަވެސް މިއީ އެޒަމާނެއް ނޫނެވެ. ދުނިޔެ މިވަނީ ޓެކްނޮލޮޖީގެ ގޮތުން ނުހަނު ކުރިއަރާފައެވެ. މިއަދު ސައިބަރ އެޓޭކްތައް ދެމުން އެދަނީ ދުނިޔޭގެ ފެންވަރުގެ އެންމެ ވަރުގަދަ ތަންތަނަށެވެ. އާދައިގެ ފޯނެއްގައި ޖަހާފައިވާ ސެކިއުރިޓީއެއް ނައްތާލުމަކީ މިއަދު އުނދަގޫކަމަކަށް ގައިމުވެސް ނުވާނެއެވެ.

ދާދި ފަހުންވެސް ވަނީ އެފަދަ ހާދިސާއެއް ހިނގާފައެވެ. ޕަބްޖީ ގޭމެއްގެ ތެރެއިން ފެށުނު ގުޅުމެއް ގޮސް، ބްލެކްމެއިލިން އާއި ބިރުދެއްކުމުގެ ބޮޑު މައްސަލަގަނޑަކަށް ބަދަލުވެގެން ދިޔައީއެވެ. މިފަދަ އެތައް ހާދިސާއެއް މިއަދު މުޖުތަމައުގައި ހިނގަމުންދެއެވެ.

ވުމާއެކު، މުޖުތަމައު މިކަމަށް މިހާރަށްވުރެ ބޮޑަށް ހޭލުންތެރިވާން އެބަ ޖެހެއެވެ. ފޯނަކީ ނުވަތަ ތިމާ ގެންގުޅޭ އޮންލައިން ސްޓޯރޭޖަކީ އެންމެ ރައްކާތެރި ތަން ކަމުގައި ދެކިގެން މިއަދު ފަރުޖައްސާލެވެން ނެތްކަން ގަބޫލުކުރަން އެބަ ޖެހެއެވެ. މައިންބަފައިންވެސް އެކަންކަމަށް ދަރިން ހޭލުންތެރި ކުރުވައި، އެފަދަ އަމަލުތައް ހިންގާ މީހުންނެކޭ އެއްވަރަށް ތިމާވެސް ވިސްނުން ފުޅާކޮށް، ސަމާލުވެ ހުންނަން ދަސްކުރަން ޖެހެއެވެ. ތިމާގެ އިއްޒަތާއި އަބުރު ހަތަރު އަކުރުގެ ސެކިއުރިޓީ ކޯޑެއްގެ ފަހަތުގައި ރައްކާކޮށްލައިގެން ތިބެވޭ ވަރަށްވުރެ ޒަމާން ބަދަލުވެ، ކުށްކުރާ މީހުން އެޑްވާންސްވެއްޖެކަން ގަބޫލު ކުރަންޖެހެއެވެ.