ހިރޮޝީމާއަށް އެޓޮމިކް ބޮން ވައްޓާލި ހާދިސާއަށް 75 އަހަރު ފުރުން ފާހަގަކޮށްފި
6 އޯގަސްޓު 2020 | ބުރާސްފަތި 13:16ޖަޕާނަށް އެމެރިކާގެ ލަޝްކަރުތަކުން ހަމަލާދިނީ ދެވަނަ ބޮޑު ހަނގުރާމައިގެ ތެރޭގައި
ހިރޮޝީމާގައި ގާއިމްކޮށްފައިވާ ޕީސް ޕާކުގައި ބޭއްވި ރަސްމިއްޔާތުގެ ތެރެއިން | އޭއެފްޕީ
ދެވަނަ ބޮޑު ހަނގުރާމައިގެ ތެރޭގައި އެމެރިކާގެ ލަޝްކަރުތަކުން ޖަޕާނުގެ ހިރޮޝީމާއަށް އެޓޮމިކް ބޮން ވައްޓާލި ހާދިސާއަށް 75 އަހަރު ފުރުން ޖަޕާނުން ފާހަގަކޮށްފިއެވެ.
ބުރާސްފަތި ދުވަހުގެ ހެނދުނުގެ ވަގުތެއްގައި ހިރޮޝީމާގައި ހުންނަ ޕީސް ޕާކުގައި ބޭއްވި ހަފުލާގައި، ޖަޕާނުގެ ބޮޑުވަޒީރު ޝިންޒޯ އަބޭ އާއި ހިރޯޝީމާގެ މޭޔަރުގެ އިތުރުން މި ހަމަލާއިން ސަލާމަތްވި ފަރާތްތައް ވެސް ބައިވެރިވިއެވެ. ނަމަވެސް ކޮވިޑް ރޯގާއާ ގުޅިގެން މި ދުވަސް ފާހަގަކުރުމުގެ ހަރަކާތްތައް މަދުކުރުމަށް ޖަޕާނު ސަރުކާރުން ވަނީ ނިންމާފައެވެ.
އެގޮތުން ކުރީ އަހަރުތަކުގައި ގިނަ ބަޔަކު މި ރަސްމިއްޔާތުގައި ބައިވެރިވީ ނަމަވެސް، މި އަހަރުގެ ރަސްމިއްޔާތު ބޭއްވީ ދުރުދުރުގައި ގޮނޑި ބަހައްޓައިގެން މާސްކު އަޅަން މަޖުބޫރުކޮށްގެންނެވެ.
މި ރަސްމިއްޔާތުގައި ބައިވެރިވި އެންމެން ވަނީ މަރުވި މީހުންގެ ހަނދާނުގައި، ބޮން ވައްޓާލި ގަޑި ކަމުގައިވާ 08:15 ގައި ހިމޭންކަމުގެ ވަގުތުކޮޅެއް ފާހަގަކޮށްފައެވެ. އަދި ޕީސް ޕާކުގައި ގާއިމްކޮށްފައިވާ މެމޯރިއަލްގައި މާފަތިތައް ބަހައްޓާފައިވެއެވެ.
1945 ވަނަ އަހަރުގެ އޮގަސްޓު މަހުގެ 6 ވަނަ ދުވަހު އެމެރިކާއިން ދިން ހަމަލާގައި 140،000ށް ވުރެ ގިނަ މީހުން ވަނީ މަރުވެފައެވެ. އަދި އޭގެ ތިން ދުވަސް ފަހުން ނަގަސާކީއަށް ވައްޓާލި ބޮމާއެކު، ޖަޕާނުން އަމާންދިނެވެ. މިއާއެކު ދެވަނަ ބޮޑު ހަނގުރާމަ ވަނީ ނިމުމަކަށް އައިސްފައެވެ.
ޖަޕާނުގެ ދެ އަވަށަކަށް ދިން ހަމަލާތަކަކީ ދުނިޔޭގެ ތާރީހުގައި ވެސް ނިއުކްލިއަރ ބޮމެއް ބޭނުންކޮށްގެން ދިން ހަމައެކަނި ހަމަލާތަކެވެ. އޭގެ ފަހުން ނިއުކްލިއަރ ހަތިޔާރު ބޭނުންކޮށްގެން ހަނގުރާމަ ނުކުރުމަށާއި، ނިއުކްލިއަރ ބާރުތަކުން އިތުރަށް ނިއުކްލިއަރ ހަތިޔާރު ނުއުފެއްދުމަށް މުއާހަދާތަކުގައި ވަނީ ސޮއިކޮށްފައެވެ.
