ރަޝިއާގެ ސެއިންޓް ޕީޓަސްބާގްގެ މެޓްރޯގައި ހޯމަދުވަހު މެންދުރު ބޮން ގޮއްވާލި ކަމަށް ތުހުމަތު ކުރެވޭ މިހާއަކީ އުމުރުން 20 ގެ އަހަރުތައް ގުނަމުންދާ، މެދުތެރޭ އޭޝިއާގެ ގައުމެއް ކަމަށްވާ ކިރިގިސްތާނަށް ނިސްބަތްވާ ޖާނުން ފިދާއީއެއް ކަމަށް ކަމާބެހޭ ފަރާތްތަކުން ބުނެފިއެވެ.

"ދަ ރަޝިއަން އިންވެސްޓިގޭޓިވް ކޮމިޓީ" އިން ބުނެފައި ވަނީ ބޮން ގޮއްވާލީ އަކްބަރްޖޯން ޖަލިލޯވް ނަަމަކަށް ކިޔާ އުމުރުން 22 އަހަރުގެ ޒުވާނެއް ކަމަށެވެ. އޭނާއާ ބެހޭ ގޮތުން ކިރިގިސްތާނުގެ ކަމާ ބެހޭ ފަރާތްތަކުން ބުނެފައި ވަނީ އޭނާއަކީ ކިިރިިގިސްތާނަށް ނިސްބަތްވާ ރަޝިއާގެ ރައްޔިތެއް ކަމަށެވެ. ކޮމިޓީން އިތުރަށް ބުނީ އޭނާ ގޮއްވާލަން ތައްޔާރުކޮށްފައިވާ ކަމަށް ބެލެވޭ ބޮމެއް ފެނިިފައިވާ ކަމަށާއި، އެއިން އޭނާގެ ޑީއެންއޭ ފެނިފައިވާ ކަމަށެވެ.

ދެ މެޓްރޯ ސްޓޭޝަންގެ ދެމެދުގައި ދިން ބޮން ގޮއްވުމުގެ ހަމަލާގައި 14 މީހުން މަރުވެފައިވާ ކަމަށް ރިޕޯޓުތައް ބުނާއިރު 50 މީހުން ޒަޚަމްވެފައި ވެއެވެ.

ބޮން ގޮއްވާލުމުގެ ހާދިސާއާ ގުޅިގެން ސެއިންޓް ޕީޓަސްބާގްގައި ވަނީ ހިތާމަފާޅު ކުރުމުގެ ތިން ދުވަސް އިއުލާންކޮށްފައެވެ.

ރަޝިއާގެ ރައީސް ވްލަޑީމިއާ ޕުޓިން ވަނީ ބޮންގޮއްވުމުގެ ހާދިސާ ކުށްވެރިކުރައްވައި މަރުވި މީހުންގެ އާއިލާތަކާއި އަދި ރަހްމަތްތެރިންނަަށް ހަމްދަރުދީ ފޮނުއްވާފައެވެ. އަދި ދުނިޔޭގެ ގައުމުތަކުގެ ވެރިން ދަނީ މިހަަމަލާ ކުށްވެރި ކުރައްވަމުންނެވެ.