ރަޝިއާ މެޓްރޯގައި ބޮން ގޮއްވާލުމުގެ ހާދިސާގެ ފަހުން ހަ މީހުން ހައްޔަރުކޮށްފި

ރަޝިއާގެ ސެއިންޓް ޕީޓަސްބާގްގެ މެޓްރޯގައި ހޯމަދުވަހު މެންދުރު ބޮން ގޮއްވާލި ހާދިސާގެ ފަހުން ހަ މީހުން ހައްޔަރުކޮށްފައިވާ ކަމަށް ރަޝިއާގެ ކަމާބެހޭ ފަރާތްތަކުން ބުދަދުވަހު ބުނެފިއެވެ.

ރަޝިއާގެ ކަމާބެހޭ ފަރާތްތަކުން ބުނީ ހައްޔަރު ކުރި މީހުން ހައްޔަރު ކުރީ "ޓެރަރިސްޓް ހަަމަލާތަކަށް ވާގިވެރިވުމުގެ" ތުހުމަތުގައި ކަމަށާއި އެހެން ނަމަވެސް މެޓްރޯގައި ބޮން ގޮއްވާލި މީހާއާ ގުޅުމެއް އޮތް ކަމުގެ ހެއްކެތް ނެތް ކަމަށެވެ.

ހައްޔަރު ކުރި މީހުންނާ ބެހޭ ގޮތުން "ދަ ރަޝިއަން އިންވެސްޓިގޭޓިވް ކޮމިޓީ" އިން ބުނީ ހައްޔަރު ކުރެވުނު މީހުންނަކީ މެދުތެރޭ އޭޝިއާ އަށް ނިސްބަތްވާ މީހުުން ކަމަށާއި، އެމީހުން ދިޔައީ ސެއިންޓް ޕީޓަސްބާގްގައި ދިރިއުޅެމުންދާ މެދުތެރޭ އޭޝިއާ އަށް ނިސްބަތްވާ ހިޖުރަވެރިން، އިސްލާމިކް ސްޓޭޓް (އައިއެސް) ފަދަ ޓެރަރިސްޓް ޖަމާއަތްތަކަށް ރެކްރޫޓް ކުރަމުން ކަމަށެވެ.

ރަޝިއާގެ ކަމާބެހޭ ފަރާތްތަކުން ބުނީ ސެއިންޓް ޕީޓަސްބާގްގެ މެޓްރޯގައި ހޯމަދުވަހު މެންދުރު ބޮން ގޮއްވާލީ އަކްބާޒޯން ޒަލިލޮވް ނަމަކަށް ކިޔާ ރަޝިއާއަށް އުފަން، ކިރިގިސްތާނަށް ނިސްބަތްވާ އުމުރުން 22 އަހަރުގެ ޒުވާނެއް ކަމަށެވެ.

ދެ މެޓްރޯ ސްޓޭޝަންގެ ދެމެދުގައި ދިން ބޮން ގޮއްވުމުގެ ހަމަލާގައި 14 މީހުން މަރުވެފައިވާ ކަމަށް ރިޕޯޓުތައް ބުނާއިރު 50 މީހުން ޒަޚަމްވެފައި ވެއެވެ. ރަޝިއާގެ ރައީސް ވްލަޑީމިއާ ޕުޓިން ވަނީ ބޮންގޮއްވުމުގެ ހާދިސާ ކުށްވެރިކުރައްވައި މަރުވި މީހުންގެ އާއިލާތަކާއި އަދި ރަހްމަތްތެރިންނަަށް ހަމްދަރުދީ ފޮނުއްވާފައެވެ. އަދި ދުނިޔޭގެ ގައުމުތަކުގެ ވެރިން ދަނީ މިހަަމަލާ ކުށްވެރި ކުރައްވަމުންނެވެ.