ވާރޭ ވެހޭހެން ސައުދީ އަރަބިއްޔާއިން ޔަމަނަށް ބޮން އަޅާލައިފި

ސައުދީއަރަބިއްޔާގެ ވެރިރަށް ރިޔާޒްއަށް އަމާޒުކޮށް ހޫސީ ހަނގުރާމަވެރިން ބެލިސްޓިކް މިސައިލެއް ފޮނުވާލިތާ ގަޑިއިރުތަކަކަށްފަހު، ސައުދީ އިސްވެއޮވެ އުފައްދާފައިވާ ކޯލިޝަނުން ޔަމަނުގެ ވެރިރަށް ސަންއާއަށް މަދުވެގެން 29 ފަހަރެއްގެ މަތިން ވައިގެމަގުން ހަމަލާދީފިއެވެ.

މަންޒަރު ދުށް ފަރާތްތަކުން އަލް ޖަޒީރާގައި ބުނެފައިވަނީ ވެރިރަށް ސަންއާގެ މީހުން ދިރިއުޅޭ އެތައް ސަރަހައްދަކަށް އާދީއްތަ ދުވަހުގެ ރޭ " ބޮމުގެ ވާރޭ ވެހިފައިވާ"ކަމަށެވެ. ހަމަލާތައް އަމާޒުކޮށްފައިވަނީ ރިޔާސީ ގަނޑުވަރާއި، ނޭޝަނަލް ސެކިއުރިޓީ ހެޑްކުއާޓަރ އަދި އިންޓީރިއަރ މިނިސްޓްރީގެ ކައިރީ ހުންނަ ހޫސީ ހަނގުރާމަވެރިން ޕެރޭޑް ބާއްވާ އަލް ސަބީން ސްކްއެއަރއަށެވެ.

ހޫސީން ހިންގާ ސަބާ ނިއުސް އޭޖެންސީން ރިޕޯޓްކޮށްފައިވާގޮތުގައި ސަންއާއަށް 15 ހަމަލާއެއް އަދި ސިންހާން ޑިސްޓްރިކްޓާއި ބަނީ ބަހުލުލްގައި އިތުރު 14 ހަމަލާއެއްވަނީ ދީފައެވެ.

ވެރިރަށް ސަންއާގައި ހުރި އެކްޓިވިސްޓެއްކަމަށްވާ ފާތިކް އަލް-ރޮޒައިނީ އަލް ޖަޒީރާގައި ބުނެފައިވަނީ ބައެއް ހަމަލާތައް އަމާޒުކުރީ ޔުނެސްކޯގެ ތަރިކައިގެ ލިސްޓުގައި ހިމެނިފައިވާ ސަންއާގެ ގަދީމީ ސިޓީއަށްކަމަށެވެ.

ރޮޒައިނީ ބުނިގޮތުގައި މިއީ މި ހަނގުރާމަ ފެށުނުފަހުން އައި އެންމެ ގެއްލުން ބޮޑު ދުވަހެވެ.

ސައުދީ އިސްވެ އޮވެ ގުޅިފައިވާ ކޯލިޝަނުން ޔަމަނުގެ ހޫސީންނާ ދެކޮޅަށް ހަމަލާދޭން ފަށާފައިވަނީ 2015 ވަނަ އަހަރުގެ މާޗް މަހުގެ 26 ވަނަ ދުވަހުއެވެ.