"ބޮންތަކުގެ މަންމަ ބޮމު"ގެ ނަމުން ނަންދީފައިވާ، ނިއުކްލިއާ ބޮން ފިޔަވައި އެމެރިކާގައި އުފެއްދި އެންމެ ބާރުގަދަ ބޮން، އަފްޣާނިސްތާނުގައި ހަރަކާތްތެރިވާ އައިއެސްގެ ހަނގުރާމެވަވެރިންނާ ދެކޮޅަށް ބުރާސްފަތި ދުވަހު ބޭނުންކޮށްފި އެވެ.

އެމެރިކާގެ އަސްކަރީ އޮފިޝަލުންނާ ހަވާލާދީ ސީއެންއެންގައި ބުނެފައިވާ ގޮތުގައި، 30 ފީޓް ދިގު، އަދި 21،600 ޕައުންޓްގެ މި ބޮން އަފްޣާނިސްތާނަށް ވައްޓާލާފައި ވަނީ ބުރާސްފަތި ދުވަހުގެ ރޭ 7:32 ގަ އެވެ.

އެއަށް ފަހު، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައި ވަނީ "އެއީ ކާމިޔާބެއް" ކަމަށެވެ.

ޖީބީޔޫ-43/ބީ މެސިވް އޯޑެންސް އެއާ ބްލާސްޓް ބޮން ނުވަތަ "ބޮންތަކުގެ މަންމަ ބޮން" އަޅާފައި ވަނީ ނަންގަހާރު ޕްރޮވިސްގެ އަޗިން ޑިސްޓްރިކްޓްގައި އައިއެސްގެ ހަނގުރާމަވެރިން ފިލައިގެން އުޅޭ ކަމަށް ބެލެވޭ، ހޮހޮޅަތަކަށާއި ޓަނެލްތަކަށެވެ.

އެމެރިކާގެ އަސްކަރީ މައިމަރުކަޒު، ޕެންޓަގަންގެ ތަރުޖަމާނު އެޑަމް ސްޓަމްޕް ވިދާޅުވީ އައިއެސްގެ ހަނގުރާމަވެރިން ބަލިކުރުމުގެ މަސައްކަތަކީ އެމެރިކާއިން ވަރަށް ސީރިއަސްކޮށްކުރަމުން ގެންދާ ކަމެއް ކަމަށެވެ.

އަފްޣާނިސްތާނަށް ވަރުގަދަ ބޮމުގެ ހަމަލާއެއް ދިނީ، އެމެރިކާގެ ރައީސް ޑްނަލްޓް ޓަރަމްޕް ސީދާ އޯޑަރަށް ކަމަށް އެ މަނިކުފާނު ވިދާޅު ނުވި ނަމަވެސް، ބޮމުގެ ހަމަލާއަށް އިޝާރަތްކުރައްވައި ވިދާޅުވީ، "ހިނގައި ދިޔަ ކަންކަން އެންމެނަށް ވެސް އެނގޭ" ކަމަށާއި އަސްކަރިއްޔާއިން ކުރަން ބޭނުންވާ ކަންކަމުން ފުރިހަމަ އިހްތިޔާރާއި ހުއްދަ އޮންނާނެ ކަމަށެވެ.

ބޮން އަޅައި އައިއެސްގެ ހަނގުރާމަވެރިން ފުހެލާނެ ކަމަށް ރިޔާސީ ކްމެޕޭނުގެ ތެރޭގައި ޓްރަމްޕް ވިދާޅުވެފައިވެ އެވެ.

އިރާގުގެ ހަނގުރާމައިގެ ދުވަސްވަރު ތައްޔާރުކުރި ޖީބީޔޫ-43/ބީ މެސިވް އޯޑެންސް އެއާ ބްލާސްޓް ބޮން ފުރަތަމަ ފަހަރަށް ޓެސްޓްކުރީ 2003 ގަ އެވެ. މި ބޮން އަޅައިފި ނަމަ ބޮޑު ސަރަހައްދެއް ހަލާކުވެގެންދެ އެވެ.