ރާއްޖޭގައި އުފެދިފައިވާ ކޮޅިގަނޑު ތޫފާނަކަށް ބަދަލުވަނީ
15 މެއި 2020 | ހުކުރު 12:02ކަނޑު ދަތުރުފަތުރު ކުރުމުގައި ސަމާލުވާން މެޓުން އިލްތިމާސްކުރޭ
ވިއްސާރަ ދުވަހެއްގައި މާލޭގެ މަގެއްގެ މަތި: މި ދުވަސްވަރު ރާއްޖޭގެ ހުރިހާ ހިސާބަކަށްވެސް މޫސުން އުޅޭނީ ގޯސްކޮށް
ރާއްޖޭގައި މިހާރު އުފެދިފައިވާ ކޮޅިގަނޑު ތޫފާނަކަށް ބަދަލުވާނެ ކަމަށާއި، އެހެން ނަމަވެސް ތޫފާނުގެ ގެއްލުން ރާއްޖެއަށް ކުރާނެވަރު ކުޑަވާނެ ކަމަށް ނެޝަނަލް މީޓިއަރޮލޮޖިކަލް ސެންޓަރު (މެޓް) އިން ބުނެފި އެވެ.
ރާއްޖެޓީވީގެ ކޮވިޑް-19 ކަވަރޭޖްގައި ވާހަކަ ދައްކަވަމުން އެސިސްޓެންޓް މީޓިއަރޮލޮޖިސްޓް އަބްދުﷲ ހާފިޒް ވިދާޅުވީ މި ކޮޅިގަނޑު، ހޮނިހިރު ދުވަހު ތޫފާނަކަށް ބަދަލުވާނެ ކަމަށް ލަފާކޮށްފައިވާއިރު، ތޫފާނުގެ ގެއްލުން ރާއްޖެއަށް ކުޑަވާނެ ކަމަށެވެ. ރާއްޖެއަށް ތޫފާންގެ އަސަރުކުޑަވާނީ ތޫފާން ދަތުރު ކުރަނީ ބަންގްލަދޭޝްއާ ދިމާލަށްވުމުން ކަމަށް ހާފިޒު ވިދާޅުވި އެވެ.
ކުރިޔަށް އޮތް 24 ގަޑިއިރަށް މޫސުން ގޯސްވާނެ ކަމަށް މެޓުން ވަނީ ލަފާކޮށްފައެވެ. ހާފިޒް ވިދާޅުވީ، މިހާރު މޫސުން ބޮޑަށް ގޯސްވެެެގެން އުޅެނީ ވައި އެވަރޭޖްކޮށް ބާރުމިނުގައި ހުރުމުން ކަމަށެވެ. މެދު ރާއްޖެއާއި ރާއްޖޭގެ އުތުރުގެ ރަށްތަކަށް އެވަރޭޖް ވައިގެ ބާރުމިން އުޅެނީ 28 މޭލާއި 35 މޭލާއި ދޭތެރޭގަ އެވެ. ވިލާގަނޑުން 50 މޭލަށް ވައިގަދަވާނެ ކަމަށް މެޓުން ވަނީ ލަފާކޮށްފަ އެވެ. މެޓުން ވަނީ މެދު ރާއްޖެ ތެރެއަށް ޔެލޯ އެލާޓް އަދި ދެކުނަށް ވައިޓް އެލާޓް ނެރެފަ އެވެ.
ބުރާސްފަތި ދުވަހުން ފެށިގެން ރާއްޖޭގެ އެކި ހިސާބުތަކަށް ދަނީ ބޯކޮށް ވާރޭވެހެމުންނެވެ. އެގޮތުން ބުރާސްފަތި ދުވަހުން ހުކުރު ދުވަހުގެ މެންދުރު ދޭއް ޖަހަންދެން ރަށްރަށުން ވާރޭ ރިކޯޑް ކުރެވުނު އަދަދުގެ ތަފްސީލު ހާފިޒް ވަނީ ހިއްސާކުރައްވާފައެވެ.
އެގޮތުން ގދ. ތިނަދޫ އަށް 100 މިލި މީޓަރުގެ ވާރޭ، ނ. މާފަރު އަށް 80 މިލި މީޓަރުގެ ވާރޭ، ވ. ރަކީދޫ އަށް 52 މިލި މީޓަރުގެ ވާރޭ، ށ.ފޮނުދޫ އަށް 82.7 މިލި މީޓަރުގެ ވާރޭ ތ. ބުރުންޏަށް 75 މިލި މީޓަރުގެ ވާރޭ އަދި ގއ. ގެމަނަފުއްޓަށް 72.2 މިލި މީޓަރުގެ ވާރޭގެ އިތުރުން ގދ. ފަރެސް މާދޮޑާ އަށް 77.9 މިިލިމިޓަރުގެ ވާރޭ ވަނީ ވެހިފައެވެ. މެޓުން ވަނީ ކޮންމެހެން ކުރަން ޖެހޭ ދަތުރު ފިޔަވައި އެހެނިހެން ދަތުރުތައް ނުކުރުމަސް އިލްތިމާސް ކޮށްފައެވެ. ކަނޑުގެ ރާޅު އުޅޭނީ ފަސް ފޫޓާއި އަށް ފޫޓާއި ދެމެދުކަމަށް މެޓުން ބުންޏެވެ. އަދި ރާޅު ބޮޑުވުމުގެ ސަބަބުން ރަށްރަށަށް އުނދައެރުމުގެ ފުރުސަތު ބޮޑުވާނެތީ އެކަމަށް ސަމާލުވުމަށް މެޓް އޮފީހުން ވަނީ އިލްތިމާސްކޮށްފައެވެ.
