ރާއްޖޭގައި އަލިފާނުގެ ހާދިސާތައް އިތުރުވަމުންދާ ކަމަށާއި އަލިފާން ނިއްވުމުގައި ހަރަކާތްރިވާ ފަޔަރމަނުންތަކެއް ތަމްރީނުކޮށް އިތުރުކުރުމަކީ ކޮންމެހެން ކުރަންޖެހޭ ކަމެއް ކަމަށް ޑިފެންސް މިނިސްޓަރު އާދަމް ޝަރީފު އުމަރު ވިދާޅުވެއްޖެ އެވެ.
މިނިސްޓަރު މިހެން ވިދާޅުވެފައިވަނީ އެމްއެންޑީއެފް ނޮދަން އޭރިއާގައި ހިމެނޭ ކަނުހުރާ މޯލްޑިވްސް ރިސޯޓްގެ މުވައްޒަފުންނަށް، ފަޔަރ އެންޑް ރެސްކިއު ސަރވިސް (އެފްއާރުއެސް) އިން އިންޑަސްޓްރިއަލް ފަޔަރ ބްރިގޭޑް ކޯހެއް ހިންގާ ކޯސް ނިންމި ފަރާތްތަކަށް ސެތްފިކެޓް ހަވާލުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
މިނިސްޓަރު އާދަމް ޝަރީފު އުމަރު ވިދާޅުވީ، ދިވެހިރާއްޖޭގައި އަލިފާނުގެ ހާދިސާތައް އިތުރުވަމުންދާ ދަނޑިވަޅެއްގައި އަލިފާން ނިއްވުމުގައި ހަރަކާތްތެރިވާނެ ފަޔަރމަނުންތަކެއް ތަމްރީނުކޮށް، އުފެއްދުމަކީ ވަރަށް މުހިއްމު ކަމެއް ކަމަށެވެ.
މިނިސްޓަރު ވިދާޅުވީ، ދިވެހި ސިފައިންނަކީ، އަމިއްލަ ފުރާނައަށްވުރެ ބޮޑަށް ޤައުމީ ވާޖިބަށް އިސްކަންދޭ، ތެދުވެރި ހިތްވަރުގަދަ ބައެއް ކަމަށާއި، އަލިފާނުގެ ހާދިސާތަކުގައި ރައްޔިތުންނާއި މުދާ ސަލާމަތް ކުރުމަށްޓަކާއި ބޭނުންވާ ތަމްރީނުތައް ސިފައިން މިހާރު ވެސް ހަދަމުންދާ ކަމަށެވެ.
ޤައުމަށް ދިމާވާ ބޮޑެތި ކަންކަމުގައި ރައްޔިތުންނާއި މުދާ ސަލާމަތްކުރުމުގައި ދިވެހި ރައްޔިތުންނަށް ވެދެއްވެންއޮތް ފުރިހަމަ އެހީތެރިކަން އެމްއެންޑީއެފުން އަބަދުވެސް ވެދެއްވަމުން ގެންދާނެ ކަމުގެ ޔަޤީން ކަން ޑިފެންސް މިނިސްޓަރު ވަނީ ދެއްވާފަ އެވެ.
މި ކޯހުގައި އަލިފާނުގެ ހާދިސާއެއް ހިނގައިފިނަމަ ޢަމަލު ކުރަން ޖެހޭނެ ގޮތްތަކާއި އަލިފާން ނިއްވުމަށް ބޭނުންކުރާ ސާމާނުތައް ބޭނުންކޮށްގެން އަލިފާން ނިއްވާނެ ގޮތްތައް ވަނީ ދަސްކޮށްދެވިފައެވެ.
