ރާއްޖޭގައި ކެންސަރު ބަލީގެ 8.2 ޕަސެންޓަކީ އުރަމަތީ ކެންސަރު ބަލިމީހުން: މިނިސްޓަރ
ރާއްޖޭގައި އަންނަނީ ކެންސަރު ބަލިމީހުންގެ ދަފްތަރެއް އެކުލަވާލުމުން
މެމޯގްރަފީގެ އެހީގައި އުރަމަތީގެ ކެންސަރަށް ސްކްރީން ކުރުމުގެ ޚިދުމަތް
ރާއްޖޭގައި ކެންސަރު ބަލީގެ 1،080 މީހުން ތިބި އިރު އޭގެ ތެރެއިން 8.2 ޕަސެންޓް މީހުންނަކީ އުރަމަތީ ކެންސަރަށް ފަރުވާ ދެމުންދާ މީހުން ކަމަށް ހެލްތު މިނިސްޓަރ އަބްދުﷲ ނާޒިމް ވިދާޅުވެއްޖެ އެވެ.
ބުދަ ދުވަހު އައިޖީއެމްއެޗްގައި ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރ ނާޒިމް ވިދާޅުވީ، ރާއްޖޭގައި ކެންސަރުގެ ދަފްތަރެއް އެކުލަވާލުމުގެ މަސައްކަތް ކުރައްވަމުން ގެންދަވާ އިރު ގިނަ ބަޔަކަށް ކޮންމެ އަހަރަކު ވެސް އާސަންދައިން ކެންސަރު ބައްޔަށް ޚިދުމަތް ދެމުންގެންދާ ކަމަށެވެ.
އުރަމަތީގެ ކެންސަރަކީ ރާއްޖޭގައި އާއްމުވެފައިވާ ކެންސަރެއްކަން ފާހަގަކޮށް ނާޒިމް ވިދާޅުވީ، މިހާތަނަށް ގާތްގަނޑަކަށް 89 މީހުންނަށް އުރަމަތީގެ ކެންސަރު ޖެހިފައިވާ ކަން ރެކޯޑް ކުރެވިފައިވާ ކަަމަށެވެ.
"2013 ވަނަ އަހަރު އާސަންދަ މެދުވެރިކޮށް 2329 މީހުންނަށް ކެންސަރު ބައްޔަށް ޚިދުމަތް ފޯރުކޮށްދީފައިވާ އިރު މިއީ ރާއްޖޭގެ އާބާދީގެ 0.69 ޕަސެންޓް. މީގެ މާނައަކީ ގާތްގަނޑަކަށް ކޮންމެ 150 މީހުންގެ ތެރެއިން އެކަކީ ރާއްޖޭގައި ކެންސަރު ބަލީގެ ޕޭޝެންޓެއް ކަން" ނާޒިމް ވިދާޅުވި އެވެ.
ވޯލްޑް ހެލްތު އޮގަނައިޒޭޝަން، ޑަބްލިއުއެޗްއޯގެ ތަފާސް ހިސާބުތަކަށް ބަލާ އިރު ދުނިޔޭއިން ކޮންމެ އަހަރަކު ގާތްގަނޑަކަށް ފަސް ލައްކަ މީހުން ކެންސަރު ބަލީގައި ވަނީ މަރުވެފަ އެވެ.
މިފަދަ ބަލިތަކަށް ކުރިޔާލާ ރައްކާތެރިވެ، ބަލީގެ އެންމެ ފުރަތަމަ މަރުހަލާގެ ތެރޭގައި ދެނެގަތުމުގެ މުހިއްމު ކަން ފާހަގަކޮށް މިނިސްޓަރ ނާޒިމް ވިދާޅުވީ، ކޮންމެ ދެ އަހަރުން އެއް ފަހަރު މެމޮގްރާމު މެދުވެރިކޮށް އުރަމަތީގެ ކެންސަރަށް ސްރީންކުރުމަކީ 50 އަހަރަށްވުރެ ،މަތީގެ އަންހެނުން ކޮންމެހެން ކުރަންޖެހޭ ކަމެއް ކަމަށް ސިއްހީ މާހިރުން ލަފާދޭ ކަމަށެވެ.
އައިޖީއެމްއެޗުން މެމޮގްރާމް މެދުވެރިކޮށް އުރަމަތީގެ ކެންސަރަށް ސްރީންކުރުމުގެ ޚިދުމަތް ތައާރަފްކުރުމާ ގުޅޭ ގޮތުން އައިޖީއެމްއެޗުގެ ސީއީއޯ ފަރުހަތު ޝަހީރު ވިދާޅުވީ، މެމޮގްރާމް ނެގުމުގެ ޚިދުމަތް ކޮންމެ އަންގާރަ ދުވަހެއްގެ ހެނދުނު އަށަކުން 12:00 އަށް ކުރިއަށްދާ އިރު އުރަމަތީގެ ޚާއްސަ ކްލިނިކްގެ ޚިދުމަތް ބުރާސްފަތި ދުވަހެއްގެ ހެނދުނު އަށަކުން މެންދުރު ދޭ ޖެހުމާ ހަމައަށް ލިބިގެންދާނެ ކަމަށެވެ.
އައިޖީއެމްއެޗުން އަބަދުވެސް މަސައްކަތްކުރަނީ ރައްޔިތުންނަށް ލުއި ފަސޭހަ ޚިދުމަތްތަކެއް ފޯރުކޮށްދިނުމަށްކަން ފާހަގަކުރައްވާ ފަރުހަތު ވިދާޅުވީ، މިމަހުގެ ތެރޭގައި އެ ހޮސްޕިޓަލުގައި އޮންކޮލޮޖީ ސެންޓަރެއް ގާއިމް ކުރެވިގެންދާ އިރު އެ ސެންޓަރުގެ މަސައްކަތް ޖުމްލަކޮށް އެއްކޮށް ނިމިފައިވާ ކަމަށެވެ. ހަމައެކަނި އެ ސެންޓަރަށް ބޭނުންވަނީ އިތުރު ދެތިން މެޝިން ކަމަށާއި އެތަކެތި ލިބުނު އެންމެ އަވަރަށް ރައްޔިތުންނަށް ޚިދުމަތް ލިބިގެންދާނެ ކަމަށެވެ.
މި ޚިދުމަތް ތައާރަފްކުރުމުން ރައްޔިތުންނަށް މިހާރަށް ވުރެ ފަސޭހަކަމާ އެކު ކެންސަރު ބަލިތަކަށް ފަރުވާ ލިބިގެންދާނެ ކަމަށް އޭނާ ވިދާޅުވި އެވެ.
އުމުތުން 40 އަހަރުގެ ކޮންމެ އަންހެނަކަށް ވެސް އުރަމަތީގެ ކެންސަރުގެ އެއްވެސް އަލާމާތެއް ފެންނަން ނެތް ނަމަވެސް އަހަރަކު އެއް ފަހަރު ޓެސްޓް ކުރުމަށް އައިޖީއެމްއެޗުން ވަނީ އެދިލައްވާފަ އެވެ.
މި ރަސްމިއްޔާތުގައި ރައީސް އަބްދުﷲ ޔާމީންގެ އަނބިކަނބަލުން ފާތިމަތު އިބްރާހީމް ވެސް ބައިވެރިވަޑައިގެންނެވިއެވެ.
