ކޮވިޑް-19 ޖެހިފައިވާ ދިވެހިންގެ އަދަދު 100 އަށް ވުރެ މައްޗަށް!
29 އެޕްރީލު 2020 | ބުދަ 11:18ދިވެހިންގެ ތެރެއިން ގިނަ ކޭސްތަކަކީ މާލެ ސަރަހައްދުން ފެނިފައިވާ ކޭސްތައް
ރެންޑަމް ސާމްޕަލް ނެގުމުގެ މަސައްކަތުގައި އެޗްޕީއޭގެ މުވައްޒަފުން
ބުދަ ދުވަހު އަލަށް ފެނުނު ކޭސްތަކާއެކު، ކޮވިޑް-19 ޖެހިގެން ރިޕޯޓްކުރެވިފައިވާ ދިވެހިން އަދަދު 100 އަށް ވުރެ, މައްޗަށް ގޮސްފިއެވެ.
ކޮވިޑް-19 ޖެހިފައިވާ މީހުންގެ ތެރެއިން މި ވަގުތު ބައްޔަށް ފަރުވާ ހޯދަމުން އަންނަ ދިވެހިންގެ އަދަދަކީ 100 އެވެ. އަދި މި ފަރާތްތަކުގެ ތެރެއިން އެންމެ ކޭސްއެއް ފިޔަވައި ދެން ހުރި ކޭސްތަކަކީ، މާލެއިން ވައިރަސް ފެނުނު ފަހުން ފެނިފައިވާ ކޭސްތަކެކެވެ.
ޖުމްލަ 104 ދިވެއްސަކަށް ވައިރަސް ޖެހިފައިވާ ކަމަށް ރިޕޯޓްކުރެވިފައިވާއިރު، މީގެ ތެރެއިން ހަތަރު ދިވެއްސަކު ވަނީ ފަރުވާ ދިނުމަށް ފަހު ދޫކޮށްލާފައެވެ. އެ ހަތަރު މީހުންނަކީ އިނގިރޭސިވިލާތުން ރާއްޖެ އައުމަށްފަހު ކަރަންޓީނުގައި ތިބި ބައެކެވެ. އިމްޕޯޓަޑް ކޭސްތަކުގެ ތެރެއިން މިހާތަނަށް ބަލި ފަސޭހަ ނުވެ ހުރީ އެންމެ ދިވެއްސެކެވެ. އެއީ ފިލިޕީންސުން ރާއްޖެ އައި 19 އަހަރުގެ ޒުވާނެކެވެ.
މާލޭ ސަރަހައްދުން މި ވައިރަސް ފެނުނު ފަހުން، ޕޮޒިޓިވްވާ މީހުންގެ އަދަދު އަންނަނީ އިތުރުވަމުންނެވެ. މާލެއިން ފެނުނު ފުރަތަމަ ކޭސް ފެނުނުތާ ދެ ހަފުތާ ވެފައިވާއިރު، އެވަރެޖްކޮށް ދުވާލެއްގެ މައްޗަށް 17 ކޭސް ވަނީ ފެނިފަ އެވެ.
ކޮވިޑް-19 ބަލި ފެތުރުން ހުއްޓުވުމުގެ ގޮތުން، މާލެ ސިޓީ ލޮކްޑައުން ހާލަތުގައި އޮތްއިރު، މި މުއްދަތު އިތުރު 14 ދުވަހަށް ދަންމާލުމަށް ވަނީ ނިންމާފަ އެވެ. މި ނިންމުމާއެކު ދެން އެންމެ އަވަހަށް ވެސް ލޮކްޑައުން ނިމޭނީ މެއި މަހުގެ 14 ގައެވެ.
