ތިނަދޫ ހޮސްޕިޓަލްގައި އޮތް މާބަންޑު މީހަކު ސްވައިން ފްލޫއަށް ޖެހިފައިވާ ކަމަށް ބެލެވޭތީ މާލެ ގެންނަނީ

ގދ. ތިނަދޫގައި ހުންނަ ޢަބްދުއް ސަމަދު މެމޯރިއަލް ހޮސްޕިޓަލުގައި ފަރުވާދެމުންދާ މާބަނޑު އަންހެނަކު ސުވައިން ފުލޫ ޖެހިފައިވާ ކަމަށް ޝައްކު ކުރެވިގެން، މާލެ ގެންނަން ނިންމައިފި އެވެ.

ތިނަދޫ ހޮސްޕިޓަލްގެ އެސިސްޓެންޓް ޑިރެކްޓަރު އައިނަތު އަބްދުލް ހަކީމް ވިދާޅުވެފައިވާ ގޮތުގައި ސުވައިން ފުލޫއަށް ޝައްކު ކުރެވޭ އެ އަންހެން މީހާ ބުދަދުވަހުގެ ރޭ ފަތިހު މާލެ ގެންނާނެއެވެ.

މައުލޫމާތު ލިބިފައިވާ ގޮތުގައި އެއީ ގދ. ފިޔޯރީ ސިއްހީ މަރުކަޒުން އެ ހޮސްޕިޓަލަށް ގެންދިޔަ ބަލި މީހެކެވެ. އަދި އެމީހާ ފުރަތަމަ މާލެ ގެންނަން އުޅުނީ ބުދަދުވަހު ހެލިކޮޕްޓަރުގައި ކަމަށާއި ނަމަވެސް ވިއްސާރަވުމުގެ ސަބަބުން ގެނެވިފައި ނުވަނީ ކަމަށެވެ.

އެޗްޕީއޭ އިން އާންމުކޮށްފައިވާ ތަފާސްހިސާބުތަކަށް ބަލާއިރު ބައްޔަށް ޝައްކުކުރެވޭ 279 މީހަކު ވަނީ އެޗްވަންއެންވަން އަށް ޓެސްޓުކޮށްފައެވެ. މީގެ ތެރެއިން 82 މީހަކު އެޗްވަންއެންވަން އަށް ޕޮޒިޓިވް ވެފައިވާކަމަށް އެ އެތޯރިޓީ އިން އާންމުކޮށްފައިވާ ތަފާސްހިސާބުތައް ދައްކައެވެ.

ރާއްޖޭގައި ހަލުވިކަމާއެކު ފެތުރެމުންދާ ހުން އަދި އަރިދަފުސްރޯގާ އާއި އެޗްވަންއެންވަން އަށް ފަރުވާ ހޯދުމަށް ހާއްސަ ފްލޫ ކްލިނިކްތަކެއް ގާއިމްކޮށްފައިވާއިރު، މި ރޯގާ ހަލުއިކަމާއިއެކު، މާލޭގެ އިތުރުން އަތޮޅުތެރޭގައިވެސް ދަނީ ފެންނަމުންނެވެ.

ރޯގާ އާއި ގުޅިގެން އެކުލަވާލާފައިވާ ޓާސްކު ފޯހުން ބުދަދުވަހު ބުނެފައިވަނީ، އެޗްވަންއެންވަން އަށް ޕޮޒިޓިވް ވާ ބަލިމީހުންގެ އަދަދު އަދިވެސް އިތުރުވާނެކަމަށެވެ.