ރައީސް އަބަދުﷲ ޔާމީން އިއްވެވި ރިޔާސީ ބަޔާނަކީ ހިސާބު އަދަދު ތަކަކުން ރައްޔިތުންނަށް ހަގީގަތް އޮޅުވާލާފައިވާ ބަޔާނެއް ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފު ވިދާޅުވެއްޖެ އެވެ.

ރިޔާސީ ބަޔާނުގައި ހުރި ކަންބޮޑުވާކަންތައްތައް ފާހަގަކޮށް، މަހުލޫފު އާންމުކުރެއްވި ބަޔާނެއްގައި ވިދާޅުވެފައިވަނީ، 21 ވަނަ ގަރުނުގެ ''ގަޓު'' ރައީސް މި އަހަރު ވެސް ރައްޔިތުންގެ މަޖިލީހުގައި ރިޔާސީ ބަޔާން އިއްވަން ކެރިވަޑައިނުގެންނެވި ކަމީ ލަދުވެތި ކަމެއް ކަމަށެވެ. އެމަނިކުފާނުގެ މޫނުމަތިން ފެނުނީ ހިތްހަމަ ނުޖެހުމާއި، މާޔޫސް ކަމާ އަދި އިތުބާރު ނެތްކަން ކަމަށް މަހުލޫފު ވިދާޅުވި އެވެ.

ރައްޔިތުންގެ މަޖިލީހުގެ މެމްބަރުންގެ ކުރިމަތީ ހުއްޓި ވަޑައިގެންނެވި އިރު، މަޖިލީހުގެ ކުރީގެ ނައިބު ރައީސް އަޙްމަދު ނާޒިމްގެ ގޮނޑި ގެއްލުވާލާ އޭނާ ވަނީ 25 އަހަރަށް ޖަލަށް ލާފައިކަމަށާއި ގަލޮޅު ދެކުނު ދައިރާ ތަމްޞީލުކުރަން ރައްޔިތުން އިންތިޚާބު ކުރި މީހާ އޮތީ 11 މަހަށް ޖަލަށް ލާފައިކަން މަހުލޫފު ފާހަގަކުރައްވާފައިވެއެވެ. މަހުލޫފު ވިދާޅުވީ، ޕީޕީއެމްގެ މަޖިލިސް މެމްބަރުން ތިއްބެވީ ސީދާ ގޮތުންނާއި ނުސީދާ ގޮތުން ބިރުވެރި ކަމެއްގައި ތާއްޓެއްވެފައިކަމަށާއި، މެމްބަރުން ލައްވާ ފާއިތުވި އަހަރު ވެސް ކުރުއްވި ކަމަކީ ޒާތީ މަސްލަހަތަށްޓަކާ ޤާނޫނު އަސާސީ އާއި ހިލާފު ޤާނޫނުތައް ފާސްކުރުވުން ކަމަށެވެ. އެ ހުރިހާ ޖަރީމާތަކަކަށް އެއްބާރުލުން ދެއްވާ ބައިވެރިއަކީ މަޖިލިސްގެ ރައީސް އަބްދުﷲ މަސީހް ކަމަށް އޭނާ ވިދާޅުވި އެވެ.

މަހުލޫފު ވިދާޅުވީ ރިޔާސީ ބަޔާނުން އެންމެ ފާހަގަ ކުރެވުނު އެއް ކަމަކީ، ރައްޔިތުންގެ އިތުބާރު ގެއްލި، ސިޔާސީ ނުފޫޒުން ތަގައްޔަރުވެ، ބޮއްސުންލާފައިވާ ޝަރުޢީ ދާއިރާ އާއި ބިރުވެރިކަމާއި، ހާސްކަމުގެ ތެރެއަށް ވެއްޓިފައިވާ ސިޔާސީ ބައިބައިވުމާއި، ކޮށާ ކުދި ކުރަމުން، ފޭރެމުންދާ ރައްޔިތުންގެ ހައްގުތަކުގެ ވާހަކަ ހިމަނުއްވާފައިނުވުން ކަމަށެވެ. ގާދޫކޮލުން ބޭރުވަމުންދާ ޑިމޮކްރަސީ އާއި މަޤްބޫލު އުޒުރެއް ނެތި ފަސްކުރަމުން ގެންދާ ލޯކަލް ކައުންސިލް އިންތިޚާބާއި، ބޭރު ޤައުމުތަކުގައި ހިނގާ ހަނގުރާމަތަކުގައި ޓެރަރިސްޓް ޖަމާޢަތްތަކާ ގުޅެމުންދާ ދިވެހިންގެ މައްސަލައާއި މެދު އެއްވެސް ކަންބޮޑުވުމެއް ހާމަ ނުކުރައްވާ އެކަންކަމަށް އަލި އަޅުއްވާލައްވާފައި ނުވާކަން ފާހަގަކުރެވުނު ކަމަށް މަހުލޫފު ވިދާޅުވި އެވެ. އޭނާ ވިދާޅުވީ، ދައުވާކޮށް ޙުކުމްކޮށްފައިވާ ރިޕޯޓަރުންނާއި، ބަންދުކޮށް ހުރަސް އަޅާފައިވާ މީޑީޔާތަކާއި، ފެތުރި އާއްމުވެފައިވާ ކޮރަޕްޝަންގެ މައްސަލައަށް ރިޔާސީ ބަޔާނުގައި އިޝާރާތްވެސްކޮށްލާފައި ނުވާކަން ފާހަގަކުރެވުނު ކަމަށެވެ.

މަހުލޫފުގެ ބަޔާނުގައި އޭނާ ވަނީ، ރިޔާސީ ބަޔާނުގައި ހިމެނޭ ވަކިވަކި ނުކުތާތަކާއި ގުޅޭގޮތުން ހުރި ކަންބޮޑުވުންތައް ހިއްސާކޮށްފަ އެވެ.

ބަޔާން ނިންމާލަމުން މަހުލޫފު ވަނީ ސަރުކާރުން ކުރަމުންގެންދާ ރަނގަޅު ކަންތައްތައްވެސް ފާހަގަކުރައްވާފަ އެވެ. އެގޮތުން ނުކުޅުދުއްތެރިކަން ހުންނަ ފަރާތްތަކަށް ވަޒީފާ ދިނުމަކީ ވަރަށްވެސް ރަގަޅު ކަމެއް ކަމަށް މަހުލޫފު ވިދާޅުވި އެވެ. ނަމަވެސް އެކުދިން ޓީވީތަކުން ލައިވްކޮށް ދައްކައިގެން ނުކުޅުދުންތެރިކަމުގެ ސިއްކަޖަހާ އެކަމުން އިތުރު އެހެން މަޤްސަދެއް ހާސިލް ކުރަން އުޅުމަކީ ދެރަކަމެއް ކަމަށް މަހުލޫފު ވިދާޅުވި އެވެ.

މަހުލޫފު ވިދާޅުވީ، ރައީސް ޔާމީންގެ ސަރުކާރު ދަނީ ދުވަހެއް ދުވަހަކަށް ބަލިކަށިވަމުން ކަމަށެވެ. އެއްދުވަހުން އަނެއްދުވަހަށް ތާއީދު ގެއްލެމުން އަންނަ ކަމަށް މަހުލޫފު ވިދާޅުވި އެވެ. މަހުލޫފު ވިދާޅުވީ، ލޯކަލް ކައުންސިލް އިންތިހާބާ ރިޔާސީ އިންތިހާބުވެސް ތަފާތުބޮޑުކޮށް ކާމިޔާބުކުރާނެ ކަމަށެވެ. އަދި ވޯޓުފޮށިން ބާރުދައްކާލުމަށް ރައްޔިތުން ތިބީ ކެތްމަދުވެފައިކަމަށް މަހުލޫފު ވިދާޅުވި އެވެ.