ފަނޑިޔާރުންނާ ގުޅުންހުރި 100 އަށްވުރެ ގިނަ މައްސަލަ ދަނީ ބަލަމުން:ޖޭއެސްސީ

ޖުޑީޝަލް ސަރވިސް ކޮމިޝަނުން 100 އަށް ވުރެ ގިނަ މައްސަލަ ބަލަމުންދާ ކަމަށް އެކޮމިޝަނުން ބުނެފިއެވެ.

ޖޭއެސްސީގެ އަހަރީ ރިޕޯޓުގައި ބުނެފައިވާ ގޮތުގައި އެކޮމިޝަނަށް މިދިޔަ އަހަރު ހުށައެޅުނު މައްސަލަތަކާއި 2015 ވަނަ އަހަރު ހުށައެޅުނު މައްސަލަތަކުގެ ތެރެއިން ނުނިމި ހުރި މައްސަލަތަކާއިއެކު ޖުމްލަ 109 މައްސަލައެއް މިހާރު ބަލަމުން ގެންދާކަމަށެވެ. އެ ރިޕޯޓްގައި ބުނެފައިވަނީ 2015 ވަނަ އަހަރު ނުނިމިހުރި މައްސަލަތަކާއި މިދިޔަ އަހަރު ހުށައެޅުނު މައްސަލަތަކާއި އެކު 135 މައްސަލައެއްގެ ތެރެއިން 29 މައްސަލައެއް ބަލާ ނިންމާފައިވާކަމަށެވެ. ޖޭއެސްސީގެ ރިޕޯޓްގައި ބުނެފައިވާގޮތުން 2015 ވަނަ އަހަރު އެކޮމިޝަނަށް ހުށައެޅި މައްސަލަތަކުގެ ތެރޭގައި ފަނޑިޔާރުންގެ އިންޓަރގްރިޓީއާއި ގުޅޭ މައްސަލަތައް ހިމެނޭއިރު 2016 ވަނަ އަހަރު ހުށައެޅި 36 މައްސަލައިގެ ތެރެއިން 28 މައްސަލައަކީވެސް ފަނޑިޔާރުންގެ އިންޓަރގްރިޓީއާއި ގުޅޭ މައްސަލަތައް ކަމަށެވެ. އޭގެ ތެރެގައި އަހުލާގީ މައްސަލަޔާއި ޝަރީއަތް ކުރުމުގައި ވަކިފަރާތަކަށް ޖެހުމުގެ މައްސަލަޔާއި ސިޔާސީ ހަރަކާތުގައި ބައިވެރިވުމުގެ މައްސަލަ ހިމެނޭކަމަށްވެސް ޖޭއެސްސީގެ ރިޕޯޓްގައި ވެއެވެ.

ޖޭއެސްސީން ގިނަ އަދަދެއްގެ މައްސަލަ ބަލަމުންދާއިރު ޓްރާންސްޕޭރެންސީ މޯލްޑިވްސްއިން ކުރި ދިރާސާއެއްގައި ބުނެފައިވަނީ ގިނަ ބަޔަކު ރާއްޖޭގެ ޖުޑިޝަރީއަށް އިތުބާރު ނުކުރާ ކަމަށެވެ.