ދުބާއީގެ މޯލްތައް އަޅުން ހުޅުވާއިރު ކުޑަކުދިންނާއި އުމުރުން ދުވަސްވީ މީހުން ވަނުން މަނާ

ކޮވިޑް-19 އާ ގުޅިގެން ދުބާއީގައި އަޅާފައިވާ ބައެއް ފިޔަވަޅުތަކަށް ލުއި ދިނުމުގެ ތެރެއިން ދުބާއީގެ ޝޮޕިންގ މޯލްތައް އަޅުން ހުޅުވަން ނިންމި ނަމަވެސް، ކުޑަކުދިންނާއި އުމުރުން ދުވަސްވީ މީހުން ވަނުން މަނާކޮށްފިއެވެ.

ދުބާއީގެ ޑިޕާރޓްމަންޓް އޮފް އިކޮނޮމިކް ޑިވޮލޮޕްމަންޓް (ޑީއީޑީ) އާ ޙަވާލާދީ ބޭރުގެ މީޑިއާތަކުން ރިޕޯޓް ކޮށްފައިވާ ގޮތުން، އަލުން ފިހާރަތަކާއި ޝޮޕިންގ މޯލްތައް ހުޅުވަން ނިންމި ނަމަވެސް، ކުޑަކުދިންނާއި އުމުރުން ދުވަސްވީ މީހުން މޯލްތަކަށް ޒިޔާރަތް ކުރުމުގެ ހުއްދައެއް ނޯންނާނެއެވެ. އަދި މިއީ ކޮވިޑް-19 އާ ގުޅިގެން ދިރިއުޅުމުގެ ޙާލަތްތަކަށް އަންނަ ބޮޑެތި ބަދަލުތައް ދޭހަވާ ކަމެއްގެ ގޮތުގައި ބޭރުގެ މީޑިއާތަކުން ސިފަކޮށްފައިވެއެވެ.

އެގޮތުން 12 އަހަރުން ދަށުގެ ކުޑަކުދިންނާއި، 60 އަހަރުން މަތީގެ މީހުން މޯލްތަކަށް ޒިޔާރަތް ކުރުން މަނާވާނެ ކަމަށް ޑީއީޑީގެ ނިންމުމުގައި ބުނެފައިވެއެވެ.

އޭގެ އިތުރުން، ފިހާރަތައް އަލުން ހުޅުވި ނަމަވެސް، ކޮވިޑް-19 އާ ގުޅިގެން ކަނޑައަޅާފައިވާ ރައްކާތެރިކަމުގެ މިންގަނޑުތަކަށް އަމަލުކުރަން ޖެހޭނެ ކަމަށް ޑީއީޑީން ވަނީ ބުނެފައެވެ.

ދުބާއީގައި އިއުލާނު ކޮށްފައިވާ ލޮކްޑައުން 4 ސްޓޭޖަކަށް ބަހާލައިގެން އުވާލުމަށް ނިންމާފައި ވާއިރު، ފުރަތަމަ ސްޓޭޖްގައި ފިހާރަތަކާއި މޯލްތައް ހުޅުވި ނަމަވެސް ވަދެވޭނީ ފިހާރަތަކުގެ ޖާގައިގެ ނިސްބަތުން 20 އިންސައްތަ މީހުންނަށެވެ. އަދި މޯލްތަކަށް ވަންނަ ކަސްޓަމަރުންވެސް ސިއްޙީ ޗެކަޕެއް ހަދަން ޖެހޭއިރު، ހުރިހާ ވަގުތެއްގައިވެސް މާސްކް އެޅުން މަޖުބޫރު ކޮށްފައިވެއެވެ.

އޭގެ އިތުރުން، ފިހާރަތަކާއި މޯލްތަކަށް ވަންނަ މީހުންވެސް އިޖުތިމާއީ ގައިދުރު ކަމަށް ޚާއްސަ ސަމާލުކަމެއް ދޭންޖެހޭނެ ކަމަށް ބުނެފައިވާއިރު، 2 މީޓަރުގެ ދުރުމިން ހުންނަން ޖެހޭނެ ކަމަށް ލާޒިމު ކޮށްފައިވެއެވެ. އަދި މޯލްތަކުގައި ސެނިޓައިޒަރ ހުރުންވެސް ވަނީ ލާޒިމުކޮށްފައެވެ.

ޑީއީޑީން ބުނީ، ރައްކާތެރިކަމުގެ ގޮތުން އަޅާ ފިޔަވަޅެއްގެ ގޮތުން މި ދުވަސްވަރު ފިހާރަތަކާއި މޯލްތައް އަޅުން ހުޅުވި ނަމަވެސް، އެއްވެސް ބާވަތެއްގެ ސޭލްއެއް ނުވަތަ ޕްރޮމޯޝަން ހަރަކާތެއް ހިންގައިގެން ނުވާނެ ކަމަށާއި، ވަޒީފާ އަދާ ކުރާ ފަރާތްތައްވެސް އެކަންކަމަށް ޚާއްސަ ސަމާލުކަމެއް ދޭން ޖެހޭނެ ކަމަށެވެ.

ދުބާއީން މިހާތަނަށް ކޮވިޑް-19 ގެ 8238 ކޭސް ރިޕޯޓް ކޮށްފައިވާއިރު، 52 މީހުން ވައިރަސްގެ ސަބަބުން މަރުވެފައިވެއެވެ. އެގޮތުން ދުބާއީން ރައްކާތެރިކަމުގެ ފިޔަވަޅުތައް ވަރުގަދަ ކޮށްފައިވާއިރު، 24 ގަޑިއިރުގެ ކާފިއުވެސް އިއުލާނު ކޮށްފައިވެއެވެ.