ޔުނައިޓެޑް އަރަބް އެމިރޭޓްސް (ޔޫއޭއީ) ގެ ދުބާއީ އަޖުމަން މާރުކޭޓްގައި އަލިފާނުގެ ހާދިސާއެއް ހިނގައިފިއެވެ.

ތަރުކާރީއާއި މޭވާ ވިއްކާ މިމާރުކޭޓްގައި ބުދަ ދުވަހުގެ އިރުއޮއްސި 6:30 ގައި ރޯވި އަލިފާން ގަނޑު ކޮންޓްރޯލް ކުރެވުނީ ތިން ގަޑިއިރު ފަހުންނެވެ.

އޮފިޝަލުންނާއި ހަވާލާދީ ބޭރުގެ މީޑިއާތަކުގައި ރިޕޯޓު ކޮށްފައިވާ ގޮތުގައި އަލިފާންގަނޑު ނިންވުމުގައި އަޖްމަން ފޯސްއާ ގުޅިގެން ސިވިލް ޑިފެންސް ސްޓޭޝަންގެ ފަޔަރފައިޓަރުންނާއި، ޝަރޖާހް އަދި އުމް އަލްގުއައިން ފަޔަރފައިޓަރުން ވަނީ ހަރަކާތްތެރިވެފައެވެ.

އެސަރަހައްދުން އަދިވެސް ދުން އަރަމުންދާއިރު، އަލިފާންގަނޑު ކޮންޓްރޯލް ކޮށްފައިވަނީ ފެނާއި ފޯމް ޖަހައިގެން ކަމަށް އޮފިޝަލުން ބުނެފައިވެއެވެ.

މިއަލިފާނުގެ ހާދިސާގައި އެއްވެސް މީހަކަށް އަނިޔާވިކަމުގެ ރިޕޯޓު މިހާތަނަށް ލިބިފައިނުވެއެވެ. މިހާދިސާ ހިނގިއިރު މާރުކޭޓްގެ ގިނަ ފިހާރަތައް ވަނީ ކޮވިޑް-19އާ ގުޅިގެން ބަންދުވެސް ކޮށްފައެވެ.

އަލިފާނުގެ ހާދިސާ ހިނގަން މެދުވެރި ސަބަބު މިހާރު ދަނީ ތަހުގީގު ކުރަމުންނެވެ.