ޝާހީ ވަރީގެ ބަދަލެއްގެ ގޮތުގައި 734 މިލިއަން ޑޮލަރު ދިނުމަށް ދުބާއީގެ ވެރިޔާއަށް އަމުރުކޮށްފި
22 ޑިސެމްބަރު 2021 | ބުދަ 03:27މިއީ ވަރީގެ ބަދަލެއްގެ ގޮތުގައި މިފަދަ ބޮޑު އަދަދެއް ނަގައި ދިނުމަށް އަމުރުކުރި ފުރަތަމަ ފަހަރު
ޕްރިންސަސް ހާޔާ އޭނާގެ ވަކީލާއެކު
ދުބާއީގެ ވެރިޔާ، ޝެއިޚް މުހައްމަދު ބިން ރާޝިދު އަލް މަކްތޫމްގެ އަނބިކަނބަލުން، ހާޔާ ބިންތް އަލް-ހުސައިނަށް 554 މިލިއަން ޕައުންޑް (734 މިލިއަން ޑޮލަރު) ދިނުމަށް ލަންޑަންގެ ކޯޓަކުން އަމުރުކޮށްފިއެވެ.
ޝާހީ ވަރީގެ މި މައްސަލަ ބަލަމުންދާ ކޯޓުން އަންގާރަ ދުވަހު ކުރި އަމުރުގައި ބުނެފައިވަނީ، ތިން މަސްދުވަހުގެ ތެރޭގައި 251.5 މިލިއަން ޕައުންޑް ކުރީގެ އަނބިކަނބަލުން ހާޔާއަށް ދިނުމަށެވެ. އެއީ ވަރީގެ ސަބަބުން ހާޔާއަށް ލިބެންޖެހޭ ސެކިއުރިޓީއާއި ލަންޑަންގައި ހުންނަ ގެކޮޅުގެ ހަރަދަށާއި ހާޔާގެ އަތްޕުޅުން ގެއްލުނު ގަހަނާއާއި އަންނައުނާއި އެހެނިހެން ތަކެތީގެ ބަދަލެއްގެ ގޮތުންނެވެ. މީގެ އިތުރުން ކޯޓުން އަމުރުކޮށްފައިވަނީ ދެ ދަރިކަލުންގެ ދިރިއުޅުމުގެ ހަރަދާއި ސެކިއުރިޓީއަށް އަހަރަކަށް 11 މިލިއަން ޕައުންޑް އަދި ތައުލީމު ހާސިލް ކުރުމުގެ ހަރަދަށް 3 މިލިއަން ޕައުންޑް ދައްކަން ޖެހޭނެ ކަމަށެވެ.
މިއީ ވަރީގެ ބަދަލެއްގެ ގޮތުގައި މިފަދަ ބޮޑު އަދަދެއް ނަގައި ދިނުމަށް އަމުރުކުރި ފުރަތަމަ ފަހަރެވެ.
މި އަމުރު ނެރުނު ލަންޑަންގެ ފެމިލީ ކޯޓަކީ މިފަދަ ޝާހީ މައްސަލަތައް ބެލުމުގައި މަޝްހޫރު ކޯޓެކެވެ. މީގެ ކުރިން ވަރީގެ ބަދަލެއްގެ ގޮތުގައި އެންމެ ބޮޑު އަދަދަކަށް ނަގައި ދިނުމަށް އަމުރު ކޮށްފައިވަނީ 450 މިލިއަން ޕައުންޑެވެ.
