އަލައްބާރުގެ ވާހަކަތަކުން ފަޅާއެރި ސިއްރު: އެތައް މިލިއަން ޑޮލަރެއް ދިޔައީ ކޮން އަބްދުﷲ އަކަށް؟
27 އޮކްޓޯބަރު 2026 | އަންގާރަ 13:01ރަސްމާލެ މަޝްރޫއުގެ ބޮޑު ބައެއް ހަވާލުކޮށްފައިވާ އީގަލް ހިލްސްގެ ވެރިޔާ އަލައްބާރު، "އަބްދުﷲ" ނަމަކަށް ކިޔާ ފަރާތަކަށް އެތައް މިލިއަން ޑޮލަރެއް ދިން ކަމަށް ބުނި ބުނުމާ ގުޅިގެން ބޮޑެތި ތުހުމަތުތަކެއް ވަނީ ފެންމަތިވެފައި. މި މުއާމަލާތުގައި މިނިސްޓަރު މުއްތަލިބުގެ ދައުރާއި ބޭރުގެ ދަތުރުތަކާ މެދު ސުވާލު އުފެދިފައިވާއިރު، މިކަމުގެ ހަގީގަތް ހާމަކުރުމަށް ގިނަ ބަޔަކު ދަނީ ގޮވާލަމުން
ރަސްމާލޭގައި "މޯލްޑިވްސް ވޯޓަރ ފްރަންޓް އެންޑް މެރީނާ" ތަރައްގީކުރުމަށް ޔޫއޭއީގެ އީގަލް ހިލްސްއާއެކު ސަރުކާރުން އެއްބަސްވުމެއްގައި ސޮއިކުރި ރަސްމިއްޔާތުގެ ތެރެއިން | އީގަލް ހިލްސް
ރަސްމާލެ މަޝްރޫއުގެ ބޮޑު ބައެއް ދީފައިވާ އީގަލް ހިލްސް ކުންފުނީގެ ވެރިޔާ މުހައްމަދު އަލައްބާރު ރާއްޖެއަށް ކުރެއްވި ދަތުރުފުޅުގައި، "އަބްދުﷲ" ނަމަކަށް ކިޔާ ފަރާތަކަށް އެތައް މިލިއަން ޑޮލަރެއް ދެއްވާފައިވާ ކަމަށް ވިދާޅުވި ވާހަކަތަކާ ގުޅިގެން ސިޔާސީ މަސްރަހުގައާއި އާންމުންގެ މެދުގައި ބޮޑެތި ސުވާލުތަކެއް ވަނީ އުފެދިފަ އެވެ. ސަރުކާރުގެ އިސް ބޭފުޅުންނާއި ރާއްޖޭގެ ފުންނާބުއުސް ވިޔަފާރިވެރިން ބައިވެރިވި ބައްދަލުވުމެއްގައި މި ވާހަކަތައް ތިލަވުމާއެކު، އަލައްބާރު އެ އިޝާރާތް ކުރެއްވި "އަބްދުﷲ" އަކީ ކާކުކަން ހޯދުމަށާއި މުޅި މި މަޝްރޫއުގެ މިނިވަން އޮޑިޓެއް ހެދުމަށް ގިނަ ބަޔަކު ދަނީ ގޮވާލަމުންނެވެ.
އިތުބާރު ހުރި މަސްދަރުތަކުން މައުލޫމާތު ލިބޭ ގޮތުގައި، އަލައްބާރު ރާއްޖެ ވަޑައިގެން ބޭއްވެވި ބައްދަލުވުންތަކުގެ ތެރެއިން ބައްދަލުވުމެއްގައި ރާއްޖޭގެ ވިޔަފާރިވެރިން ވަނީ ގައުމަށް ޑޮލަރުގެ ދަތިކަން އިންތިހާއަށް ކުރިމަތިވެފައިވާ ދަނޑިވަޅެއްގައި، ރާއްޖެއަށް އެއްވެސް މާލީ މަންފާއެއް ނުލިބޭ ގޮތަށް ރަސްމާލެ މަޝްރޫއު ހިންގާތީ ކަންބޮޑުވުން ފާޅުކޮށްފަ އެވެ. އެ ސުވާލުތަކަށް ރައްދު ދެއްވަމުން އަލައްބާރު ވިދާޅުވީ، އެ ކުންފުނިން އަބްދުﷲ އަށް އެތައް ފަހަރަކު ފައިސާ ދީފައިވާ ކަމަށެވެ.
އެއާއެކު، މި ފައިސާ ދެވުނީ ރަސްމާލެ މަޝްރޫއުގެ ބިން ހިއްކުމުގެ މުއާމަލާތުގެ ތެރެއިންތޯ ނުވަތަ ފަހުން ހިންގި އެހެން މުއާމަލާތްތަކެއްގެ ދަށުންތޯ ވަނީ ސުވާލު އުފެދިފަ އެވެ. ވިޔަފާރި މުއާމަލާތްތަކުގައި ބޮޑެތި އަދަދުތަކުން ނަގުދު ފައިސާ ބޭނުންކޮށްފައިވާނަމަ، ބޭންކިންގ ނިޒާމުގެ ބޭރުން އެ ފައިސާ ދައުރުކުރެވުނީ ކޮން އުސޫލަކުންތޯ ވެސް ފާހަގަކުރެވެ އެވެ.
މި މައްސަލައިގައި ސިޔާސީ ޕޮޑްކާސްޓްތަކާއި ޚަބަރުތަކުގައި ބަހުސް ހިނގަމުންދާއިރު، ސަރުކާރުގެ ތެރެއިންނާއި ރަސްމާލެ މަޝްރޫއާ އެންމެ ގާތުން މަސައްކަތްކުރައްވާ ފަރާތްތަކުގެ ތެރޭގައި ހިމެނޭ "އަބްދުﷲ" އިންނާ މެދު ގިނަ ބައެއްގެ ސަމާލުކަން ވަނީ ހުއްޓިފަ އެވެ.
ޚާއްސަކޮށް، ކޮންސްޓްރަކްޝަން އެންޑް އިންފްރާސްޓްރަކްޗަރ މިނިސްޓަރު ޑރ. އަބްދުﷲ މުއްތަލިބަކީ މި މަޝްރޫއުގެ އެއްބަސްވުންތަކުގައި ސޮއިކުރެއްވުމާއި އަމަލީ ހުރިހާ މަސައްކަތެއް ވިލަރެސް ކުރެއްވުމުގައި އެންމެ އިސް ދައުރެއް އަދާކުރައްވާ ވަޒީރެވެ. އަދި އޭނާގެ އާއިލީ ގުޅުންތަކާއި، "ބްރަދާސް" ގެ ގޮތުގައި ފާހަގަކުރެވޭ ފަރާތްތަކުގެ ދަތުރުފަތުރުގެ ތަފްސީލުތަކާ ގުޅުވައިގެން ވެސް ތަފާތު ޝައްކުތައް މިހާރު ވަނީ އުފެދިފަ އެވެ.
އެގޮތުން މިއަހަރުގެ އޭޕްރީލް 30 އިން މެއި 2 އަށް ދުބާއީއަށް ކުރެއްވި ދަތުރުތަކާއި، މެއި މަހު ސިންގަޕޫރާއި ދުބާއީއާ ދެމެދު އެކި ފަރާތްތަކުން ކޮށްފައިވާ ދަތުރުތަކުގެ އިތުރުން ޖޫން މަހުގެ ފަހުކޮޅު ބެއިޖިންގއަށް ކުރެވުނު ދަތުރުތަކަކީ މި ތުހުމަތުތަކާ ގުޅުންހުރި ކަންކަން ކަމަށް ބުނެ ސުވާލުތައް ދަނީ އުފައްދަމުންނެވެ.
މީގެ އިތުރުން، މި ފަދަ ބިޔަ މަޝްރޫއެއް ކުރިއަށްދާއިރު އިގްތިސާދީ އަދި ޓޫރިޒަމް ދާއިރާގެ އިސް ވަޒީރުންގެ ދައުރެއް ނުފެނި، ހުރިހާ ކަމެއްގައި މިނިސްޓަރު މުއްތަލިބު އެކަނި އިސްވެ އުޅުއްވާ ސަބަބާމެދު ވެސް ފާޑުކިޔުންތައް ވަނީ އަމާޒުވެފަ އެވެ. ރަސްމާލެ މަޝްރޫއަކީ ބިޔަ ވިޔަފާރިއަކާއި ޓޫރިޒަމް ހިމެނޭ މަޝްރޫއަކަށް ވާއިރު، އިގްތިސާދީ ވަޒީރު މުހައްމަދު ސައީދާއި ޓޫރިޒަމް ވަޒީރު މުހައްމަދު އަމީން މި މުއާމަލާތްތަކާ ދުރުގައި ތިއްބެވުމަކީ ޝައްކުތައް އިތުރުވާ ސަބަބެއްނުންތޯ އެވެ.
އެހެންކަމުން އަލައްބާރު ވިދާޅުވި "އަބްދުﷲ" އަކީ ކާކުކަން ސަރުކާރުން ސާފުކޮށްދީ، މި މުއާމަލާތުގެ ހަގީގަތް ރައްޔިތުންނަށް ހާމަކޮށްދިނުމަކީ ކޮންމެހެން ކުރަންޖެހޭ ކަމެއްނުންތޯ އެވެ.
