އައިޕީއެލް މުއްދަތެއް ނެތް ގޮތަށް ފަސްކޮށްފި

އިންޑިއަން ޕްރިމިއާ ލީގު (އައިޕީއެލް) މުއްދަތެއް ނެތް ގޮތަށް ފަސްކޮށްފި އެވެ.

މުއްދަތެއް ނެތް ގޮތަށް އައިޕީއެލް ފަސްކުރަން އިންޑިއާގެ ބޯޑް އޮފް ކޮންޓްރޯލް ފޯ ކްރިކެޓް (ބީސީސީއައި) އިން ނިންމީ މިހާރު ދުނިޔޭގައި ހަލުވިކަމާއިއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން އިންޑިއާގައި ލޮކްޑައުންގެ މުއްދަތު މެއި މަހު 3 ވަނަ ދުވަހާއި ހަމަޔަށް އިތުރުކުރަން އެ ގައުމުގެ ސަރުކާރުން ނިންމުމާ ގުޅިގެންނެވެ.

އައިޕީއެލް ފަށަން އެންމެ ފުރަތަމަ ތާވަލުކޮށްފައި އޮތީ މިދިޔަ މާޗު މަހުގެ 29 ވަނަ ދުވަހުއެވެ. އެކަމަކު ޓީ-ޓުވެންޓީ މި މުބާރާތް މުއްދަތެއް ނެތް ގޮތަށް ފަސްކުރަން ބުރާސްފަތި ދުވަހު ވަނީ ނިންމާފައެވެ.

ބީސީސީއައި ގެ ރައީސް ސިރޯވް ގަންގަލީ ވިދާޅުވީ ބީސީސީއައި އިން މުބާރާތް ބޭއްވުމަށް ކުރެވެން ހުރި ހުރިހާ މަސައްކަތެއް ކުރާނެ ކަމަށާއި، އެކަމަކު މިވަގުތަށް ބަލާނަމަ މުހިންމީ ކުޅުންތެރިންނާއި އާންމުންގެ ސިއްހަތު ކަމަށެވެ. އަދި މުބާރާތް ދެން ބާއްވާނެ ތާރީޚެއް ފަހުން އިއުލާނު ކުރާނެ ކަމަށްވެސް ވިދާޅުވި އެވެ.

މިއަހަރުގެ އައިޕީއެލް ފަސްކުރިއިރު، މި މުބާރާތް މީގެ ކުރިން 2009 ވަނަ އަހަރު ވަނީ ސައުތު އެފްރިކާގައި ބާއްވާފައެވެ. އޭރު މުބާރާތް ސައުތު އެފްރިކާއަށް ބަދަލުކުރީ ސަލާމަތީ ސަބަބުތަކަށްޓަކައެވެ. އަދި އޭގެ ފަހުން 2014 ވަނަ އަހަރު މި މުބާރާތުގެ އެއްބައި ޔުނައިޓެޑް އަރަބި އެމިރޭޓްސްގައިވެސް ކުރިއަށް ގެންގޮސްފައެވެ.

ކޮވިޑް-19 އާ ގުޅިގެން މުއްދަތެއް ނެތް ގޮތަށް އައިޕީއެލް ފަސްކުރިއިރު، މިހާތަނަށް އިންޑިއާއިން މި ވައިރަހަށް 12،700 އަށްވުރެ ގިނަ މީހުން ވަނީ ޕޮޒިޓިވްވެފައެވެ. އަދި މި ވައިރަސް ޖެހިގެން އެ ގައުމުން 400 އަށްވުރެ ގިނަ މީހުން ވަނީ މަރުވެފައެވެ.