ޕްރިމިއާ ލީގުގެ ތަށްޓާމެދު މެންޗެސްޓާ ސިޓީ އަށް ވާހަކަ ދެއްކެން ނެތްކަމަށް އެ ކްލަބުގެ ކޯޗު ޕެޕް ގާޑިއޯލާ ބުނެފި އެވެ.

ބީބީސީ އަށް ދިން އިންޓަވިއުއެއްގައި ގާޑިއޯލާ ބުނީ ޕޮއިންޓް ތާވަލުގެ އެއްވަނައިގައި އޮންނަ ޓީމާ 10 ޕޮއިންޓްގެ ފަރަގެއް އޮތުމުން ދެންވެސް ވިސްނަން ޖެހޭނީ ކުރިޔަށް އޮތްނަ މެޗަށް ކަމަށާއި، އެ މެޗަށް އަބަދުވެސް ފޯކަސް ކުރަން ޖެހޭ ކަމަށެވެ.

އެގޮތުން އޭނާ ބުނީ ޕްރިމިއާ ލީގުގެ ތަށްޓާ ބެހޭގޮތުން ވާހަކަދެއްކެން ސިޓީ އަށް ނެތް ކަމަށާއި، ސިޓީގެ ޓާގެޓާ ބެހޭގޮތުންވެސް ސުވާލު ނުކުރުމަށް ވަރަށް ބޮޑަށް އެދޭ ކަމަށެވެ.

މީގެއިތުރުން ގާޑިއޯލާ ބުނީ ކުރިޔަށް އޮތީ ލީގުގައި ބާންލީއާ ދެކޮޅަށް ކުޅޭ މެޗު ކަމަށާއި، އެ މެޗާމެދު ވާހަކަ ދެއްކިދާނެ ކަމަށެވެ.

ލިވަޕޫލް އަތުން 0-1 ގެ ނަތީޖާއިން ބަލިވި މެޗަށް އަލިއަޅުވާލަމުން ގާޑިއޯލާ ބުނީ އެ މެޗު ސިޓީން ފެށީ ވަރަށް ރަނގަޅަށް ކަމަށާއި، އެހެންނަމަވެސް އިދިކޮޅު ޓީމުން ލިބުނު ފުރަތަމަ ފުރުސަތުން ގޯލު ކާމިޔާބުކުރި ކަމަށެވެ.

ގާޑިއޯލާ ބުނީ މެޗު ވަރަށް ހަމަހަމަ ކަމަށާއި، ލިވަޕޫލްގެ ކައުންޓާ އެޓޭކްތައް ސިޓީން ފުރަތަމަ ހާފްގައި ދިފާއުކުރި ކަމަށާއި، އެހެންނަމަވެސް ރަނގަޅު އެޓޭކެއް ނުއުފެއްދޭކަމަށެވެ. މީގެއިތުރުން އޭނާ ބުނީ ދެވަނަ ހާފްގައި ސިޓީގެ ފަރާތުން ރަނގަޅު ކުޅުމެއް ފެނުނު ކަމަށެވެ.

ޕްރިމިއާ ލީގުގެ ޕޮއިންޓް ތާވަލަށް ބަލާއިރު، ސިޓީ އޮތީ ކުޅުނު 19 މެޗުން ލިބުނު 39 ޕޮއިންޓާއެކު ޕޮއިންޓް ތާވަލުގެ ތިންވަނައިގަ އެވެ. ދެވަނައިގައި 43 ޕޮއިންޓާއެކު ލިވަޕޫލް އޮތްއިރު، 49 ޕޮއިންޓާއެކު އެއްވަނައިގައި އޮތީ ޗެލްސީ އެވެ.