ފުރަތަމަ އެގާރައިން ފުރުސަތު ނެތްނަމަ ރެއާލް ދޫކޮށްލާފާނެ ކަމުގެ އިޝާރާތެއް އިސްކޯ ދީފި

ފުރަތަމަ އެގާރައިން ފުރުސަތު ލިބުން ދަށްވާނަ ރެއާލް މެޑްރިޑް ދޫކޮށްލާނެކަމުގެ އިޝާރާތެއް އެ ކްލަބުގެ މިޑްފިލްޑަރު އިސްކޯ ބުނެފި އެވެ.

ބެއިން ސްޕޯޓްސް އަށް ދިން އިންޓަވިއުއެއްގައި އިސްކޯ ބުނީ އޭނާ ހުރީ ވަރަށް ހަމަޖެހިގެން ކަމަށާއި، އެހެންނަމަވެސް އަބަދުވެސް އޭނާ ކަންބޮޑުވަނީ ކުޅެން ލިބޭ ވަގުތު ކަމަށެވެ. އެގޮތުން ކުޅެން ލިބޭ ވަގުތަކީ ވަރަށް މުހިންމު އެއްޗެއްކަން އޭނާ ވަނީ ފާހަގަކޮށްފައެވެ.

ކުޅުންތެރިޔެއްގެ ކެރިޔަރަކީ ވަރަށް ކުރު އެއްޗެއްކަން ފާހަގަކުރަމުން އިސްކޯ ބުނީ އޭނާ އަދިވެސް ވިސްނަނީ ރެއާލްގައި ވީ އެންމެ ދިގު މުއްދަތެއް ހޭދަކުރުން ކަމަށާއި، ކްލަބުގައި ހުރީވެސް ވަރަށް އުފަލުން ކަމަށެވެ.

އެހެންނަމަވެސް އެއްބަސްވުމާ ބެހޭގޮތުން އޭނާ ބުނީ އަދި ގޮތެއް ނުނިންމާ ކަމަށާއި، ގޮތެއް ނިންމާނީ ސީޒަންގެ ފަހުވަގުތުކަމަށެވެ. އިސްކޯ ރެއާލްއާއެކު ހަދާފައިވާ އެއްބަސްވުން މި ސީޒަނަށްފަހު ހަމަވާނެއެވެ.

ރެއާލްގެ ކޯޗުކަމާ ޒައިނުއްދީން ޒިދާން ހަވާލުވި ފަހުން އިސްކޯ އަށް ފުރަތަމަ 11 އިން ޖާގަ ލިބުން ވަނީ ދަތިވެފަ އެވެ. އެގޮތުން އެކަމާ އިސްކޯ ހިތްހަމަނުޖެހިފައިވާ ކަމަށް ވެސް ރިޕޯޓްތައް ބުނެއެވެ.

ވެލެންސިއާ އިން ކެރިޔަރު ފެށި އިސްކޯ ވަނީ މަލާގާ އަށް ވެސް ކުޅެފަ އެވެ. އެގޮތުން އޭނާ ވަނީ މަލާގާއާ އެކު ހޭދަކުރި ދެ ސީޒަނުގައި އެޓީމަށް ކުޅުނު 82 މެޗުގައި 17 ލަނޑު ކާމިޔާބުކޮށްފަ އެވެ. މަލާގާ ދޫކޮށްލުމަށް ފަހު އިސްކޯ ރެއާލްއާ ގުޅުނީ 2013 ވަނަ އަހަރެވެ. އެގޮތުން އޭނާ ވަނީ އެ ކްލަބުގައި މިވީތަނަށް ހޭދަކުރި ހަތަރު ސީޒަނުގައި ކުޅުނު 164 މެޗުގައި 24 ލަނޑު ކާމިޔާބުކޮށް، ޔުއެފާ ޗެމްޕިއަންސް ލީގު ދެފަހަރު، ފީފާ ކްލަބް ވޯލްޑްކަޕް، ޔުއެފާ ސުޕާ ލީގު ދެފަހަރު އަދި ކޮޕާޑެލްރޭ ކާމިޔާބުކޮށްފަ އެވެ. ކްލަބް ލެވެލްގައި ގިނަ ކާމިޔާބީތައް ހޯދާފައިވާ އިސްކޯ ވަނީ ސްޕެއިންގެ 21 އަހަރުން ދަށުގެ ޓީމާއެކު ޔޫރޯ ކާމިޔާބުކޮށްފަ އެވެ. މީގެ އިތުރުން އޭނާ ވަނީ 17 އަހަރުން ދަށުގެ ފީފާ ވޯލްޑްކަޕްގެ ތިންވަނަ ސްޕެއިންއާ އެކު ކާމިޔާބުކޮށްފަ އެވެ.