ހަމޭސް ގަތުމުގެ ރޭހުގައި އެވެޓަން އިންވެސް ބައިވެރިވެއްޖެ

ސްޕެއިންގެ ރެއާލް މެޑްރިޑަށް ކުޅެމުން އަންނަ ކޮލަމްބިއާގެ މިޑްފިލްޑަރު ހަމޭސް ރޮޑްރިގޭޒް ގަތުމުގެ ރޭހުގައި އެވެޓަންއިން ބައިވެރިވެއްޖެ ކަމަށް މީޑިއާ ރިޕޯޓުތައް ބުނެފިއެވެ.

މީޑިއާ ރިޕޯޓުތައް ބުނާ ގޮތުން މި ސީޒަން ނިމުމުން ރެއާލް މެޑްރިޑުން ހަމޭސް ވިއްކާލާނެއެވެ. ސަބަބަކީ ރެއާލްގެ ކޯޗު ޒިނެދިން ޒިދާންގެ ޕްލޭނުގައި ހަމޭސް ނުހިމެނޭތީއެވެ. ހަމޭސް ގަތުމަށް ޔޫރަޕްގެ ބޮޑެތި ކްލަބުތަކުން އަންނަނީ ފާރަލަމުންނެވެ. އޭގެތެރޭގައި މެންޗެސްޓާ ޔުނައިޓެޑާއި ޔުވެންޓަސްވެސް ހިމެނެއެވެ.

އެވެޓަންއިން ހަމޭސް އަށް ބިޑްކުރަމަށް ތައްޔާރުވަމުން އަންނައިރު، އެ ކްލަބުން ހަމޭސް ހޯދުމަށް 40 މިލިއަން ޕައުންޑް ހޭދަކުރުމަށް އޮތީ ތައްޔާރަށެވެ. އެކަމަކު ހަމޭސް ހޯދުމުގައި އެވެޓަންއަށް ދިމާވާނެ އެންމެ ބޮޑު މައްސަލައަކީ ކޮރޯނާވައިރަސް (ކޮވިޑް-19) ގެ ސަބަބުން ކްލަބަށް މާލީ ދަތިތަކާ ކުރިމަތިލާން ޖެހިފައިވުމެވެ.

އެކަމަކު ހަމޭސް ގަތުމަށް އެވެޓަންގެ ކޯޗު އެންޗެލޮޓީ ވަނީ އެ ކްލަބުގައި އެދިފައެވެ. އެންޗެލޮޓީ ވަނީ މީގެ ކުރިން ރެއާލްއަށް ހަމެސް ގެންދިޔުމުގައި ބޮޑު ދައުރެއް އަދާކޮށްފައެވެ.

މި ސީޒަނުގެ ކުރީކޮޅު ހަމޭސް ކުޅެފައިވާއިރު އޭނާ އަށް ސީޒަންގެ މެދުތެރެއިން އަނިޔާވެ ދެން އިތުރަށް މި ސީޒަނުގައި ކުޅެވޭނެ ކަމާއި މެދު ޝައްކެވެ.

މީގެ ކުރިން ޕޯޓޯ އަދި ބެންފީކާ އަށްވެސް ކުޅެފައިވާ ހަމޭސް ވަނީ އޭނާ ރެއާލްގައި ހޭދަކުރި ތިން ސީޒަނުގައި ކުޅުނު 111 މެޗުގައި 36 ލަނޑު ކާމިޔާބު ކޮށްފައެވެ. އޭނާ ވަނީ އެޓީމާއެކު ސްޕެނިޝް ލީގާއި، ޔުއެފާ ޗެމްޕިއަންސް ލީގު ދެ ފަހަރު، ޔުއެފާ ސުޕާ ކަޕް ދެ ފަހަރު އަދި ފީފާ ކްލަބު ވޯލްޑް ކަޕް ދެ ފަހަރު ކާމިޔާބު ކޮށްފައެވެ.

އޭގެ ފަހުން ލޯނު އެއްބަސްވުމެއްގެ ދަށުން ބަޔާން މިއުނިކަށް ކުޅުނު މުއްދަތުގައި ހަމޭސް ވަނީ އެޓީމަށް ކުޅެދިން 67 މެޗުގައި 15 ލަނޑު ކާމިޔާބު ކޮށްފައެވެ. އަދި ވަނީ ނިމިގެން ދިޔަ ސީޒަނުގައި އެ ޓީމާއެކު ޖަރުމަން ލީގުވެސް ކާމިޔާބު ކޮށްފައެވެ.

ކޮލަމްބިއާގެ ގައުމީ ޓީމަށް ކުޅުނު 72 މެޗުގައި 22 ލަނޑު ކާމިޔާބު ކޮށްފައިވާ، އުމުރުން 27 އަހަރުގެ ހަމޭސް ވަނީ އެޓީމާއެކު 2016 ވަނަ އަހަރު ބޭއްވުނު ކޮޕާ އެމެރިކާގެ ތިންވަނަ ހޯދާފައެވެ.