ޖެނުއަރީ ޓްރާންސްފާގައި ރެއާލް މެޑްރިޑް ދޫކޮށްނުލާނެ ކަމަށް އެ ކްލަބުގެ ކޮލަމްބިއާ މިޑްފިލްޑަރު ހަމޭސް ރޮޑްރިގޭޒް ބުނެފި އެވެ.
ބެއިން ސްޕޯޓްސް އަށް ދިން އިންޓަވިއުއެއްގައި ހަމޭސް ބުނީ ކޮންމެ ކުޅުންތެރިޔެއް ވެސް އެ ކުޅުންތެރިޔެއްގެ ޓީމަށް ކުޅެން ބޭނުންވާ ކަމަށާއި، ދަތިކަންތަކާ ވެސް ދިމާވާ ކަމަށެވެ.
އެހެން ނަމަވެސް ހަމޭސް ބުނީ އާ އަހަރާއެކު އޭނާ ބޭނުންވާ އިތުރު ކަންތައްތަކެއް ވެސް އެބަހުރި ކަމަށެވެ. އެގޮތުން އޭނާ ރެއާލް ދޫކޮށްނުލާން ނިންމާފައިވާ ކަމަށާއި، އެހެން ކްލަބަކަށް ޖެނުއަރީ ޓްރާންސްފާގައި ބަދަލުނުވާނެ ކަމަށެވެ.
ޕެރިސް ސެއިންޓް ޖާމަން (ޕީއެސްޖީ) އަދި ޗެލްސީންވެސް ހޯދުމަށް މަސައްކަތްކުރަމުން އަންނަ ހަމޭސް ހޯދުމަށް އިޓަލީގެ ޔުވަންޓަސް އިން ވެސް އަންނަނީ މަސައްކަތްކުރަމުންނެވެ.
މިފަހަރުގެ ސީޒަނުގެ ކުރީކޮޅު ރެއާލްގެ ފުރަތަމަ 11 ގައި ހިމެނިގެން ހަމޭސް ކުޅުނު ކަމުގައިވީ ނަމަވެސް ފަހަކައް އައިސް އޭނާއަށް ވަނީ ރެއާލްގެ ފުރަތަމަ 11 އިން ޖާގަ ލިބޭ ގޮތް ނުވެފައެވެ.
ރެއާލް މެޑްރިޑާއި 2014 ވަނަ އަހަރު ގުޅުނު ހަމޭސް ރޮޑްރިގޭޒް ވަނީ މިހާތަނަށް ރެއާލް މެޑްރިޑަށް 94 މެޗު ކުޅެދީ 27 ގޯލް ކާމިޔާބު ކޮށްދީފައެވެ. މީގެއިތުރުން އޭނާ ވަނީ ރެއާލްއާއެކު ޔުއެފާ ޗެމްޕިއަންސް ލީގު، ޔުއެފާ ސުޕާ ކަޕް ދެފަހަރު އަދި ފީފާ ކްލަބް ވޯލްޑްކަޕް އެއްފަހަރު ކާމިޔާބުކޮށްފައެވެ.
