ރެއާލް މެޑްރިޑަށް ކުޅެމުން އަންނަ ހަމޭސް ރޮޑްރިގޭޒް ހޯދުމަށް ބަޔާން މިއުނިކުންވެސް މަސައްކަތް ފަށައިފި އެވެ.

ސްޕެއިންގެ މަޝްހޫރު ކުޅިވަރު ނޫހެއް ކަމަށްވާ މާސާ އިން ބުނީ ރެއާލްގައި ދިގު މުއްދެއް ހޭދަކުރަން ބޭނުންވާކަމަށް އިއުލާންކޮށްފައިވާ ހަމޭސް ހޯދުމަށް ބަޔާން އިން ބޭނުންވާ ކަމަށާއި، އެކަމަށް ރެއާލްގެ ކުރީގެ ކޯޗު އަދި ބަޔާންގެ ކޯޗު ކާލޯ އެންޗޮލޮޓީ މަސައްކަތްކުރަމުން އަންނަ ކަމަށެވެ.

ޕެރިސް ސެއިންޓް ޖާމަން (ޕީއެސްޖީ) އަދި ޗެލްސީންވެސް ހޯދުމަށް މަސައްކަތްކުރަމުން އަންނަ ހަމޭސް ހޯދުމަށް އިޓަލީގެ ޔުވަންޓަސް އިން ވެސް އަންނަނީ މަސައްކަތްކުރަމުންނެވެ.

މި ސީޒަނަށްފަހު އެހެން ކުލަބަކަށް ހަމޭސް ބަދަލުވާނެ ކަމަށް ރިޕޯޓްތައް ބުނަމުން އަންނައިރު، ދާދި ފަހުން އޭނާ ބުނީ ކޮންމެ ދުވަހަކު ވެސް ރެއާލްއާ އެކު ތަމްރީން ހަދަނީ ކުޅުމުގެ ފުރުސަތު ލިބޭނެކަމަށް ކަމަށާއި، ރަނގަޅު ކަންތަކާ ރަނގަޅު ނޫން ކަންތައް ވެސް ދިމާވާ ކަމަށެވެ. އެހެންނަމަވެސް ބޭނުމީ ކުލަބުގައި މަޑުކުރަން ކަމަށެވެ.

ހަމޭސް ބުނީ ކުރިއާ އަޅާ ބަލާއިރު، ކުޅެން ލިބޭ ފުރުސަތު ވެސް އިތުރުވަމުން އަންނަ ކަމަށެވެ. ހަމޭސް ބުނީ މަޑުމަޑުން ހުރިހާ ކަމެއް ވެސް ރަނގަޅުވަމުން އަންނަ ކަމަށާއި، ތަފާތު ފެނިގެންދާނެ ކަމަށެވެ.

މިފަހަރުގެ ސީޒަނުގެ ކުރީކޮޅު ރެއާލްގެ ފުރަތަމަ 11 ގައި ހިމެނިގެން ހަމޭސް ކުޅުނު ކަމުގައިވީ ނަމަވެސް ފަހަކައް އައިސް އޭނާއަށް ވަނީ ރެއާލްގެ ފުރަތަމަ 11 އިން ޖާގަ ލިބޭ ގޮތް ނުވެފައެވެ.

ރެއާލް މެޑްރިޑާއި 2014 ވަނަ އަހަރު ގުޅުނު ހަމޭސް ރޮޑްރިގޭޒް ވަނީ މިހާތަނަށް ރެއާލް މެޑްރިޑަށް 101 މެޗު ކުޅެދީ 30 ލަނޑު ކާމިޔާބު ކޮށްދީފައެވެ. މީގެއިތުރުން އޭނާ ވަނީ ރެއާލްއާއެކު ޔުއެފާ ޗެމްޕިއަންސް ލީގު، ޔުއެފާ ސުޕާ ކަޕް ދެފަހަރު އަދި ފީފާ ކްލަބް ވޯލްޑްކަޕް އެއްފަހަރު ކާމިޔާބުކޮށްފައެވެ