އިނގިރޭސި ވިލާތުގެ ބޮޑު ވަޒިރު ބޯރިސް ޖޯންސަން އައިސީޔު އިން ދޫކޮށްލައިފި އެވެ.

ސީއެންއެން އިން ރިޕޯޓުކޮށްފައިވާ ގޮތުގައި އައިސީޔޫއިން ދޫކޮށްލި ނަމަވެސް، ބޯރިސް ގެންދަވަނީ ހޮސްޕިޓަލުގައި ކޮވިޑް-19 އަށް ފަރުވާ ހޯއްދަވަމުންނެވެ. އެމަނިކުފާނުގެ ހާލުކޮޅު އަންނަނީ ރަނގަޅުވަމުންނެވެ.

އިނގިރޭސި ބޮޑުވަޒީރު ބޮރިސް ޖޯންސަން ކޮވިޑް-19 އަށް ޕޮޒިޓިވްވި މާރޗްމަހުގެ 26 ވަނަ ދުވަހުއެވެ. އަދި ޖެހިގެން އައި ދުވަހު އެކަން އަމިއްލަފުޅަށް އިޢުލާނުކުރެއްވުމަށް ފަހު ޑައުނިންގް ސްޓްރީޓްގެ އެޕާޓްމެންޓެއްގައި އަމިއްލަފުޅަށް އެކަހެރިވެވަޑައިގެން ފަރުވާ ހޯއްދަވަން ފެއްޓެވި އެވެ.

އެ މަނިކުފާނު އައިސީޔޫގައި އެޑްމިޓް ކުރެވުނީ ނޭވާލުމުގެ މައްސަލައެއް ކުރިމަތިވުމުންނެވެ. އަދި އައިސީޔޫގައި ބާއްވައިގެން ވެންޓިލޭޓަރު ނުގުޅި ނަމަވެސް، އޮކްސިޖަން ޓްރީޓްމަންޓެއް ނެންގެވި އެވެ. އެ މަނިކުފާނުގެ ހާލަތު ގޯސްވަމުން އަންނަކަން ފާހަގަކުރެވިފައިވަނީ، ވައިރަސް ޖެހުނުތާ 10 ދުވަސްވުމުން އާދައިގެ މަތިން ކުރައްވަން ޖެހިވަޑައިގަންނަނާ ޓެސްޓުތަކެއް ކުރައްވަން މިދިޔަ އާދީއްތަ ދުވަހުގެ ވަގުތެއްގައި މެދުތެރޭ ލަންޑަންގައި ހުންނަ ސެއިންޓް ތޯމަސް ހޮސްޕިޓަލަށް ވަޑައިގެންނެވުމުންނެވެ.

ބޯރިސްގެ އިތުރުން، އިނގިރޭސިވިލާތުގެ ސަރުކާރުގެ އިސް އޮފިޝަލުންތަކަށް ވަނީ މި ބަލި ޖެހިފައެވެ. އޭގެ ތެރޭގައި، ހެލްތު ސެކްރެޓަރީ މެޓް ހެންކޮކް ވެސް ހިމެނެއެވެ. ވިލާތުގެ ބައެއް ގައުމުތަކެކޭ އެއް ފަދައިން، އިނގިރޭސިވިލާތުގައި ވެސް އަންނަނީ ހަލުވި ކަމާއެކު ކޮވިޑް-19 ފެތުރެމުންނެވެ.