ކޮވިޑް-19 އަށް ޕޮޒިޓިވްވެގެން މިވަގުތު ހޮސްޕިޓަލްގައި އޮންނެވި އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން ގެ ހާލުކޮޅު ގޯސްވުމުގެ ސަބަބުން އައިސީޔޫއަށް ބަދަލުކޮށްފި އެވެ.

އައިސީޔޫއަށް ބަދަލުކޮށްފައިވަނީ އިތުރު ފަރުވާ ހޯއްދެވުމަށްކަމަށް އެމަނިކުފާނުގެ މެޑިކަލް ޓީމުން ވަނީ ބުނެފަ އެވެ.

ބޮރިސް ޖޯންސަން ކޮވިޑް-19 އަށް ޕޮޒިޓިވްވީ މާރޗްމަހުގެ 26 ވަނަ ދުވަހުއެވެ. އެމަނިކުފާނު އަމިއްލަފުޅަށް އެކަން އިޢުލާނުކުރެއްވީ މާރޗްމަހުގެ 26 ވަނަ ދުވަހުއެވެ. ދިހަ ދުވަސްވަންދެން ކޮވިޑް-19 އަށް ފަރުވާ ހޯއްދަވަމުން ގެންދަވާ އުމުރުން 55 އަހަރުފުޅުގެ ބޮރިސް މެދުތެރޭ ލަންޑަންގެ ސެން ތޯމަސް ހޮސްޕިޓަލުގައި އާދީއްތަ ދުވަހު އެޑްމިޓްކުރެއްވީ އާދައިގެ އަލާމަތްތައް ހުރެގެންކަމަށާއި، އަދި މިހާރު އޮކްސިޖެން ފަރުވާ ދެމުންގެންދާކަމަށް ތަރުޖަމާނު ވިދާޅުވިއެެވެ. އެހެންނަމަވެސް މިހާރު އޭނާވަނީ، އައިސީޔޫއަށް ބަދަލުކޮށްފައެެވެ.

މީގެ ކުރިން ބޮރިސް ޖޯންސަން ހުންނެވީ ޑައުނިންގް ސްޓްރީޓްގައި އެކަހެރިވެވަޑައިގެންނެވެ. މިހާރު ސެން ތޯމަސް ހޮސްޕިޓަލުގައި ފަރުވާ ހޯއްދަވަމުން ގެންދެވިނަމަވެސް، ޞިއްޙީ ޙާލަތާއި ބެހޭ މާ ބޮޑު ތަފުޞީލެއް އަދި ލިބޭގޮތެއް ނުވެއެވެ.