މިނިވަން ޗެމްޕިއަންޝިޕް: ސެމީގެ ފުރަތަމަ ޖާގަ ކުޅުދުއްފުއްޓަށް

ކުމުންދޫ ކަޓުވާލުމަށް ފަހު މިނިވަން ޗެމްޕިއަންޝިޕްގެ ހދ. އަތޮޅު ބުރުގެ ގުރޫޕު އެއްވަނަ ޓީމުގެ ގޮތުގައި ކުޅުދުއްފުށި ސެމީ ފައިނަލަށް ދަތުރުކޮށްފި އެވެ.

ކުޅުދުއްފުށި ފުޓްބޯޅަ ދަނޑުގައި ބުދަ ދުވަހު ކުޅުނު މެޗު އެޓީމުން ކާމިޔާބުކުރީ ފަސޭހަ ކަމާއެކު 6-0 ގެ ނަތީޖާއަކުންނެވެ.

ކުޅުދުއްފުށީގެ ފަރާތުން މޮޅު ކުޅުމެއް ފެނިގެންދިޔަ މި މެޗު ފަށައިގެން ފުރަތަމަ މިނެޓްގައި އެޓީމުން ވަނީ ލީޑު ނަގާފަ އެވެ. މިގޯލް ކާމިޔާބު ކޮށްދިނީ އަންވަރު އާދަމެވެ.

އަންވަރު ވަނީ 38 ވަނަ މިނެޓްގައި ވެސް ގޯލެއް ޖަހައި އެޓީމަށް ލީޑު ފުޅާކޮށްދީފަ އެވެ. އަދި ހާފު ނިމުމުގެ ކުރިން މެޗުގެ ތިންވަނަ ގޯލް ޖަހައިދިނީ އަލީ ޝިޔާމް (ނަލަވާ) އެވެ.

ފަހު ހާފުގައި ކުޅުދުއްފުއްޓަށް ގޯލް ޖަހައިދިނީ މުހައްމަދު ޝާފީއުއާ ފަތުހުﷲ އާދަމް އަދި ކެޕްޓަން އިބްރާހީމް ހަސަނެވެ.

މެޗުގެ މޮޅު ކުޅުންތެރިއަކަށް ހޮވުނީ ކުޅުދުއްފުއްޓަށް ދެ ގޯލު ކާމިޔާބުކޮށްދިން އަންވަރު އާދަމެވެ.

ގުރޫޕު އެކެއްގެ އެއްވަނަ ޓީމުގެ ގޮތުގައި ކުޅުދުއްފުށި ސެމީއަށް ދަތުރު ކުރި އިރު މި މެޗުން ބަލިވި ކުމުންދޫ ވަނީ ގުރޫޕުގެ ފުލަށް ވެއްޓި މުބާރާތުން ކަޓާފަ އެވެ. ގުރޫޕުގެ ދެވަނަ ހޯދި ކުރިނބީއަށް ސެމީގެ ޖާގައެއް ކަށަވަރު ވާނީ 31 ވަނަ ދުވަހު ކުޅޭ ގުރޫޕު ތިނެއްގެ ފަހު މެޗަށް ފަހު އެވެ. ހދ. އަތޮޅު ބުރު ރޭވިފައިވާ ގޮތުން ސެމީއަށް ދަތުރު ކުރާނީ ތިން ގުރޫޕުން އެއްވަނަ ހޯދާ ތިން ޓީމުގެ އިތުރުން އެންމެ ރަނގަޅު ނަތީޖާއެއް ހޯދާ ދެވަނަ ޓީމެވެ.

މިނިވަން ޗެމްޕިއަންޝިޕްގައި ބުރާސްފަތި ދުވަހު ކުޅޭނީ ފިއްލަދޫ އާއި މާރަންދޫގެ އިތުރުން ނޮޅިވަރަމާއި ނޮޅިވަރަމްފަރެވެ. އަދި ނ. އަތޮޅު ބުރުގައި ކުޑަފަރިއާ ޅޮހި ބައްދަލު ކުރާ މެޗު ވެސް މާދަމާ ކެނދިކުޅުދޫ ދަނޑުގައި ކުޅޭނެ އެވެ.