ކޮވިޑް-19 ގެ އަލާމާތްތައް ފެނިގެން ރާއްޖެއިން ކަރަންޓީން ކުރާ ހުރިހާ ފަރާތްތަކެއް ޓެސްޓް ކުރުމަށް ނިންމާފައިވާކަމަށް ސަރުކާރުން ހާމަކޮށްފިއެވެ.

އާދިއްތަ ދުވަހުގެ ހަވީރު ދަރުބާރުގޭގައި ގާއިމުކޮށްފައިވާ ނެޝަނަލް އެމެޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި އެތެރެހަށީގެ ބަލިތަކުގެ ޚާއްޞަ ޑޮކްޓަރ، ޑރ ޢަލީ ލަޠީފު ވިދާޅުވީ ކަރަންޓިންކުރާ ހުރިހާ ފަރާތްތައް 14 ދުވަހުގެ މުއްދަތެއް ހަމަކޮށް ދޫކުރާއިރު، ބަލި ހުރިތޯ ދެނެގަތުމަށް ޓެސްޓު ހެދުމަށް ނިންމާފައިވާކަމަށެވެ. ކަރަންޓީންކުރެވޭ ފަރާތްތައް ބެހިފައިވަނީ 2 ބަޔަކަށް ކަން ހާމަކޮށް ޑރ ވިދާޅުވީ، ރާއްޖެއިން ބޭރުން ރާއްޖެ އަންނަ ފަރާތްތައް ކަރަންޓީން ފެސިލިޓީއަށް ގެންގޮސް މުއްދަތު ހަމަކޮށް ނެރޭއިރު، އެގްޒިޓް ސްކްރީނިންގް އިތުރުން ޓެސްޓް ހެދުމަށްވެސް މިހާރު ނިންމާފައިވާކަމަށެވެ.

ކަރަންޓީން ކޮށްފައިވާ 2 އިޓަލީ ފަތުރުވެރިއެއް އެނބުރި ޤައުމަށް ފުރުވާލި ފަހުން އެ ދެމީހުންނަކީ ކޮވިޑް-19 އަށް ޕޮޒިޓިވް ވެފައިވާ މީހުންކަން ސަރުކާރުން ހާމަކުރުމާއެކު ގިނަބަޔަކު އަންނަނީ ޓެސްޓުގެ ނަތީޖާ ނުލިބެނީސް އެ ދެ ފަރާތް ފުރުވާލި ސަބަބާއި މެދު ސުވާލުއުފައްދާފައެވެ. ސަރުކާރުން ބޭއްވި ނޫސްވެރިންގެ ބައްދަލުވުމުގައި މިކަމާއި ގުޅިގެން ބުނެފައިވަނީ، އެ ދެމީހުންނަކީ ބަލީގެ އަލާމާތެއް ފެނިފައި ނެތް ބައެއްކަމަށާއި އޭރުގައި ޢަމަލުކުރަމުން އައި އުޞޫލުގެ ދަށުން ސާމްޕަލް ނަގަނީ ހަމައެކަނި ބަލީގެ ޢަލާމާތްތައް ފެންނަ ފަރާތުގެ އެކަނި ކަމަށެވެ.

ނަމަވެސް ޓެސްޓްކުރާ އިތުރު ކިޓުތަކެއް ލިބުމާއި އެކު ދެން ޢަމަލުކުރަމުންދާނީ މި އުޞޫލަށްކަމަށް ނޫސްވެރިންގެ ބައްދަލުވުމުގައި ވަނީ އިޢުލާނުކޮށްފައެވެ.