ކޮވިޑް-19: ސްޕެއިންގެ ބޮޑުވަޒީރުގެ އަނބިކަނބަލުން ވައިރަސް އަށް ޕޮޒިޓިވް ވެއްޖެ
އެ ގައުމުގައި ވަނީ ކުއްލި ނުރައްކަލުގެ ހާލަތު އިއުލާންކޮށްފައި
ސްޕެއިންގެ ބޮޑުވަޒީރު، ޕެޑްރޯ ސަންޗޭޒް އަދި އަނބިކަބަލުން ބެގޯނާ ގޯމެޒް
ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 އަށް ސްޕެއިންގެ ބޮޑުވަޒީރުގެ އަނބިކަނބަލުން ޕޮޒިޓިވްވެއްޖެއެވެ.
ބައިނަލްއަގްވާމީ މީޑިއާތަކުން ރިޕޯޓުކުރާގޮތުގައި ސްޕެއިންގެ ބޮޑު ވަޒީރު ޕެޑްރޯ ސަންޗޭޒް ގެ އަނބިކަނބަލުން ބެގޯނާ ގޯމެޒް ބައްޔަށް ޕޮޒިޓިވް ވެފައިވާކަން އެ ގައުމުގެ ސަރުކާރުން ނެރުނު ބަޔާނެއްގައި ވަނީ ކަށަވަރުކޮށްދީފައެވެ. ސަރުކާރުން ނެރުނު ބަޔާނުގައި ބުނެފައިވަނީ ބެގޯނާ ގޯމެޒްގެ ހާލުކޮޅު ރަނގަޅުކަމަށާއި ދެ ބޭފުޅުންވެސް ތިއްބެވީ ރަސްމީ ގެކޮޅު، މޮންކޯލާ ޕެލެސްގައެވެ.
މީޑިއާތަކުގައި ރިޕޯޓުކުރާގޮތުން، ބެގޯނާ ގޯމެޒް ވަނީ ބައިނަލްއަގްވާމީ އަންހެނުންގެ ދުވަހުގެ ހާއްސަ ހަރަކާތްތަކުގައި ބައިވެރިވެޑައިގެންފައެވެ. މިދިޔަ ހަފްތާ ތެރޭގައި ކެބިނެޓް 2 ވަޒީރަކު ބައްޔަށް ޕޮޒިޓިވް ވެފައިވާކަމަށްވެސް މީޑިއާތަކުން ވަނީ ރިޕޯޓުކޮށްފައެވެ.
މިދިޔަ ހޮނިހިރު ދުވަހު ސްޕެއިންއިން ވަނީ ބަލި ފެތުރިޔަނުދީ ކޮންޓްރޯލްކުރުމުގެ ބޭނުމުގައި ކުއްލި ނުރައްކަލުގެ ހާލަތު އިއުލާންކޮށްފައެވެ. މިއާއެކު އާންމުންނަށް ހަމައެކަނި ބޭރަށް ދިޔުމަށް ހުއްދަ އޮންނަނީ، ކާބޯތަކެތި ގަތުމަށާއި ބޭސްގަތުމުގެ އިތުރުން ވަޒިފާއަށާއި ޑޮކްޓަރަށް ދެއްކުމަށް އެކަންޏެވެ.
