އަންހެނަކަށް ހަމަލާ ދިން ކަމުގެ ތުހުމަތު ކުރެވިފައި ވަނިކޮށް މުގާބޭގެ އަނބިކަނބަލުން އެނބުރި ގައުމަށް!
އެކަމާބެހޭގޮތުން ގްރޭސް އަދި މިހާތަނަށް އެއްޗެއް ވިދާޅެއް ނުވޭ
މޮޑެލްއެއް ދަނީ ގްރޭސް މުގާބޭ އޭނާގެ މޫނުގައި އެކްސްޓެންޝަން ކޯޑަކުން ޖެހިކަމަށް ތުހުމަތުކުރަމުން
ދެކުނު އެފްރިކާގެ ވެރިރަށް ޖޮހަނެސްބާގްގައި މީހަކަށް އަނިޔާއެއް ދެއްވި ކަމަށް ތުހުމަތުކުރެވިފައި ވަނިކޮށް ޒިމްބާބްވޭގެ ފަސްޓްލޭޑީ ގްރޭސް މުގާބޭ އެނބުރި ގައުމަށް ވަޑައިގެންފި ކަމަށް އޮފިޝަލުން ވިދާޅުވެއްޖެއެވެ.
ފުލުހުންނަށް ރިޕޯޓްކުރައްވާނެ ކަމަށް ގްރޭސް މުގާބޭ ވިދާޅުވި ނަމަވެސް ރިޕޯޓް ނުކުރެއްވި ސަބަބެއް ސާފެއް ނުވެއެވެ.
އާދީއްތަ ދުވަހު ހަވީރު ހޮޓެލްގައި ހިނގި ހިތްހަމަ ނުޖެހުމެއްގައި ދެކުނު އެފްރިކާގެ އުމުރުން 20 އަހަރުގެ އަންހެނަކު ވަނީ ގެރޭސް މުގާބޭ އޭނާގެ މޫނުގައި އެކްސްޓެންޝަން ކޯޑަކުން ޖެހި ކަމަށް ތުހުމަތުކޮށްފައެވެ.
އެކަމާބެހޭ ގޮތުން ގްރޭސް އަދި މިހާތަނަށް އެއްޗެއް ވިދާޅެއް ނުވެއެވެ.
ޒިމްބާބުވޭ ސަރުކާރުގެ އޮފިޝަލުން ވަނީ ރައީސް ރޮބަރޓް މުގާބޭގެ އަނބިކަނބަލުން ގްރޭސް ގައުމަށް އެނބުރި ވަޑައިގެންފައިވާކަން ކަށަވަރުކޮށްދެއްވާފައެވެ.
"އާދެ އެކަމަނާ އެނބުރި ގައުމަށް ވަޑައިގެންފި. އަޅުގަނޑަކަށް ނޭނގެ ތި ޖެހިކަމުގެ މައްސަލައެއް އައިސްގެން ތިއުޅެނީ ކޮންތާކުން ކަމެއް،" އިސް އޮފިޝަލަކު ވިދާޅުވި ކަމަށް ރޮއިޓާސް އިން ބުނެފައި ވެއެވެ.
ދެކުނު އެފްރިކާގެ ފުލުހުން އޭގެ ކުރިން ބުނެފައި ވަނީ އެ ކަމަނާ އަމިއްލަފުޅަށް ހާޒިރުވުމަށް ގްރޭސްގެ ވަކީލުންނާ މަޝްވަރާކުރަމުންދާ ކަމަށެވެ.
އެކަމަނާ ފުލުހަށް ހާޒިރުވެ ވަޑައިގެންފައި ނުވާއިރު ފުލުހުންބުނީ އެކަމަނާ އަމިއްލަފުޅަށް ފުލުހަށް ހާޒިރުވެ ވަޑައިގަތުމަށް އެއްބަސްވެ ވަޑައިގެންނެވި ކަމަށާއި ނަމަވެސް އެކަން ކުރެވޭ ގޮތް ނުވީ ކަމަށެވެ.
މޮޑެލްއެއް ކަމަށްވާ ގެބްރިއެއްލާ އެންޖެލްސް ވަނީ އުމުރުފުޅުން 52 އަހަރުގެ ގްރޭސް މުގާބޭގެ ފިރިހެން ދަރިފުޅާއެކު ހޮޓަލުގެ ކޮޓަރިއެއްގައި ހުއްޓައި ފެނުމުން އޭނާގެ ގައިގައި ޖެހިކަމަށް ތުހުމަތުކޮށްފައެވެ.
