އިންޑިއާ އިން ޒިކާ ވައިރަސް ފެނިއްޖެ

އިންޑިއާ އިން ޒިކާ ވައިރަސް ފެނިއްޖެ ކަމަށާއި އެގައުމުން ޒިކާ ވައިރަސްގެ ތިންކޭސް އެއް ރިޕޯޓުކޮށްފައިވާ ކަމަށް މީޑިއާ ރިޕޯޓުތައް ބުނެފިއެވެ.

އިންޑިއާ އިން ޒިކާ ވައިރަސް ފެނިފައިވާ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ވެސް ހާމަކޮށްފައިވާ އިރު މިއީ ޒިކާ ވައިރަސްގެ ކޭސްތަކެއް އިންޑިއާއިން ފެނުނު ކަމަށް ރިޕޯޓް ކުރި ފުރަތަމަ ފަހަރެވެ.

އިންޑިއާ އިން ޒިކާ ވައިރަސް ތިން މީހަކަށް ޖެހިފައިވާ ކަމަށް ރިޕޯޓުކޮށްފައިވާއިރު، އޭގެތޭރޭގައި މާބަނޑު ދެ އަންހެން ހިމެނެއެވެ.

އިންޑިއާ އިން ޒިކާ ވައިރަސް ފެނުނު އެންމެން މިހާތަނަށް ފެނިފައި ވަނީ ހުޅަނގުގެ ސްޓޭޓެއް ކަމަށްވާ ގުޖުރާތުން ނެވެ. އާދިއްތަ ދުވަހު އިންޑިއާގެ ހެލްތު އޮފިޝަލުން ވިދާޅުވީ ޒިކާ ވައިރަސް ފެނުނު ތިން މީހުންގެ ބަލި މިހާރު ފަސޭހަ ވެފައިވާ ކަމަށާއި އެއްވެސް ބަޔަކު ބިރު ގަންނަން ނުޖެހޭ ކަމަށެވެ.

އިންޑިއާ އިން ޒިކާ ވައިރަސް ފެނުމާއި ބެހޭގޮތުން ދުނިޔޭގެ ސިއްހަތު ޖަމިއްޔާއިން ނެރުނު ބަޔާނެއް ގައި ބުނެފައި ވަނީ އިންޑިއާގެ ތިން މީހުން ގައިން ޒިކާ ވައިރަސް ފެނުނީ އާންމުކޮށް ކުރިއަށް ގެންދާ ލޭގެ ޓެސްޓްތައް ކުރުމުގެ ތެރެއިން ކަމަށެވެ. އިތުރަށް ބަޔާނުގައި ބުނެފައި ވަނީ ޒިކާ ވައިރަސްގެ ދެ ކޭސް އެއް ފެނިފައި ވަނީ މިދިޔަ އަހަރުގެ ފެބްރުއަރީ އާއި ނޮވެމްބަރުގައި ކަމަށެވެ. އަދި ތިން ވަނަ ކޭސް ފެނިފައި ވަނީ މިއަހަރުގެ ޖެނުއަރީގައި ކަމަށެވެ. ޑަބްލިއުއެޗްއޯ އިން ބުނީ އިންޑިއާ އިން ޒިކާ ވައިރަސްގެ ކޭސްތައް، އެ ޖަމިއްޔާ އަށް ރިޕޯޓުކޮށްފައި ވަނީ މޭ 15 ގައި ކަމަށެވެ.

ޒިކާ ވައިރަސް ދުނިޔޭގައި އެންމެ ބާރަށްފެތުރެންފަށާފައި ވަނީ 2015 ވަނަ އަހަރުގެ މެދުތެރޭގައެވެ. ޒިކާ ވައިރަސް ބަލި ނުވަތަ ޒިކާ ހުމަކީ ވައިރަސް އަކުން ޖެހޭ މަދިރީގެ ޒަރީއާ އިން ފެތުރޭ ބައްޔެކެވެ.