ކެޓަލޯނިއާގެ މިނިވަންކަމާ ދެކޮޅަށް އެތައް ހާސް ބަޔަކު ސްޕެއިންގެ ސިޓީތަކަށް އެއްވެއްޖެ

ކެޓަލޯނިއާ، ސްޕެއިން އިން މިނިވަންވުމަށް ފެނޭތޯ ނެގި ވޯޓާއި ގުޅިގެން އެކަމާ ދެކޮޅަށް ސްޕެއިންގެ އެކި ސިޓީތަކަށް އެތައްހާސް ބަޔަކު ނިކުމެއްޖެއެވެ.

އެެގޮތުން ސްޕެއިންގެ ބާސެލޯނާ އާއި މެޑްރިޑްގެ މަގުތަކަށް އެތައް ބަޔަކު ނިކުމެ އަޑު އުފަލަމުންދާއިރު އެ މީހުން ދަނީ ސްޕެއިންގެ ދިދަ ހިފައިގެން ކެޓަލޯނިއާ، ސްޕެއިން އިން މިނިވަންވުމަށް ނެގިި ވޯޓާ ދެކޮޅަށް އަޑު އުފުލަމުންނެވެ.

އިތުރު ބަޔަކު ވެސް އެއްވުންތައް ބާއްވަމުންދާއިރު، އެމީހުންވެސް ކެޓަލޯނިއާ، ސްޕެއިން އިން މިނިވަންވުމާ ދެކޮޅެވެ. އެހެންނަމަވެސް އެމީހުން ބޭނުން ވަނީ ކެޓަލޯނިއާގެ މައްސަލަ މަޝްވަރާގެ ތެރެއިން ހައްލުކުރާށެވެ. އެ މީހުންގެ އެއްވުންތަކުގައި ބޭނުން ކުރަމުންދާ ޝިއާރަކީ "ޝެލް ވީ ޓޯކް؟" ނުވަތަ ވާހަކަ ދައްކަމާތޯ؟، މިއެވެ. މި އެއްވުންތައް އިންތިޒާމް ކުރާ ފަރާތްތަކުން ބުނަމުން ދަނީ އެ މީހުންގެ އެއްވުންތަކަށް ސްޕެއިންގެ ދިދަ އާއި އަދި ކެޓަލޯނިއާގެ ދިދަވެސް ނުގެނައުމަށެވެ. އަދި ހުދުކުލައިގެ ހެދުން އެއްވުންތަކަށް ބޭނުން ކުރުމަށެވެ.

ކެޓަލޯނިއާ މިނިވަންކަން އިއުލާން ކުރަން ފެނޭތޯ ބެލުމަށް ދާދިފަހުން ނެގި ވޯޓުގައި 90 ޕަސެންޓް މީހުން ސްޕެއިން އިން މިިނިވަން ވާން ފެންނަ ކަމަށް އާނ ބަސް ބުނެފައިވެއެވެ. ކެޓަލޯނިއާގައި ނެގި ވޯޓާ ގުޅިގެން ސްްޕެއިންގެ މައި ސަރުކާރުން ބުނެފައި އެ ވޯޓަކީ ގާނޫނު އަސާސީއާ ޚިލާފު ބާތިލް އެއްޗެއް ކަމަށެވެ. ވޯޓް ނިމުނުތާ ކުޑަވަގުތުކޮޅެއްގެ ތެރޭގައި ސްޕެއިންގެ ބޮޑުވަޒީރު މާރިއާނޯ ރަޚޮއި ވިދާޅުވީ ޣައިރު ގާނޫނީ ވޯޓެއްގައި ބައިވެރިކޮށް ކެޓަލޯނިއާގެ ރައްޔިތުން މޮޔަ ހައްދާފައިވާ ކަމަށެވެ. ބޮޑުވަޒީރު ވަނީ އެ ވޯޓަކީ ޑިމްކޮރަސީއަށް ކުރި ފުރައްސާރައެއް ކަމަށް ވިދާޅުވެފައެވެ.