ނަވާޒް ޝަރީފްގެ އަނބިކަނބަލުންނަށް ކެންސަރުގެ އާލަސްކަންފުޅެއް ޖެހިވަޑައިގެންފި
ޑޮކްޓަރުން ބުނަނީ އެކަމަނާގެ ކެންސަރު ފަސޭހަކުރެވޭނެ ކަމަށް
ކުރީގެ ބޮޑު ވަޒީރު ޝަރީފް (ވ) އަދި އަނބިކަނބަލުން ކުލްސޫމް
މަގާމުން ދުރުކޮށްފައިވާ ޕާކިސްތާނުގެ ބޮޑު ވަޒީރު ނަވާޒް ޝަރީފްގެ އަނބިކަނބަލުން ކުލްސޫމް ނަވާޒް ޝަރީފަށް ކަރުތެރޭގެ ކެންސަރުގެ އާލަސްކަންފުޅެއް ޖެހިވަޑައިގެންފައިވާ ކަމަށް ރިޕޯޓުތައް ބުނެފިއެވެ.
ރިޕޯޓުތައް ބުނާ ގޮތުން ކުލްސޫމް އަށް ކެންސަރު ޖެހިވަޑައިގެންފައިވާ ކަަން އެނގިވަޑައިގަތީ ދާދިފަހުން ލަންޑަނުގައި ކުރެއްވި މެޑިކަލް ޗެކަޕަކުންނެވެ.
ކުލްސޫމްއަށް ފަރުވާ ދެއްވާ ޑޮކްޓަރުން ވިދާޅުވަމުން ގެންދަވަނީ އެކަމަނާގެ ކެންސަރުގެ އާލަސްކަންފުޅު ފަސޭހަވެގެން ދާނެ ކަމަށާއި އަދި ފަރުވާ ދެއްވުމުގެ ކަންކަން ވަރަށް އަވަހަށް ފެށޭނެ ކަމަށެވެ.
ޕާކިސްތާނުގެ ސުޕްރީމް ކޯޓުން މަގާމުގެ ޝަރުތު ފުރިހަމަ ނުވާ ކަމަށް ކަނޑައެޅުމާ ގުޅިގެން ރައީސް ކަމުގެ މަގާމާއި އަދި ގާނޫނު ހަދާ މަޖިލީހުގެ ގޮނޑި ގެއްލިފައިވާ ބޮޑު ވަޒީރު ނަވާޒް ޝަރީފު، ކުރިން ތަމްސީލް ކުރެއްވި ދާއިރާ އަށް އަނބިކަނބަލުން ކުލްސޫމް ނަވާޒް ވަނީ ކުރިމަތި ލައްވަން ނިންމަވައިފައެވެ.
ގާނޫނު ހަދާ މަޖިލީހުގެ ލާހޫރަށް ނިސްބަތްވާ ދާއިރާގެ ގޮނޑިއަށް ނަވާޒް ޝަރީފްގެ އަނބިކަނބަލުން ކުލްސޫމް ނަވާޒް ނޮމިނޭޓް ކޮށްފައި ވަނީ "ޕާކިސްތާން މުސްލިމް ލީގް-ނަވާޒް ޕާޓީ" އިންނެވެ. މީގެ ކުރިން ދުވަހަކު ވެސް މިފަދަ މަގާމަކަށް ކުލްސޫމް ވާދަކުރައްވާފައި ނުވި ނަމަވެސް، ބައި-އިލެކްޝަނުް ބޮޑު ތަފާތަކުން ކުލްސޫމް ކާމިޔާބު ކުރައްވާނެ ކަމަށް ޕާޓީ އިން ދެކެއެވެ.
ބޮޑު ވަޒީރު ޝަރީފު މަގާމުގެ ޝަރުތު ފުރިހަމަ ނުވާ ކަމަށް ސުޕްރީމް ކޯޓުން ކަނޑައެޅީ، އެ މަނިކުފާނުގެ މައްޗަށް ކޮރަޕްޝަނުގެ ތުހުމަތު ކުރެވި އެކަން ތަހުގީގު ކުރުމަށް ފަހު ލިބުނު މައުލޫމާތުތަކުގެ މައްޗަށް ބިނާކޮށެވެ. ސުޕްރީމް ކޯޓުން ހުކުމްކޮށްފައި ވަނީ ޖޮއިންޓް އިންވެސްޓިގޭޝަން ޓީމު (ޖޭއައިޓީ)ގެ ތަހުގީގަށް ފަހު ކޯޓަށް ހުށަހެޅި 254 ސަފުހާގެ ރިޕޯޓަށް ބެލުމަށް ފަހު އެވެ.
ނަވާޒް ޝަރީފް ރައީސް ކަމަށް ޝަރުތު ފުރިހަމަ ނުވާ ކަމަށް ސުޕްރީމް ކޯޓުން ކަނޑައެޅީ ޕެެނަމާ ޕޭޕަރުގެ މައްސަލައިގައެވެ. ޕެނަމާ ޕޭޕާސް އިން ލީކުކޮށްލި މައުލޫމާތުގައި ނަވާޒް ޝަރީފުގެ ނަން ހިމަނާފައި ނެތެވެ. މަޝްހޫރު ޕެނަމާ ޕޭޕަރުތަކުގެ ޒަރީއާއިން ލީކުވެފައިވާ މައުލޫމާތުގައި ނަވާޒް ޝަރީފްގެ ބޭފުޅުން ވަނީ އޮފްޝޯރ ކުންފުންޏެއް ރަޖިސްޓަރީކޮށް މާލީ ބޮޑެތި ފައިދާތަކެއް ހޯއްދަވާފައެވެ. ލީކު ވެފައިވާ ޕެނެމާ ޕޭޕަރުތަކުގައިވާ ގޮތުން ނަވާޒް ޝަރީފް ބޭފުޅުން ވަނީ ބްރިޓިޝް ވާޖިން އައިލެންޑްސްގައި ކުންފުންޏެއް ރަޖިސްޓަރީކޮށް އެ ކުންފުނިން އިނގިރޭސިވިލާތުން އިމާރާތްތައް ބައްލަވައި ގަނެފައެވެ.
