ޒިމްބާބުވޭގެ ރައީސް ރޮބާޓް މުގާބޭ އަވަހާރަވި ނަމަވެސް އޭނާއަށް އަންނަ އަހަރު ބާއްވާ އިންތިޚާބުގައި ގަބުރެއްގެ ގޮތުގައި ވާދަކުރެއްވޭނެ ކަމަށާއި އަދި ކަމިޔާބު ކުރެއްވޭނެ ކަމަށް މުގާބޭގެ އަނބިކަނބަލުން ވިދާޅުވެއްޖެއެވެ.

މުގާބޭގެ އަނބިކަނބަލުން މިހެން ވިދާޅުވީ ޒަނޫ ޕީއެފް ޕާޓީގެ ރެލީއެއްގައި ވާހަކަދައްކަވަމުންނެވެ.

ދޮން ނަސްލުގެ މީހުންގެ ވެރިކަން 1980ގައި ނިމުނު ފަހުން ޒިމްބާބުވޭގައި ވެރިކަން ކުރައްވަމުންގެންދަވަނީ މުގާބޭއެވެ.

އުމުރުފުޅުން 51 އަހަރުގެ ގްރޭސް މުގާބޭ ގެންދަވަނީ އުމުރުފުޅުން 92 އަހަރުގެ ރައީސް މުގާބޭއަށް ވަފާތެރި މިންވަރު ހާމަކުރެއްވުމަށް އާއްމުކޮށް މިފަދަ ވާހަކަފުޅުތައް ދައްކަވަމުންނެވެ.

ރައީސް މުގާބޭއަށް އެމަނިކުފާނު ނިސްބަތްވެ ވަޑައިގަންނަވާ ޕާޓީން ވަނީ އަންނަ އަހަރު ބާއްވާ ރިޔާސީ އިންތިޚާބުގައި ވާދަކުރުމަށް ތާއީދުކޮށްފައެވެ. ނަމަވެސް މި ފަހަކަށް އައިސް މުގާބޭއާއެކު އާއްމު ބައްދަލުވުންތައް ބޭއްވުން ވަނީ މަދުވެފައެވެ.

މުގާބޭގެ އަނބިކަނބަލުން ވިދާޅުވީ 1980 ވަނަ އަހަރު ގެރިއްލާ ހަނގުރާމައިގައި މުގާބޭއާއެކު ހުންނެވި އެއްވެސް މީހަކަށް މުގާބޭއަކީ މުސްކުޅިއެއް ކަމަށް ބުނުމުގެ ހައްގު ނޯންނާނެ ކަމަށާއި އެހެން ބުނެ މުގާބޭއާ ވާދަކުރަން އެދުވަސްވަރުގެ މީހަކު ނުކުންނަ ނަމަ އެބަޔަކު ވެސް ވާދަކޮށްގެން ނުވާނެ ކަމަށެވެ.