ބޮޑުވަޒީރުގެ ކަރަޕްޝަންގެ މައްސަލައިގައި ސްޕްރީމް ކޯޓުން ނިންމާނެ ގޮތެއްގެ އިންތިޒާރުގައި މުޅި ޕާކިސްތާން

ޕެނަމާ ޕޭޕަރުތަކުގެ ޒަރީއާއިން ލީކުވި ޕާކިސްތާނުގެ ބޮޑުވަޒީރު ނަވާޒް ޝަރީފްގެ ކަރަޕްޝަން މައްސަލަތައް އެ ގައުމުގެ ސްޕްރީމް ކޯޓުން ބެލުމަށްފަހު ހުކުމަކާ ހަމައަށް އައިސްފައިވާއިރު، މުޅި ގައުމު އިންތިޒާރު ކުރަމުންދަނީ ސްޕްރީމު ކޯޓުން ނިންމާނެ ނިންމުމަކަށް ކަމަށް ރޮއިޓާސް ނިއުސް އޭޖެންސީން ބުނެފިއެވެ.

ބޮޑުވަޒީރު ޝަރީފްގެ މައްޗަށް ކުރެވިފައިވާ ކަރަޕްޝަންގެ ތުހުމަތުތަކަށް އޭނާ ގެންދަވަނީ އިންކާރު ކުރައްވަމުންނެވެ. ނަމަވެސް ހުސްވި އަހަރު ބޮޑުވަޒީރުގެ މައްޗަށް ކުރެވޭ ކަރަޕްޝަންގެ ތުހުމަތު ތަކުގެ މައްސަލަތައް ސްޕްރީމް ކޯޓުން ބަލަން ނިންމީ އެ ގައުމުގެ އިދިކޮޅު ލީޑަރު އިމްރާން ޚާން އެ މައްސަލަ ބެލުމަށް ބާރު އެޅުއްވުމުގެ ސަބަބުންނެވެ. މައްސަލަ ސްޕްރީމް ކޯޓުން ނުބަލައިފި ނަމަ މަގުމަތީގެ މުޒާހަރާތައް ފައްޓަވާނެ ކަމުގެ އިންޒާރުވެސް އިމްރާން ދެއްވިއެވެ.

ނަވާޒް ޝަރީފްއާ ދެކޮޅަށް ހުށަހެޅިފައިވާ މައްސަލައާ ގުޅިގެން ސްޕްރީމް ކޯޓުގެ ނިންމުންތައް އަތުވެދާނެ ގޮތްތައް ކަމަށް ރޮއިޓާސް އިން ބުނެފައިވަނީ، ބޮޑުވަޒީރުގެ ކުށެއް ނެތް ކަމަށް ކަނޑައެޅުން ނުވަތަ، ޝަރުއީ ކޮމިޝަނެއް އުފައްދާ އިތުރަށް މައްސަލަ ދިރާސާ ކުރަން އަމުރުކުރުން ނުވަތަ ނަވާޒް ޝަރީފް މަގާމުގައި ހުންނެވުމުގެ ޝަރުތެއް އުނިވެއްޖެ ކަމަށް ކަނޑައެޅުމެވެ. 2012 ވަނަ އަހަރު އޭރުގެ ބޮޑުވަޒީރު، ޔޫސުފް ރާޒާ ޖިލާނީގެ މައްޗަށް ކުރެވުނު ކޯޓުގެ ހުރުމަތް ކެނޑި ކަމުގެ ތުހުމަތުގައި ހުށަހެޅުނު މައްސަލައާ ގުޅިގެން ސްޕްރީމް ކޯޓުން ހުކުމް ކުރީ މަގާމުގައި އޭނާ ހުންނެވުމަށް ހުންނަންޖެހޭ ޝަރުތު އުނިވެއްޖެ ކަމަށެވެ. އެއާއެކު ޖިލާނީގެ ބޮޑުވަޒީރުކަން ނިމުމަކަށް އައެވެ.

ސްޕްރީމް ކޯޓުގެ ހުކުމާ ބެހޭ ގޮތުން ސަރުކާރުންވެސް އަދި އިދިކޮޅު ފަރާތްތަކުންވެސް ބުނެފައިވަނީ ކޯޓުގެ ނިންމުން އަންނާނީ ރަނގަޅަށް ކަމަށެވެ. އަދި ކޯޓުގެ ނިންމުން ބަލައިގަންނާނެ ކަމަށެވެ.

ލީކު ވެފައިވާ ޕެނެމާ ޕޭޕަރު ތަކުގައިވާ ގޮތުން ނަވާޒް ޝަރީފް ބޭފުޅުންވަނީ ބްރިޓިޝް ވާޖިން އައިލެންޑްސްގައި ކުންފުންޏެއް ރަޖިސްޓަރީ ކޮށް އެ ކުންފުނިން އިނގިރޭސިވިލާތުން އިމާރާތްތައް ބައްލަވައި ގަނެފައެވެ.

އިދިކޮޅު ލީޑަރު އިމްރާން ޚާން މި މައްސަލައިގައި ތަކުރާރުކޮށް ވިދާޅުވެފައިވަނީ، ޝަރީފްގެ މަސްލަހަތު ހިމެނޭ ކުންފުނިތަކުން މަނީ ލޯންޑްރިންގައި ބައިވެރި ނުވާ ކަން ސާބިތު ކުރެއްވުމަކީ ޚުދު ޝަރީފް އަމިއްލަފުޅަށް ކުރައްވަން ޖެހިވަޑައިގަންނަވާނެ ކަމެއް ކަމަށެވެ.

ޕާކިސްތާނަކީ ކަރަޕްޝަން އިންތިހާއަށް އަށަގަނެފައިވާ ގައުމެއްގެ ގޮތުގައި ޓްރާންސްޕޭރަންސީ އިންޓަރނޭޝަނަލުން ފާހަގަ ކުރާ ގައުމެކެވެ. ކަރަޕްޝަން ޕަސެޕްޝަން އިންޑެކްސްގައި ޕާކިސްތާނު އުޅެނީ 176 ގައުމުގެ ތެރެއިން 116 ވަނައިގައެވެ.