ރާއްޖޭގައި ފުރަތަމަ ފަހަރަށް ސިއްހީ ކުއްލި ނުރައްކަލުގެ ހާލަތު އިއުލާންކޮށްފިއެވެ.

ބުރާސްފަތި ދުވަހުގެ މެންދުރު ފަހު ދަރުބާރުގޭގައި ބޭއްވި ކުއްލި ނޫސްވެރިންގެ ބައްދަލުވުއްގައި މިކަން އިއުލާންކުރެއްވީ އާންމު ސިއްހަތުގެ ގާނޫނުން ލިބިދޭ ބާރުގެ ދަށުން ހެލްތް މިނިސްޓަރ އަބްދުﷲ އަމީންއެވެ. ޤާނޫނު ނަމްބަރު 7/2012 އާއްމު ސިއްހަތު ރައްކާތެރިކުރުމުގެ ޤާނޫނުގެ 33 ވަނަ މާއްދާއިން ވަޒީރަށް ލިބިގެންވާ ބާރުގެ ދަށުން، ދިވެހިރާއްޖޭގެ ހުރިހާ ސަރަހައްދަކަށް އާއްމު ސިއްހަތުގެ ކުއްލި ނުރައްކަލުގެ ހާލަތު އިއުލާނު މިއަދުން ފެށިގެން 30 ދުވަހުގެ މުއްދަތަކަށެވެ.

އާންމު ސިއްހަތު ރައްކާތެރި ކުރުމުގެ ގާނޫނުގައިވާ ގޮތުން ގައިން ގަޔަށް އަރާ ބައްޔެއް ހުންނަ މީހުންނާއި އެފަދަ ބައްޔެއް ހުރެދާނެ ކަމަށް ބެލެވޭ މީހުން ވަކި ކަމެއް ނުކުރަން ނުވަތަ ވަކި ކަމެއް ކުރަން ކަމާ ބެހޭ ފަރާތްތަކަށް އެންގޭނެއެވެ. އަދި އެ އެންގުން ރައްދުވާ މީހާ އެ އެންގުމަށް ބޯލަނބަން ދެކޮޅުހަދާ ނަމަ، އެކަން ތަންފީޒު ކުރުމުގެ އަމުރަކަށް އެދި ސިވިލް ކޯޓަށް މައްްސަލައެއް ހުށަހެޅިދާނެ ކަމަށް ގާނޫނުގައި ބަޔާންކޮށްފައިވެއެވެ. ސިވިލް ކޯޓުން ނެރޭ އެފަދަ އަމުރެއް ތަންފީޒު ކުރަން ފުލުހުންގެ އެހީތެރިކަންވެސް ހޯދިދާނެ އާންމު ސިއްހަތު ރައްކާތެރިކުރުމުގެ ގާނޫނުގައި ވަނީ ބަޔާންކޮށްފައެވެ.

މި ގާނޫނުގެ ދަށުން ކުރާ ކަމެއްގެ ސަބަބުން، އެއްވެސް މީހެއްގެ މިނިވަންކަމަށް ނުވަތަ ހައްގަކަށް ހަނިކަމެއް ގެނެވޭނީ، ސިއްހީގޮތުން ނުރައްކާވެދާނެ ފަދަ ބަލިމަޑުކަމެއްގެ ސަބަބުން، ނުވަތަ ގައިންގަޔަށް އަރާފާނެ ބައްޔެއްގެ ސަބަބުން، ނުވަތަ ދުރާލާ އެންމެންނަށް އެނގި އޭގެން ރައްކާތެރިވާންޖެހޭފަދަ ބައްޔެއްގެ ސަބަބުން، ނުވަތަ އާންމު ސިއްހަތަށް ކުއްލި ނުރައްކަލުގެ ހާލަތެއް ދިމާވުމުގެ ސަބަބުން، ނުވަތަ އަމިއްލަ ސިއްހަތަށް ނުރައްކާވާފަދަ ކަމެއް ދިމާވުމުގެ ސަބަބުން، އެ ވަގުތަކަށާއި ހާލަތަކަށާއި ކަމުގެ ކުޑަބޮޑުމިނަށް ބަލާއިރު، މީހެއްގެ މިނިވަންކަމަށް ނުވަތަ ހައްގަށް ހަނިކަމެއް ގެންނަން ކޮންމެހެން ބޭނުންވާ މިންވަރަށް، މި ގާނޫނުގެ ދާއިރާގެ ތެރޭގައި ހަމައެކަނި އެ ނިސްބަތަށެވެ.

މިނިސްޓަރ އަމީން ވިދާޅުވީ މިކަމާއި ގުޅިގެން ނިންމަންޖެހޭ ކަންކަން ނިންމުމުގައި އެންމެ އިސްކޮށް ހަރަކާތްތެރިވަނީ ޑައިރަކްޓަރ އޮފް ޕަބްލިކް ހެލްތު ކަމަށެވެ. އަދި މި ހާލަތު އިއުލާންކުރުމާއި ގުޅިގެން އެޗްޕީއޭއަށް ގިނަ ކަންކަން ކުރުމުގެ ބާރުލިބިގެންދާއިރު، އޭގެތެރޭގައި ސުކޫލްތައް ހުޅުވުމާއި، ބަންދުކުރުމުގެ ބާރުވެސް ހިމެނޭ ކަމަށެވެ. ނަމަވެސް އަދި މިހާތަނަށް ނިންމާފައިވާ ގޮތާއި ހިލާފަށް ނޫނީ އޭގެ އިތުރަށް އެއްވެސް ފިޔަވަޅެއް އަޅަން ނިންމާފައިނުވާކަމަށެވެ.

މިހާލަތު އިއުލާންކުރެއްވި ސަބަބު ބަޔާންކޮށްދެއްވަމުން އަމީން ވިދާޅުވީ މިއީ ސަރުކާރުން އަވަހަށް ނިންމަންޖެހޭ ނިންމުންތައް ނިންމުމުގައި ހުރި ހުރަސްތައް ނައްތާލުމުގެ ގޮތުންއެޅި ފިޔަވަޅޭއް ކަމަށެވެ. އަދި މިހާރު ބަލީގެ ހާލަތު އިތުރަށް ގޯސްވެފައިނުވާކަމަށާއި، ނަމަވެސް ރައްކާތެރިކަމުގެ ގޮތުން އަޅަންޖެހޭ ހުރިހާ ފިޔަވަޅުތަކެއް އެޅުމުގެ ގޮތުން ނިންމި ނިންމުމެއް ކަމަށެވެ.