ރާއްޖޭގެ ހާލަތު ބަދަލުކުރަން ރައީސް ނަޝީދާއެކު ގުރުބާންވާނަން:އިބްރާ
ރާއްޖޭގެ ހާލަތު ބަދަލުކުރުމަށް ރައީސް ނަޝީދު ކުރައްވާ މަސައްކަތުގައި ބައިވެރިވާނަން
އެމްޑީޕީގެ ކުރީގެ ރައީސް އިބްރާ އާއި ރައީސް ނަޝީދާ ލަންކާގައި ބައްދަލުކުރައްވަނީ
ދިވެހި ރާއްޖޭގެ ހާލަތު ބަދަލުކުރުމަށްޓަކައި ކުރީގެ ރައީސް މުހައްމަދު ނަޝީދާއެކު ގުރުބާވާން ތައްޔާރަށް ހުންނެވި ކަމަށް އެމްޑީޕީގެ ކުރީގެ ރައީސް އިބްރާހިމް އިސްމާއިލް (އިބްރާ) ވިދާޅުވެއްޖެއެވެ.
އާދީއްތަ ދުވަހުގެ ރޭ ރައީސް ނަޝީދާއި ބައްދަލުކުރެއްވުމަށް ފަހު އިބްރާހިމް އިސްމާއިލް ކުރެއްވި ޓްވީޓެއްގައި ވިދާޅުވެފައި ވަނީ އެ ދެ ބޭފުޅުންގެ ބައްދަލުކުރެއްވުމުގައި މަޝްވަރާކުރެއްވީ އަންނަން އޮތް ޖީލުތަކަށް ރާއްޖޭގެ ހާލަތު ރަނގަޅުކުރުމަށް ކުރެވެން ހުރި ކަންކަމާއި ގުޅޭ ގޮތުން ކަމަށެވެ. ރާއްޖޭގެ ހާލަތު ބަދަލުކުރަން ރައީސް ނަޝީދު ކުރައްވާ މަސައްކަތްޕުޅުގައި ބައިވެރިވެ އެކަމުގައި ގުރުބާންވާން ތައްޔާރަށް ހުންނެވި ކަމަށް އިބްރާ ވިދާޅުވިއެވެ.
އިބްރާހިމް އިސްމާއިލްއަކީ، އެމްޑީޕީގެ ފުރަތަމަ ރައީސްއެވެ. އެމްޑީޕީ އުފެއްދުމަށްޓަކައި ރައީސް ނަޝީދާއެކު ގިނަ މަސައްކަތެއް ކުރައްވާފައިވާ ބޭފުޅަކެވެ.
އިނގިރޭސީވިލާތުން ހިމާޔަތް ހޯއްދަވައިގެން އެގައުމުގައި ދިރިއުޅުއްވަމުން ގެންދަވާ ރައީސް ނަޝީދު ލަންކާ އަށް ވަޑައިގެން ދިވެހިރާއްޖޭގެ ސިޔާސީ ހާލަތާމެދު އެޕާޓީގެ މެމްބަރުންނާ ގެންދަވަނީ މަޝްވަރާ ކުރައްވަމުނެވެ. އަދި ލަންކާގެ ސަރުކާރުގެ އިސްބޭފުޅުންނާއި ލަންކާގައި ތިއްބަވާ ބޭރުގެ ސަފީރުންނާ ވެސް ރައީސް ނަޝީދު ގެންދަވަނީ ބައްދަލުކުރައްވަމުންނެވެ.
