އިނގިރޭސި ބޮޑުވަޒީރު ބޮރިސް ޖޯންސަން އަށް ދަރިކަލަކު ލިބިވަޑައިގަންނަވަނީ

އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން އާއި އެމަނިކުފާނު ލޯބީގެ ގޮތުން ގުޅިވަޑައިގެން އުޅުއްވާ ކެރީ ސައިމަންޑްސް އަށް ފުރަތަމަ ދަރިކަލަކު ލިބިވަޑައިގަންނަވަން އުޅުއްވާކަމަށް އެޤައުމުގެ މީޑިޔާތަކުން ރިޕޯޓްކޮށްފިއެވެ.

އުމުރުފުޅުން 55 އަހަރުފުޅުގެ ޖޯންސަން އާއި، 31 އަހަރުފުޅުގެ ސައިމަންޑަށް ދަރިކަލަކު ލިބިވަޑައިގަންނަވަން އުޅުއްވާކަން ހާމަކޮށްފައިވަނީ ސައިމަންޑް ކުރެއްވި އިންސްޓަރގްރާމްގެ ޕޯސްޓެއްގައެވެ. މިޕޯސްޓަގައި އެކަމަނާ ވިދާޅުވެފައިވަނީ އެދެބޭފުޅުން މިދިޔަ އަހަރު އެންގޭޖް ވެފައިވާކަމަށާއި، ފުރަތަމަ ދަރިފުޅަށް މިހާރު އިންތިޒާރުކުރައްވަމުން ގެންދަވާކަމަށެވެ. މީގެއިތުރުން މި ދެ ބޭފުޅުން ވަރަށް އަވަހަށް ކައިވެނިކުރެއްވުމަށް ހަމަޖެހިފައިވާކަމަށްވެސް މީޑިޔާ ރިޕޯޓުތައް ބުނެއެވެ.

މިދިޔަ ޑިސެންބަރު މަހު އިނގިރޭސިވިލާތުގެ ބޮޑުވަޒީރުކަމަށް އިންތިޚާބުވެ ވަޑައިގެންނެވި ޖޯންސަން އަކީ ބޮޑުވަޒީރުކަމަށް ވަޑައިގެންނެވުމަށް ފަހު ފާއިތުވި 250 އަހަރު ތެރޭގައި ކައިވެނިކުރައްވާ ފުރަތަމަ ބޮޑުވަޒީރެވެ. އަދި މިއީ އިނގިރޭސިވިލާތުގެ ބޮޑުވަޒީރުން ރަސްމީކޮށް އުޅުއްވުމަށް ހަމަޖެހިފައިވާ ޑައުނިންގ ސްޓްރީޓްގައި ކައިވެނި ބައްލަވާ ނުގަނެވާ ދެބޭފުޅަކު އުޅުއްވާ ފުރަތަމަ ފަހަރުވެސްމެއެވެ. މީގެއިތުރުން ސައިމަންޑް އަކީ ފާއިތުވެދިޔަ 174 އަހަރުގެ ތެރޭގައި އިނގިރޭސިވިލާތުގެ ބޮޑުވަޒީރެއް ގެންގުޅުއްވި އެންމެ ހަގު ޙަޔާތުގެ ބައިވެރިޔާއެވެ.

މިފަދަ އެތައް ރިކޯޑުތަކެއް މި ދެބޭފުޅުންގެ މިގުޅުމާއެކު މުގުރާލެވިގެންދާއިރު، މިއީ ޖޯންސަންގެ ތިންވަނަ ކައިވެންޏެވެ. އެންމެ ފުރަތަމަ ޖޯންސަން ކުރެއްވި ކައިވެނި ރޫޅިފައިވާއިރު ދެވަނަ ކައިވެނި އުޅެނީ ރޫޅުމުގެ މަގުމަތީގައެވެ. ފެބްރުއަރީ މަހުގެ ކުރީކޮޅު އެކައިވެނި ނިމުމަކަށް ގެނައުމުގެ އެއްބަސްވުމަކާ ހަމައަށް އައިސްފައިވާކަމަށް މީޑިޔާތަކުން ވަނީ ބުނެފައެވެ. ވީލާރ އާ ޖޯންސަންގެ ކައިވެނި ނިމުމަކަށް ގެންނައިރު، އެދެބޭފުޅުން ކައިވެނި ބައްލަވައިގަތީ 1993 ވަނަ އަހަރު އެވެ. އަދި އެދެބޭފުޅުންނަށް ހަތަރު ބޭފުޅުން ލިބިވަޑައިގެންފައިވެ އެވެ.

ރިޕޯޓުތައް ބުނާގޮތުން ސައިމަންޑް އަކީ އެންވަޔަރަންމަންޓަލް ކެމްޕެއިނަރ އެކެވެ. ނަމަވެސް އެހާގިނައިން ބޭރުތެރެއިން ފެންނަ ބޭފުޅެއް ނޫނެވެ. ޖޯންސަން އާއި ސައިމަންޑްގެ ލޯބީގެ ގުޅުމުގެ ވާހަކަ އެންމެ ފުރަތަމަ މީޑިޔާތަކަށް ފެންމަތިވެގެން އައިސްފައިވަނީ 2019 ވަނަ އަހަރުގެ ކުރީކޮޅު އެވެ.