ހަރުކަށި ފިކުރާއި، ލާދީނީ މީހުންނަށް ކޮންމެ ހަފުތާއަކު ނަސޭހަތްދެން: އިސްލާމިކް މިނިސްޓްރީ
29 ފެބުރުއަރީ 2020 | ހޮނިހިރު 13:33ކޮންމެ ހަފްތާއެކު ޝެޑިއުލް އެއް ހެދުމަށްފަހު މިނިސްޓްރީީން ހާއްސަ ސަމާލުކަމެއް ދީގެން އެކަން ކުރަމުންދޭ
އިސްލާމިކް މިނިސްޓަރ ޑރ އަހުމަދު ޒާހިރު
ހަރުކަށި ފިކުރުގެ މިހުންނާއި ދީން ޤަބޫލުނުކުރާ މީހުންނަށް ކޮންމެ ހަފުތާއަކު އެ މިނިސްޓްރީގެ ފަރާތުން ނަޞޭޙަތް ދެމުންދާކަމަށް އިސްލާމިކް މިނިސްޓަރ ޑރ. އަޙްމަދު ޒާހިރު ވިދާޅުވެއްޖެއެވެ.
ދީނުގެ ނަމުގައި ހައްދުފަހަނައަޅާފައިވާ ހަރުކަށި ފިކުރު ފެތުރުމާއި، ދީނާ ޚިލާފު ޚިޔާލު ފާޅުކުރުމަކީ، ރާއްޖޭގެ ސަލާމަތާއި ރައްކާތެރިކަމަށް އޮތް ބޮޑު ގޮންޖެހުމެއްކަމަށް ވާއިރު، އެކަން ރާއްޖޭގައި ފެތުރިފައިވާ މިންވަރު ސަރުކާރުން ޢާންމުކޮށް، އެކަމާ ދެކޮޅަށް މިދިޔަ އަހަރު ގިނަ މަސައްކަތްތަކެއް ކޮށްފައިވެއެވެ. އަދި އެ ފަރާތްތަކަށް ރަނގަޅު މަޢުލޫމާތުު ފޯރުކޮށްދީ ނަޞޭޙަތް ދިނުމަށް ނިންމާފައިވާއިރު، މިކަމާއި ބެހޭ އެންމެ ފަހުގެ މަޢުލޫމާތު ޙިއްސާކުރައްވަމުން މިނިސްޓަރ އަޙްމަދު ޒާހިރު ވިދާޅުވީ، ހަރުކަށި ފިކުރުގެ މިހުންނާއި ދީން ޤަބޫލުނުކުރާ މީހުންނަށް ކޮންމެ ހަފުތާއަކު އެ މިނިސްޓްރީގެ ފަރާތުން ނަޞޭޙަތް ދެމުންދާކަމަށެވެ.
މިނިސްޓަރ ވިދާޅުވީ ކޮންމެ ހަފުތާއަކު ޝެޑިއުލް އެއް ހެދުމަށް ފަހު މިނިސްޓްރީީން ޚާއްޞަ ސަމާލުކަމެއް ދީގެން އެކަން ކުރަމުން ގެންދާކަމަށެވެ. މިނިސްޓަރ ވިދާޅުވީ އެފަދަ މީހުން ތިބެނީ އެކަހެރިކޮށްފައިކަމަށެވެ. އިތުރަށް ވާހަކަ ދައްކަވަމުން މިނިސްޓަރ ވިދާޅުވީ، ދީނީ ހަރުކަށިކަމާއި ބެހޭގޮތުން ރާއްޖޭގައި މިހާރު ތިބި ދީނީ ޢިލްމުވެރިންނަށް ސަޢުދި އަރަބިއްޔާގެ އިސްލާމިކް މިނިސްޓްރީއާއި ގުޅިގެން ވާރކްޝޮޕްތަކެއް ކުރިޔަށް ކުރިޔަށްގެންދާކަމަށެވެ. މިހާތަނަށް 3 ފަހަރަކު ވާރކްޝޮޕް މާލެއާއި އަތޮޅު ތެރޭގައި ކުރިޔަށް ގެންގޮސްފައިވާކަމަށް އިސްލާމިކް މިނިސްޓްރީން ބުނެއެވެ.
މާތްވެގެންވާ އިސްލާމް ދީނަށް ފުރައްސާރަކޮށް ކުޑައިމީސްކޮށް ބަސްބުނުމުގެ އެއްވެސް ފުރުޞަތެއް ދިވެއްސަކަށް ނުދޭނެކަމަށާއި އެފަދަ މައްސަލަތައް މިނިސްޓްރީން ވަރަށް ސީރިއަސް މައްސަލަތަކެއްގެ ގޮތުގައި ބަލަމުންގެންދާނެކަމަށް މިނިސްޓަރ ވަނީ މީގެ ކުރިން ވިދާޅުވެފައެވެ.
