އިންޑިއާ އިން ޓްރަމްޕް އަށް ހޫނު މަރުހަބާއެއް
24 ފެބުރުއަރީ 2020 | ހޯމަ 16:09އިންޑިއާ ވަޑައިގެންނެވީ ހޯމަ ދުވަހު
ޓްރަމްޕްއާ މޯދީ | ޓްވިޓަރ
އެމެރިކާގެ ރައީސް ޑޮނާލްްޑް ޓްރަމްޕް ވެރިކަމާއި ޙަވާލުވެވަޑައިގަތް ފަހުން އިންޑިއާ އަށް ކުރައްވާ ފުރަތަމަ ދަތުރުފުޅުގައި އެ ޤައުމަށް ވަޑައިގެންފިއެވެ. ދުނިޔޭގެ ޑިމްކޮރެސީ އެންމެ ބޮޑު ޤައުމަށް އެމެރިކާގެ ރައީސް ވަޑައިގެންނެވީ އަނބިކަނބަލުން މެލަނިޔާ ޓްރަމްޕާއެކު ހޯމަ ދުވަހުގެ ހެނދުނުގެ ވަގުތެއްގައެވެ.
ގުޖުރާތު ސްޓޭޓުގެ އަޙްމްދުއާބާދުގެ އެއަރޕޯޓުން ޓްރަމްޕަށް ވަނީ ހޫނު މަރުޙަބާއެއް ކިޔާފައެވެ. އެގޮތުން އިންޑިއާގެ އެކި ކަހަލަ ޘަޤާފީ ޙަރަކާތްތަކެއް ހުށައަޅައި ދީފައިވެއެވެ. ޓްރަމްޕަށް އެއަރޕޯޓުން މަރުޙަބާ ދެންނެވީ އިންޑިއާގެ ބޮޑު ވަޒީރު ނަރެންދްރަ މޯދީއެވެ. އެއަށްފަހު ކާރުގައި ޓްރަމްޕް ވަޑައިގެންނެވީ ރަސްމީ ގޮތުން އަޙްމަދުއާބާދުގެ މޮޓެރާ ސްޓޭޑިއަމްގައި ބޭއްވި ރަސްމިއްޔާތަށެވެ.
އެއް ލައްކައެއްހާ މީހުން ޖަމާވި އެ ސްޓޭޑިއަމްގައި ޓްރަމްްޕް ވަނީ އިންޑިއާގެ ރައްޔިތުންނާ މުޚަތަބުކުރައްވާ ވާހަކަފުޅު ދައްކަވާފައެވެ. ޓްރަމްްޕްގެ ވާހަކަފުޅުގައި އެމަނިކުފާނު ވަނީ އިންޑިއާއާ އެމެރިކާއާ ދެ ޤައުމުގެ ދެމެދުގައި އޮންނަ ގާތް ގުޅުމުގެ މައްޗަށް އަލިއަޅުވާލައްވާފައެވެ. ޖާގައިގެ ގޮތުން ދުނިޔޭގެ އެންމެ ބޮޑު ކްރިކެޓް ސްޓޭޑިއަމްގައި ވާހަކަފުޅު ދައްކަވަމުން އެމެރިކާގެ ރައީސް ވިދާޅުވީ، ތިން ބިލިއަން ޑޮލަރުގެ އަގުހުރި އަސްކަރިއްޔާގެ ހެލިކޮޕްޓަރު އިންޑިއާގެ އަސްކަރިއްޔާ އަށް ވިއްކަން ހަމަޖެހިފައިވާ ކަމަށެވެ. އެއަށް ފަހު އެއަރފޯސް ވަންގެ ފްލައިޓްގައި ޓްރަމްޕް ވަޑައިގެންނެވީ އާގްރާއަށެވެ.
ޓްރަމްޕްއާ އަނބިކަނބަލުން ވަނީ އާގްރާގައި ހުންނަ ދުނިޠޭގެ ހަތް އަޖައިބުން އެއް އަޖައިބު ކަމުގައިވާ ތާޖު މަހަލް އަށް ޒިޔާރަތް ކުރައްވާފައެވެ. އެެމެރިކާގެ ރައީސްގެ ދެކަނބަލުން ވަނީ ތާޖު މަހަލްއަށް ޒިޔާރަތް ކުރައްވާ ޢިއްޒަތްތެރިންގެ ފޮތުގައި ސޮއިކުރައްވާފައެވެ. އެއަށް ފަހު ޓްރަމްޕް ވަނީ ވެރިރަށް ނިއު ދިއްލީ އަށް ވަޑައިގެންފައެވެ. ރަސްމީ އިޙުތިފާލުތައް އޮންނާނީ މާދަމާކަމަށް ޚަބަރު ލިބެއެވެ.
ހޯމަ ދުވަހުގެރޭ ޓްރަމްޕް ހުންނަވަނީ ނިއު ދިއްލީގެ މަޝްހޫރު ހޮޓަލެއް ކަމަށްވާ އައިޓީސީ މައޫރްޔާ ހޮޓަލުގައެވެ. އިންޑިއާއާއ އެމެރިކާއާ ދެގައުމުގެ ދެމެދު ރަސްމީ ވާހަކަތައް ފަށަން ހަމަޖެހިފައިވަނީ އަންގާރަ ދުވަހު އިންޑިއާ ގަޑިން 10 ޖަހާއިރުއެވެ.
އެގޮތުން އިންޑިއާގެ ރައީސްގެ ރަސްމީގެކޮޅު ރަޝްތްރަޕަތީ ބަވަން ގައި ރައީސް ރާމުނާތު ކޮވިންދާއަ ޓްރަމްޕް ބައްދަލު ކުރެއްވުމަށް ވަނީ ހަމަޖެހިފައެވެ. އަދި އެއަށް ފަހު މަހާތުމާ ގާންދީގެ މަޤްބަރާއަށް ޒިޔާރަތް ކުރެއްވުމަށް ވަނީ ހަމަޖެހިފައެވެ.
މޯދީއާ ޓްރަމްޕް ރަސްމީކޮށް ބައްދަލުކުރެއްވުމަށް ހަމަޖެހިފައިވަނީ އަންގާރަ ދުވަހު މެންދުރުގެ ވަގުތެއްގައެވެ. ޓްރަމްޕްގެ މި ދަތުރުފުޅަކީ ދެ ޤައުމުގެ ގުޅުން ބަދަހި ކުރުމަށް ކުރައްވާ ދަތުރުފުޅަކަށްވާއިރު ދެ ޤައުމުގެ ދެމެދުގައި އެއްބަސްވުން ތަކެއްގައި ސޮއިކުރުމަށް ހަމަޖެހިފައިވާ ކަމަށް އިންޑިއާގެ ބައެއް ނޫސްތަކުން ރިޕޯޓުކުރެއެވެ.
