އިންޑިއާގެ ޖުމްހޫރީ ދުވަސް ކުލަގަދަ ގޮތެއްގައި ފާހަގަކުރަނީ

އިންޑިޔާގެ ޖުމްހޫރީ ދުވަހުގެ ރަސްމިއްޔާތުގެ ޝަރަފްވެރި މެހެމާނަކަށް އަބޫދާބީގެ ވަލީއަހުދު ޝެއިޚް މުޙައްމަދު ބިން ޒައިދް އަލް ނަޙްޔާން އިންޑިޔާއަށް ވަޑައިގެންފިއެވެ.

އިންޑިޔާގެ 68 ވަނަ ޖުމްހޫރީ ދުވަސް މިއަދު އެޤައުމުގައި ފާހަގަކުރަމުންދާއިރު، މިއަދަކީ އެޤައުމުގައި ޤާނޫނު އަސާސީއަށް ތަބާވާން ފެށިތާ 67 އަހަރު ފުރުނު ދުވަސްވެސްމެއެވެ. 1950 ވަނަ އަހަރު އެކުލަވާލެވުނު ޤާނޫނު އަސާސީއަށް އަހަރު ފުރުމާ، ޖުމްހޫރީ ދުވަސް އެޤައުމުގައި ކުލަގަދަކޮށް ފާހަގަކުރަމުންދާއިރު، ޖުމްހޫރީ ދުވަހުގެ ޚާއްޞަ ޕެރޭޑު މިހާރު ވަނީ ފަށާފައެވެ.

އިންޑިޔާގެ ވެރިރަށް ނިއުދިއްލީގައި ޕެރޭޑު ފަށާފައިވާއިރު، ޕެރޭޑުގެ އިތުރުންވެސް ސަޤާފީ އެތަކެއް ޙަރަކާތްތަކެއް ކުރިއަށް ގެންދިއުމަށް ވަނީ ހަމަޖެހިފައެވެ. އިންޑިޔާގެ އާރާއި ބާރުގެ އިތުރުން އެޤައުމުގެ ސަޤާފަތް ޕެރޭޑުގައި ގެންދަނީ ދައްކާލަމުންނެވެ.

ޖުމްހޫރީ ދުވަހުގެ ޕެރޭޑު ކުރިއަށްދާ ވަގުތު ނިއުދިއްލީގެ އިތުރުންވެސް އެޤައުމުގެ އެކި ސަރަޙައްދުތަކުގައި ވަނީ ސަލާމަތީ ކަންކަން ވަރަށް ވަރުގަދަކޮށްފައެވެ. އެޤައުމުގައި ޙަރަކާތްތެރިވާ ހަނގުރާމަވެރި ޖަމާޢަތެއް ކަމަށްވާ "ލަޝްކަރޭ-ޠައިބާ" އިން ވަނީ ޖުމްހޫރީ ދުވަހާ ދިމާކޮށް ޙަމަލާދޭނެ ކަމުގެ އިންޒާރު ދީފައެވެ.

ޖުމްހޫރީ ދުވަހުގެ މުނާސަބަތުގައި އިންޑިޔާގެ ރައީސް ޕްރަނާބް މުކަރްޖީގެ އިތުރުން ބޮޑުވަޒީރު ނަރެންދްރާ މޯދީ ވަނީ ދުވަހުގެ ތަހުނިޔާ ޤައުމުގެ ރައްޔިތުންނަށް އަރިސްކުރައްވާފައެވެ.