އިންޑިއާގެ އަންދްރަ ޕްރަދޭޝްގައި ހިނގި ރޭލު އެކްސިޑެންޓެއްގައި 26 މީހަކު މަރުވެއްޖެ އެވެ.

ވިޒިއަނަގްރާމް ޑިސްޓްރިކްޓްގެ ކުނޫރް ސްޓޭޝަންގައި ހިނގި މި އެކްސިޑެންޓުގައި އެތައް ބަޔަކު އަދިވެސް ތާށިވެފައިވާއިރު، މީހުން ސަލާމަތް ކުރުމަށް ކަމާބެހޭ ފަރާތްތަކުން ދަނީ މަސައްކަތް ކުރަމުންނެވެ.

އެގޮތުން ޒަހަމްވި ބައެއް މީހުން މިހާރު ކައިރި ދެ ހޮސްޕިޓަލްތަކަށް ގެންގޮސްފައިވާ ކަމަށާއި، ޒަހަމްވި ބައެއް މީހުންނަށް ބޮޑެތި ޒަހަމްތައްވެސް ވަނީ ލިބިފައިކަމަށް ރިޕޯޓްތައް ބުނެއެވެ. 

ރޭލު ދަގަނޑުން ކައްސާލައިގެން މި އެކްސިޑެންޓު ހިނގަން މެދުވެރިވި ސަބަބު އަދި ކަށަވަރުނުވާއިރު، ކަމާބެހޭ ފަރާތްތަކުން ދަނީ މައްސަލަ ތަހުގީގު ކުރަމުންނެވެ.

އިންޑިއާގެ އުއްތުރަ ޕްރަދޭޝްގައި މިދިޔަ އަހަރުގެ ނޮވެމްބަރު މަހު ހިނގި ރޭލު އެކްސިޑެންޓެއްގައި 140 މީހުން މަރުވިއިރު އެތައް ބަޔަކު ވަނީ ޒަހަމްވެފައެވެ. މީގެއިތުރުން 2015 ވަނަ އަހަރު ހަމަ އެ ސްޓޭޓްގައި ހިނގި އެކްސިޑެންޓެއްގައި 39 މީހުން މަރުވެ އެތައް ބަޔަކު ވަނީ ޒަހަމްވެފައެވެ.