ދައުރުވަނީ ސައްހަ އޯޑިއޯތަކެއް ނޫން، އެއީ އަބުރުކަތިލުމަށް ހިންގާ ޖަރީމާއެއް: އަލީ ވަހީދު
އޯޑިއޯ ލީކް ކޮށްލާފައިވަނީ ހޮނިހިރު ދުވަހުގެރޭ
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ހެލްތް މިނިސްޓަރު އަމީން އާއި ޓޫރިޒަމް މިނިސްޓަރު އަލީ ވަހީދު
ޝޯޝަލް މީޑީއާގައި ލީކްވެފައިވާ އޯޑިއުތަކަކީ ސައްހަ އޯޑިއޯތަކެއް ނޫންކަމަށް ވިދާޅުވެ ޓޫރިޒަމް މިނިސްޓަރު އަލީ ވަހީދު ދިފާއުވެވަޑައިގެންފިއެވެ.
ޓުވިޓަރގައި ލީކުކޮށްލާފައިވާ އޯޑިއޯއަކީ ޓުރިޒަމް މިނިސްޓަރ އަލީ ވަހީދާއި ޔޫތު މިނިސްޓްރީގެ ސްޓޭޓް މިނިސްޓަރ އައްސަދު އަލީ (އަޑުބަރޭ) އާއި ދެމެދު ބުރާސްފަތި ދުވަހު ދެކެވުނު ވާހަކައެއް ކަމަށް އެ އޯޑިއޯ ލީކުކޮށްލި ޓްވިޓަރ އެކައުންޓުގައި ބުނެފައިވެއެވެ.
އެ އޯޑިއޯގައި، ކޮރޯނާ ވައިރަސް އާއި ގުޅިގެން ރާއްޖޭގެ ސަލާމަތީ ފިޔަވަޅުތައް ވަރުގަދަ ކުރުމަށްޓަކައި ހުރިހާ މަސައްކަތެއް ކުރެއްވީ ޓޫރިޒަމް މިނިސްޓަރުކަމަށް ވިދާޅުވެ ހެލްތު މިނިސްޓަރ އަބްދުﷲ އަމީން އަށް ނިސްބަތްކޮށް ބޭއަދަބީކޮށް "އަލީ ވަހީދު" ކަމަށް ބެލެވޭ ފަރާތަކުން ވާހަކަދައްކަވާ އަޑުއިވެއެވެ. އަދި ހެލްތު މިނިސްޓަރަށް ކުރެވޭހާވެސް ކަމަކީ ހެދިކާ ކެއުން ކަމަށާއި ޕީއާރަށް ދެ ކެމެރާމަނުން ގެންގުޅުން ކަމަށް ވެސް އޯޑިއޯގައި ވިދާޅުވެއެވެ.
އަމީން ހުރިހާ މަސައްކަތެއްވެސް ކުރައްވަނީ ޓްވިޓަރއަށް ކަމަށާއި އެއީ ވަގުތު ބޭކާރުކުރުން ކަމަށް އޯޑިއޯގައި އަޑުއިވެއެވެ. އަދި ޓްވިޓަރގައި ދައްކާ ވާހަކައަކީ އާއްމުން ބަލައިގަންނަ ކަންކަމެއް ނޫން ކަމަށާއި، ކޮރޯނާވައިރަސް އާއި ގުޅިގެން ގާއިމު ކުރެވުނު އައިސޮލޭޝަން ފެސިލިޓީތަކުގައި ރަނގަޅީ މީހަކު ކަރަންޓީނު ނުވިއްޔާ ކަމަށް އޯޑިއޯގައި އަލީ ވަހީދުކަމަށް ތުހުމަތުކުރެވޭ ފަރާތުން ވިދާޅުވާ އަޑުއިވެއެެވެ.
އެކަމާއި ގުޅިގެން އަލީ ވަހީދު ކުރެއްވި ޓްވީޓެއްގައި ވިދާޅުވީ، އަބުރު ކަތިލުމުގެ ގޮތުން ހިންގާ ޖަރީމާތަކުން އަޒުމެއް ނުގުޑާނެ ކަމަށެވެ. އަދި ހިތްވަރެއްވެސް ބައްޔެއް ނުކުރެވޭނެ ކަމަށެވެ.
މިނިސްޓަރ އަމީނަށް ފާދުވިދާޅުވެ ދައްކަވާފައިވާ އޯޑިއޯއެއްގެ އިތުރުން، މިނިސްޓަރ އަލީ ވަހީދުކަމަށް ތުހުމަތުކުރެވޭ ފަރާތަކުން އެޑިއުކޭޝަން މިނިސްޓަރ އައިޝަތު އަލީ އާއި، ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރ އައިޝަތު ނަހުލާ އާއި ގުޅޭގޮތުންވެސް ދައްކަވާފައިވާ އޯޑިއޯތަކެއްވެސް ވަނީ ލީކްކޮށްލާފަ އެވެ. އޯޑިއޯ ރައްދުވާ އެއްވެސް މިނިސްޓަރަކު މިހާތަނަށް އޯޑިއޯތަކާއި ގުޅޭގޮތުން އެއްޗެއް ވިދާޅެއްނުވެ އެވެ.
