ރާއްޖޭގައި ފުރަތަމަ ފަހަރަށް ކްލައިމެޓް އިމަރޖެންސީ އިއުލާނުކުރުމަށް ފާސްކޮށްފި
މިގޮތަށް އިއުލާނު ކުރުމަށް ފާސްކުރީ މަޖިލީހުގެ 68 މެމްބަރުންގެ ވޯޓުން
ރަށްގިރުން
ރާއްޖޭގައި ފުރަތަމަ ފަހަރަށް ކްލައިމެޓް އިމަރޖެންސީ އިއުލާނުކުރުމަށް ފާސްކޮށްފިއެވެ.
މިގޮތަށް އިއުލާނު ކުރުމަށް ފާސްކުރީ މަޖިލީހުގެ 68 މެމްބަރުންގެ ވޯޓުންނެވެ. މޫސުމީ ކުއްލި ހާލަތު އިއުލާނު ކުރުމަށް ހުށަހެޅި ގަރާރަކީ ދުނިޔޭގެ މޫސުމަށް އަންނަ ބަދަލުތަކުގެ މައްސަލައަށް ހައްލެއް ނުލިބި އަދި މިބޮޑު ނުރައްކަލުން ދުނިޔެ ސަލާމަތްކުރުމަށް އޮތް ހަނި ފުރުސަތު ދުވަހެއް ދުވަހަކަށް ކުޑަވަމުންދާތީ އެކަމުގެ ކަންބޮޑުވުން ދުނިޔޭގެ ސަމާލުކަމަށް ގެނައުމަށް އެދި ހުށަހެޅި ގަރާރެކެވެ.
މިގަރާރުގައި ގޮވާލާފައިވާ މައިގަނޑު ކަންކަމަށް ބަލާލާއިރު ފޮސިލް ފިއުލް އުފެއްދުމުގެ މަޝްރޫޢުތަކަށް ގައުމު ތަކުން މިހާރު ކުރަމުންދާ އިންވެސްޓްމަންޓްތަކާއި ދެމުން ގެންދާ ސަބްސިޑީތައް ހުއްޓާލައި، އިއާދަކުރަނިވި ހަކަތަ އުފައްދަން މި ފައިސާ ހޭދަ ކުރުމަށް މަގުފަހި ކުރުމަށް ގައުމު ތަކަށާއި، ބައިނަލްއަޤްވާމީ ޖަމާއަތްތަކާއި، މާލީ އިދާރާތަކުގެ ސިޔާސަތުތައް ބަދަލުކުރުމަށް ގޮވާލާފައިވެއެވެ. މީގެއިތުރުން މޫސުމަށް އަންނަ ބަދަލުތަކުގެ ނުރައްކާ ކުޑަކުރުމަށް ބައިނަލްއަގްވާމީ މުޖްތަމައުން ރާއްޖެއަށާއި ރާއްޖެފަދަ ކުދި ޖަޒީރާ ގައުމުތަކަށް ދެމުން އަންނަ އެހީ އަކީ ބޭނުންތެރި އެހީއެއް ކަމުގައި ވީ ނަމަވެސް، އެއީ މި މައްސަލައަށް ދާއިމީ ހައްލެއް ލިބޭނެ ކަމެއް ކަމަށް ރާއްޖޭން ނުދެކޭ ކަމަށް ގޮވާލުންވެސް ހިމެނެއެވެ.
އަދި ރާއްޖެފަދަ ކުދި ޖަޒީރާ ގައުމުތަކުގެ ދެމި އޮތުމާއި ސަލާމަތް ބިނާވެފައި އޮތީ، ޖައްވު ހޫނުވުމަށް މެދުވެރިވާ ގޭސްތައް ބޭރުވުން މަދު ކުރުމަށް ކުރާ މަސައްކަތުގެ މައްޗަށް ކަމަށް ވުމާއެކު، ކަނޑައެޅިފައިވާ މިންގަނޑުތަކެއްގެ ތެރޭން، ޤައުމުތަކުން ޖައްވަށް ބޭރު ކުރާ ކާބަން މަދުކުރުމަށް ބައިނަލް އަގްވާމީ މުޖްތަމައުގައި ރާއްޖޭން ވަކާލާތު ކުރުމަށް ވެސް ގަރާރުގައި ގޮވާލާފައިވެއެވެ.
ގަރާރުގައި ގޮވާލާފައި އިތުރު ކަންކަމަށް ބަލާލާއިރު ގޮތުން ދުނިޔެ ހޫނުވުމާއި މޫސުމަށް ބަދަލު އަންނަ މައްސަލައަކީ، ދެބަސް ވެވެން ނެތް މިންވަރަށް ޒަމާނީ ސައިންސްގެ އަލީގައި ސާބިތުކޮށް ދީފައިވާ މައްސަލައެއް ކަމަށް ދުނިޔޭގެ ގައުމުތަކުން ބަލައިގަތުމަށް ގޮވާލުންވެސް ހިމެނެއެވެ.
ސައިންސްވެރިންގެ އިންޒާރު ތަކަށް އިޖާބަދީ، ދުނިޔޭގެ އެވްރެޖް ފިނިހޫނުމިން 1.5 ޑިގްރީ ސެލްސިއަސްއަށް ވުރެ މައްޗަށް ދިޔަ ނުދިނުމުގެ ގޮތުން، ޤައުމުތަކުން ގްރީންހައުސް ގޭސް ޖައްވަށްދޫކުރާ މިންވަރު 2030 ވަނަ އަހަރުގެ ނިޔަލަށް މިހާރަށް ވުރެ 45 އިންސައްތަ ދަށް ކުރުމަށާއި، 2050ވަނަ އަހަރުގެ ނިޔަލަށް ނެޓް ޒީރޯއަށް ތިރިކުރުމަށް ގައުމުތަކަށް ގޮވާލާ ދިވެހިރާއްޖޭން ވަކާލާތު ކުރުމަށް ވެސް ގޮވާލާފައިވެއެވެ. އަދި ޕެރިސް އެގްރިމެންޓްގެ ރޫހާ ޚިލާފަށް މަތީ މިންވަރަކަށް ޖައްވަށް ކާބަން ބޭރުކުރާ ގައުމުތައް ފާހަގަކޮށް،އިގްތިސާދީ ގޮތުން އެ ގައުމުތަކާ ދެކޮޅަށް ފިޔަވަޅު އެޅޭނެ އުސޫލުތަކެއް އ.ދ ގެ ގިއުގަނޑުގެ ދަށުން އެކުލަވާލާ ތަންފީޒް ކުރުމަށް ބައިނަލް އަގްވާމީ މައިދާނުގައި ރާއްޖޭން ވަކާލާތު ކުރުމަށްވެސް ގަރާރުގައި ގޮވާލާފައިވެއެވެ.
