ޕްރައިމަރީގައި ވާދަކުރުމަށް ސައްހަ 1364 ފޯމް ހުށަހަޅާފައިވޭ: އެމްޑީޕީ
11 ޖެނުއަރީ 2020 | ހޮނިހިރު 09:26ޕްރައިމަރީ ބޭއްވުމަށް ހަމަޖެހިފައިވަނީ ޖެނުއަރީ މަހުގެ 31 ވަނަ ދުވަހު
އެމްޑީޕީ އޮފީހުގައި ޕްރައިމަރީގެ ފޯމް ބަލައިގަތުމުގެ މަސައްކަތް ކުރިއަށްދަނީ
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޕްރިއަމަރީގައި ބައިވެރިވުމަށް ފޯމް ހުށައެޅުމުގެ ސުންގަޑި ހަމަވިއިރު ސައްހަ 1364 ފޯމް ހުށަހަޅާފައިވާކަމަށް އެޕާޓީން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން އެމްޑީޕީގެ އިންތިހާބާ ބެހޭ ކޮމިޓީގެ ނައިބު މުގައްރިރު އަދި ހެންވޭރު އުތުރު ދާއިރާގެ މެމްބަރު އިބްރާޙިމް މުއިއްޒު ވިދާޅުވީ، ސުންގަޑި ހަމަވިއިރު 1400 އަށް ވުރެން ގިނަ ފޯމް ހުށަހެޅިކަމަށާއި އޭގެތެރެއިން ސައްހަ ފޯމްގެ ގޮތުގައި ކަނޑައަޅާފައިވާ އަދަދަކީ 1364 ފޯމްކަމަށެވެ. ޕްރައިމަރީގައި ވާދަކުރާ މީހުންގެ އަދަދު މަދުވީ، ބައެއް ދާއިރާތަކާއި ރަށްރަށުގެ ކައުންސިލަށް ކުރިމަތިލި މީހުން ނަން އަނބުރާ ގެންދެވުމުގެ އިތުރުން، މައުލޫމާތު ރަނަގަލަށް ސާފުނުވެ ކައުންސިލްގެ ރައީސްގެ މަގާމުގެ އިތުރުން ކައުންސިލްގެ މެމްބަރުކަމަށް ކުރިމަތި ލުންކަމަށްވެސް މުއިއްޒުވަނީ ފާހަގަކުރައްވާފައެވެ.
އެންމެ ބޮޑަށް އެފަދަ އޮޅުންތަކެއް އަރައިގެން އުޅެނީ ރަށްރަށުގެ ކައުންސިލަށް ކުރިމަތިލާ މީހުންގެކަން ފާހަގަކޮށް މުއިއްޒު އިތުރަށް ވިދާޅުވީ އެފަދަ ފަރާތްތަކަށް ގުޅައި ކުރިމަތި ލާންބޭނުންވާ ދާއިރާއެއް އިހްތިޔާރުކުރުމަށް ހުށަހަޅަމުން ދާކަމަށެވެ. އެންމެ ފަހުން އެމްޑީޕީން އާންމުކުރި ތަފާސްހިސާބުތަކަށް ބާލާއިރު މާލެސިޓީ ކައުންސިލުގެ މޭޔަރުކަމަށް 7 ބޭފުޅަކު ކުރިމަތިލާފައިވާއިރު ކައުންސިލްގެ މެމްބަރުކަމަށް 41 ފަރާތަކުން ވަނީ ކުރިމަތިލާފައެވެ. އައްޑޫސިޓީއަށް ބަލާއިރު، 3 ބޭފުޅަކު މޭޔަރުކަށް ކުރިމަތިލާފައިވެއެވެ. އަދި 41 ފަރާތެއް ވަނީ ކައުންސިލްގެ މެމްބަރުންގެ މަގާމަށް ކުރިމަތިލާފައެވެ. މީގެއިތުރުން ފުވައްމުލައް ސިޓީގެ މޭޔަރުކަމަށް 4 ބޭފުޅަކު ކުރިމަތިލައި 11 ބޭފުޅަކު ކައުންސިލް މެމްބަރުކަމަށް ކުރިމަތިލާފައިވާކަމަށް އެމްޑީޕީން ވަނީ ބުނެފައެވެ.
އިތުރަށް މައުލޫމާތު ދެއްވަމުން މުއިއްޒު ވިދާޅުވީ އެންމެ ފަހުން ސިޓީގެ ދަރަޖަ ދެވުނު ކުޅުދުއްފުށީ ސިޓީގެ ދާއިރާތަކަށް އެމްޑީޕީގެ ޓިކެޓްގައި ވާދަކުރައްވާފަރާތްތަކަށް އެ ފުރުސަތު ހޮނިހިރު ދުވަހުގެ ރޭ ހުޅުވާލާނެކަމަށެވެ. ސަރުކާރު ކޯލިޝަންގެ މައި ޕާޓީ އެމްޑީޕީން އެ ޕާޓީގެ ޕްރައިމަރީ ބޭއްވުުމުގެ ތައްޔާރީތައްވަމުން އަންނައިރު، އާދިއްތަ ދުވަހު އެމްޑީޕީ އުތުރު މަހާސިންތާ ކުޅުދުއްފުށީގައި ބޭއްވުމަށް ވަނީ ހަމަޖެހިފައެވެ. އެ ދަތުރުގައި އިސްކޮށް ހުންނަވާނީ އެމްޑީޕީގެ ރައީސް މުހައްމަދު ނަޝީދު އެވެ.
މި އަހަރުގެ އެޕްރީލް މަހު ބާއްވާ ލޯކަލް ކައުންސިލް އިންތިޚާބަށް ކެމްޕޭން ކުރުމުގެ ޙަރަކާތްތައް މިހާރު ވަނީ ފަށާފައެވެ. މި އިންތިޚާބަކީ ރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ގާނޫނަށް ގެނައި އާ އިސްލާހުތަކަށް ފަހު ބާއްވާ ފުރަތަމަ އިންތިޚާބެވެ.
