ޓޫރިޒަމް މިނިސްޓްރީގެ ހަރުމުދަލުގެ އަގުގެ ސައްހަކަން ކަށަވަރެއް ނުވޭ: އޮޑިޓަރ ޖެނެރަލް

މިދިޔަ އަހަރު ނިމުނުއިރު މިނިސްޓްރީ އޮފް ޓޫރިޒަމްގެ ހަރުމުދަލުގެ ގޮތުގައި ހުރިތަކެތީގެ އަގުގެ ސައްޙަކަން ކަށަވަރު ނުވާކަމަށް އޮޑިޓަރ ޖެނެރަލް ހަސަން ޒިޔަތު ވިދާޅުވެއްޖެވެއެވެ.

އޮޑިޓަރ ޖެނެރަލް ނެރުއްވި 2016 ވަނަ އަހަރުގެ ޓޫރިޒަމް މިނިސްޓްރީގެ މާލީ އޮޑިޓް ރިޕޯޓުގައި ބުނެފައިވަނީ އެމިނިސްޓްރީއާއި އެމިނިސްޓްރީގެ ދަށުން ހިންގަމުންދާ ރީޖަނަލް އެއަރޕޯޓްސްގެ ހަރުމުދަލުގެ ރަޖިސްޓަރީ ދައުލަތުގެ މާލިއްޔަތުގެ ޤަވާއިދާ އެއްގޮތައް ބަލަހައްޓާ އަޕްޑޭޓް ކޮށްފައި ނުވާކަން ފާހަގަ ކުރެވޭ ކަމަށެވެ. އެގޮތުން ތަނަށް ގަނެފައިވާ ބައެއް ހަރުމުދާ ރަޖިސްޓްރީއަށް ވައްދާފައި ނުވާކަމާއި ބައެއް ހަރުމުދާ ހޯދި ތާރީޚާއި މުދާ ހުރިތަނާއި އަގުފަދަ މައުލޫމާތުތައް ރަޖިސްޓަރީގައި ހިމަނާފައި ނުވާކަމަށެވެ. އަދި ބައެއް ހަރުމުދަލުގައި އެމުދަލެއްގެ އަައިޑެންޓިފިކޭޝަން ނަމްބަރު ޖަހާފައި ނުވާކަންވެސް ފާހަގަ ކުރެވުނު ކަމަށެވެ. އަދި ތަނުގައި ހުންނަންޖެހޭ ހުރިހާ ތަކެތި ހަމަޔަށް ހުރިތޯ ލަސްވެގެން އަހަރަކު އެއްފަހަރު ޗެކްކުރަންވާނެކަމަށް ދައުލަތުގެ މާލިއްޔަތު ޤަވާއިދުގައި ބަޔާންކޮށްފައި ވީނަމަވެސް މިފަދައިން ހަރުމުދާ ޗެކްކޮށްފައި ނުވާކަންވެސް އެރިޕޯޓުގައި ވަނީ ފާހަގަ ކޮށްފައެވެ.

މީގެ އިތުރުން ހަރުމުދަލުގެ ރަޖިސްޓަރީއާއި މާލީ ބަޔާންތަކުގައި ހަރުމުދަލުގެ އަގުގެ ގޮތުގައި ހިމަނާފައިވާ ޢަދަދުތައް ރިކޮންސައިލް ކޮށްފައި ނުވުމުގެ ސަބަބުން، މިނިސްޓްރީގެ ކޮންސޮލިޑޭޓް ކޮށްފައިވާ މާލީ ބަޔާންތަކުގެ އިތުރު މައުލޫމާތުގެ ތެރޭގައި ހިމެނޭ މިލްކިއްޔާތުގެ ބަޔާނުގައި 31 ޑިސެމްބަރ 2016 ގެ ނިޔަލަށް މިނިސްޓްރީގައި ހުރި ހަރުމުދަލުގެ އަގުކަމަށް ހިމަނާފައިވާ 68100344 (ފަސްދޮޅަސް އަށް މިލިއަން އެއް ސަތޭކަ ހާސް ތިން ސަތޭކަ ސާޅީސް ހަތަރެއް) ރުފިޔާއަކީ އަހަރު ނިމުނުއިރު ތަނުގައި ހުރި ހަރުމުދަލުގެ ސައްޙަ އަގުކަން ކަށަވަރުކުރެވެން ނެތްކަން ފާހަގަ ކުރެވިފައިވާ ކަމަށެވެ.